Urkunde Nr. 813 aus Band II

Seite im UB:

215-216

Druckvorlage:

nach Original

Abdruck als:

Volltext

Sprache:

Latein

---

813

1364 September 14 Dekan Martin und das Kapitel von Hermannstadt sprechen Hermanns, dem Pfarrer von Heltau, den diesem durch Peter, den Pfarrer von Schellenberg, strittig gemachten Zehnten zu und bezeugen, dass Hermanus an Peter die Hälfte des genannten Zehntens auf Lebenszeit bedingungsweise überlassen hat.

Quia ordo rerum gestarum valde de facili ob imbecillitatem humanae naturae labitur a memoria et recedit nisi serie literarum perennetur, hinc est quod nos Martinus decanus Cybiniensis necnon plebanus in Magno horreo ceterique confratres capituli eiusdem significamus tenore praesentium quibus expedit universis, quod dominus Hermanus plebanus in Heltha dominum Petrum plebanum de Schellmberk pro quibusdam decimis infra erectas metas populorum de Heltha provenientibus videlicet inter aquam Schebs vocatam et stratam publicam quae de eadem villa ducit ad civitatem et alium locum qui Steynrech appellatur coram nobis ordine iudiciario convenit. Et diversis rationibus ex utraque parte hincinde ventilatis, tandem dictus dominus Hermannus praefatas decimas esse suas et ecclesiae suae in Helta probabilibus rationibus ac literis patentibus non rasis nec vitiatis sigillis pendentibus roboratis per manus discretorum virorum scilicet domini Nicolai plebani de villa Epponis et domini Christani plebani de Magno horreo necnon aliorum confratrum capituli Czybiniensis tempore decanatus eorundem existentium pro simili causa traditis evidentissime approbavit. Idcirco nos legentes et intelligentes praetactas literas ac sententias secundum formam iuris per omnia esse latas, easdem approbamus et confirmamus adiudicantes et conferentes saepe nominatas decimas supra dicto domino Hermanno pro nunc plebano in Helta suisque successoribus ibidem iure perpetuo quiete possidendas ante dicto domino Petro plebano de Schellmberk eiusque successoribus perpetuum silentium imponentes de eisdem. His itaque ordinatis et diffinitis tandem praetactus dominus Hermanus uti pius et discretus proxima feria secunda post nativitatem beatae virginis¹⁾ fraternitate iuxta [S. 216] consuetudinem nostram in Affrica celebrata studiosis precibus omnium confratrum inibi existentium benigne condescendens saepe dicto domino Petro plebano de Schellmberk dimidietatem decimarum supra dictarum nullo iure sed sola gratia pro tempore suae vitae tantum pie concessit possidendam conditione tali interiecta, si dictus dominus Petrus ac sui consanguinei et amici voluntatem et beneplacitum ipsius domini Hermanni in omnibus plenariter observarent, si vero ipse vel ipsi divisim aut coniunctim seu quicumque ipsorum ex parte secus fecerit vel fecerint et dicto domino Hermanno contraierint verbo vel facto modo qualicumque, ex tunc supra notatus dominus Hermannus pluries nominatas decimas ad libitum suum sibi assumere valebit et in suum ac ecclesiae suae usum convertere integraliter et in toto qualibet contradictione remota, postquam vero unus eorum viam carnis universae ingressus fuerit, dictae decimae plenarie et indivisim ad ecclesiam parochialem in Helta perpetue pertinebunt occasione qualibet seu auxilio iuris canonici vel civilis penitus non obstante. Ut igitur haec omnia firma permaneant et inconvulsa praenotato domino Hermanno ac suis successoribus praesentes literas nostris sigillis pendentibus roboratas duximus concedendas. Datum anno domini M. CCC^o. LXIIII^{o a)}, in festo exaltationis sanctae crucis.


a) Die hochgestellten Buchstaben nach den Zahlzeichen sind in diesem Band des gedruckten Urkundenbuches differenziert gesetzt, hier stets über den Zahlzeichen.^{^}

1) September 9.^{^}