Urkunde Nr. 1309 aus Band III

Seite im UB:

57-60 ^a)

Druckvorlage:

nach Einschaltung (Insert)

Abdruck als:

Volltext

Sprache:

Latein

---

1309

Szentimre 1393 Mai 12 Bartholomeus, Vizewoiwode von Siebenbürgen, spricht Daniel und Hench, den Söhnen Peter Seuer's von Schässburg, die ihnen durch Johann, den Sohn Nikolaus' von Altfleigen, strittig gemachte Hälfte der Besitzung Wolkendorf zu.

Nos magister Bartholomeus vicevaivoda Transsiluanus memoriae commendantes tenore praesentium significamus quibus expedit universis, quod in congregatione generali viri magnifici domini Ladizlai pridem vaivodae Transsiluani universitati nobilium et alterius cuiusvis status hominum partis Transsiluanae octavo die festi Passcae domini, anno eiusdem millesimo trecentesimo nonagesimo primo,²⁾ Tordae celebrata Johannes filius Nicolai de Ffeleky personaliter de medio aliorum exsurgendo, prout per literas eiusdem domini vaivodae informabamur, proposuisset eo modo, quod ipse huius rationem scire vellet, qua mediante Daniel et Hench filii Petri dicti Seuer de Segesuar rectam dimidietatem possessionis Wolkan vocatae iure successorio ipsum contingentem tenerent et conservarent. Quo percepto praelibati Daniel et Hench filii Petri similiter personaliter in eiusdem domini vaivodae exsurgentes praesentiam respondissent ex adverso, quod [S. 58] ipsi praetactam medietatem dictae possessionis Wolkan vigore efficacissimorum instrumentorum tenerent et conservarent, quae instrumenta non ad tunc sed in termino ulteriori per ipsum dominum vaivodam eis dando exhibere prompti essent et parati. Unde idem dominus vaivoda his auditis iudicans commisisset eo modo, quod iidem Daniel et Hench universa literalia eorum instrumenta, si quae facto in praemisso haberent confecta, in octavis festi omnium sanctorum tunc venturis¹⁾ exhibere tenerentur coram ipso, ut his visis iudicium et iustitiam facere valeret inter partes in praemissis. A quibus quidem octavis festi omnium sanctorum¹⁾ cum ipsa instrumentalis exhibitio partes inter easdem primo iuxta continentias literarum Ladizlai vicevaivodae eiusdem et tandem nostrarum dilatoriarum quibusdam prorogationibus et terminis intervenientibus ad octavas festi beati Michaelis archangeli proxime praeteritas²⁾ cum iudicio trium marcarum eo, quod praefatus Daniel se et annotatum Hench fratrem suum ipsam prius facere non posse retulisset, ab ipsisque octavis festi beati Michaelis archangeli²⁾ similiter ex eo, quia iidem Daniel et Hench ipsa instrumenta eorum tunc exhibere non posse indicarant, cum altero iudicio trium marcarum deponendo ad octavas festi epiphaniarum domini tunc venturas³⁾ et abhinc de earundem partium voluntate ad praesentes octavas festi beati Georgii martyris⁴⁾ dilative deventa exstitisset, ipsis denique octavis festi beati Georgii martyris⁴⁾ occurrentibus praelibato Johanne filio Nicolai actore personaliter ad nostram veniente praesentiam praemissaque literalia instrumenta per ipsos Danielem et Hench praemisso modo exhibere assumpta⁵⁾ per eosdem exhiberi postulante praefatus Daniel filius Petri pro se personaliter et pro ipso Hench fratre suo cum literis procuratoriis capituli Transsiluanensis in nostram exsurgens praesentiam pro praemissis per ipsos exhibere assumptis instrumentis quasdam literas excellentissimi principis domini Lodouici pridem felicis regis Hungariae beatae recordationis in Ersomlyo, in festo asscensionis domini, anno eiusdem millesimo CCC^mo LXX^mo quinto⁶⁾ patenter emanatas nobis curavit exhibere exprimentes inter alia, quod Petrus dictus Sewer civis de Segesuar eiusdem domini Lodouici regis veniens ad praesentiam exhibuisset eidem literas capituli ecclesiae Albensis Transsiluanae continentes, quomodo comes Nicolaus de Erkentyno, comes Nicolaus de Hendorph, comes Demetrius de villa Rychuyni habita bona deliberatione possessionarias eorum portiones in villa Welkendorph vocata et eius pertinentiis habitas in agriculturis, vineis, pratis et aliis utilitatibus eidem Petro Sewer suisque heredibus et successoribus rite et rationabiliter vendidissent tenendas et perpetue possidendas, prout in eisdem⁷⁾ latius contineretur, petens eundem dominum Lodouicum regem humili precum instantia, ut sibi huiusmodi emptionem annuere et [S. 59] consentire dignaretur. Ipse enim dominus rex petitioni eiusdem Petri Sewer pro favore inclinatus emptionem praemissam per ipsum factam admisisset gratiose volens et committens, ut idem Petrus suique heredes et posteri gauderent et uterentur possessionibus praedictis rite et rationabiliter comparatis iuxta continentiam literarum eiusdem capituli ac [more et simili alias ]¹⁾ consueto de sua regia annuentia speciali. Idem etiam Petrus Sewer demum literas septem sedium partis Transsiluanae eidem domino regi exhibuisset exprimentes, quomodo eidem relicta comitis Petri et sui filii unum quartale villae Welkendorph vocatae pro undecim v[ ]²⁾ decem ac septem marcis ac uno fertone et medio legitime impignorassent, immo etiam filii Kysthomas de Rubanfalua medietatem unius quartalis praetactae villae pro triginta quinque florenis obligassent, supplicans dictus Petrus ipsi regiae maiestati, ut in eisdem pignoribus pacificum conservaret, donec huiusmodi particulae possessionariae redimerentur pro pecuniis sibi impignoratis. Verum quia iusta petentibus non est denegandus assensus, eundem Petrum Sewer una cum praedictis particulis sibi impignoratis in suam regiam recepisset protectionem committens episcopo Transsiluano, ut praetactum Petrum in dictis particulis possessionariis in sua regia persona protegeret et defenderet ab omnibus illicite volentibus aggravare. Adhuc insuper praefatus Daniel praetactas literas annotati capituli Transsiluani privilegiales coram praefato domino Lodouico rege praemisso modo exhibitas super praemissa emptione possessionaria feria tertia proxima post quindenas festi resurrectionis domini, anno eiusdem M^mo CCC^mo LX^mo nono³⁾ confectas nobis demonstravit sensum praescriptum continentes. Quarum quidem literarum exhibitionibus factis et perlectis continentiis earundem praenominatus Johannes filius Nicolai per nos legitime requisitus nobilem dominam matrem suam filiam quondam comitis Petri nobilis de dicta Wolkan exstitisse et ex eo praetactum medietatem eiusdem possessionis ratione iuris eiusdem dominae matris suae sibi pertinere debere referens, sibi, praefatus etiam Daniel similiter sibi et annotato Hench fratri suo per nos iuris medelam postularunt elargiri aequitate suadente. Verum licet praefatus Johannes filius Nicolai praetactam nobilem dominam matrem suam filiam annotati comitis Petri exstitisse et ob hoc praetactam medietatem dictae possessionis Wolkan sibi de iure pertinere debere praemisso modo retulerit, tamen quia praedicta possessio Wolkan eiusdem quondam comitis Petri et praenominatorum aliorum venditorum et impignoratorum dictarum portionum possessionariarum hereditaria exstitisse praedictaque nobilis domina mater ipsius Johannis non homini ignobili et impossessionato sed nobili videlicet annotato Nicolao patri ipsius Johannis actoris matrimonialiter tradita fuisse per partes praedictas asserebantur, rationeque nobilitatis dicti mariti eiusdem nobilis dominae matris ipsius Johannis actoris ius eiusdem de dicta possessione hereditaria quartale non cum possessione, praetextu cuius praescriptas venditas et impignoratas parti- [S. 60] culas possessionarias pro se vindicare¹⁾ posset, sed pecuniaria solutione mediante eidem nobili dominae iuxta huius regni consuetndinem debet provenire, ex eoque praetactae portiones possessionariae praemissarum venditionis et impignorationis titulis ac annuentia et consensu praelibati domini Lodouici regis praefatis Danieli et Hench filiis Petri Sewer de iure pertinere et adiudicari debere nobis et universis regni nobilibus nobiscum in sede nostra iudiciaria sedentibus manifeste agnoscebatur, pro eo eorundem regni nobilium assumpto consilio praetactam medietatem annotatae possessionis Wolkan per iam dictum Johannem filium Nicolai praemisso indebito modo requisitam memoratis Danieli et Hench filiis Petri eorumque heredibus et posteritatibus universis praemissis emptitiis et impignoratitiis titulis adiudicantes reliquimus et commisimus in sempiternum possidere, tenere pariter et habere sine praeiudicio iuris alieni, praefatum Johannem filium Nicolai pro praemissa indebita requisitione eiusdem in aestimatione ipsius condigna convictum et aggravatum fore decernentes. In cuius rei memoriam firmitatemque perpetuam praesentes eisdem Danieli et Hench concessimus literas nostras pvivilegiales pendentis sigilli nostri authentici munimine roboratas. Datum in sancto Emerico, duodecimo die octavarum festi beati Georgii martyris praedictarum, anno domini millesimo trecentesimo nonagesimo tertio.


a) Die Fußnoten wurden in diesem Band des UB jeweils seitenweise gezählt. Auf die vorliegende Urkunde entfallen: 2 auf S. 57 (1 zu voranstehender Urkunde), 1-7 auf S. 58, 1-3 auf S. 59, 1 auf S. 60 (dortige 2-3 zu nachfolgender Urkunde).^{^}
[S. 57]
2) 1391 April 2.^{^}
[S. 58]
1) November 8 [2x]. ^{^}
2) 1392 Oktober 6 [2x].^{^}
3) 1393 Januar 13. ^{^}
4) Mai 1 [2x]. ^{^}
5) Hierauf: instrumenta.^{^}
6) 1375 Mai 31. ^{^}
7) Scilicet: literis.^{^}
[S. 59]
1) Schrift verblasst, 2.7 Centimeter breit. ^{^}
2) Desgleichen 2 Centimeter. ^{^}
3) 1369 April 17.^{^}
[S. 60]
1) Vorlage: vendicare.^{^}