Urkunde Nr. 996 aus Band II

Seite im UB:

394-397 ^a)

Heute in:

Hermannstadt, Staatsarchiv [Direcţia Judeţeană Sibiu a Arhivelor Naţionale ale Romȃniei]

Heutige Signatur:

Kirchenarchive A.B. [Colecţia de documente ale parohiilor ev. CA săseşti] Serie II (Inventar 228), Nr. 499 - Abt. 13: K. A. Heltau [Parohia Ev. CA Cisnadie], Nr. 10.

Druckvorlage:

nach Einschaltung (Insert)

Abdruck als:

Volltext

Sprache:

Latein

---

996

1372 Dezember 1 Die sieben Stühle schlichten einen Grenzstreit zwischen der Stadt Hermannstadt einerseits und der Gemeinde Heltau andererseits.

In sanctae et individuae trinitatis nomine amen. Quoniam rerum gestarum series ne labitur ob imbecillitatem humanitatis simul cum lapsu temporis, ideo honorandorum testimonio robore sigilli virtute stilique literatorii iugiter solent perennari, id namque indestructum permanet, quod fide dignorum auxilio felici dispositione fuerit sagaciter communitum. Nos proinde comes Andreas de Schebes, comes Yanusch de Cibinio iudices regiae maiestatis necnon universitas omnium seniorum septem sedium partis Transsiluanae ad universorum notitiam harum tenore volumus pervenire, quod cum inter universitatem civium de Cibinio ab una, similiter universitatem civium villae Heltha parte ab altera super metis ac grenniciis ipsorum territoriorum hinc inde controversiae, rixae atque contentiones suscitatae, per multa homicidia in rerum ablationibus damna a multis annis retrolapsis sibi insimul per utrasque partes facta exstitissent, propter quod prece continua ex utrisque [S. 395] partibus universis provincialibus fuerant supplicantes, quatenus causa futurae tranquillitatis¹⁾ unionem pacis perpetuam vellent in medio ipsorum ordinare, ideo universi provinciales reverendos viros et dominos videlicet dominum Martinum decanum Cibiniensem plebanum de Magno horreo²⁾ necnon dominum Goblinum plebanum de insula Cristiani ac dominum Hermannum plebanum de Helta rogatu studioso exorabant, ut auxilio et consilio honorandorum inter iam dictas civitates debitam et quietam reformationem nexu perpetuali dignarentur ordinare. Qui reverendi viri et domini prece provincialium se humillima devotione obtemperabant ex aeterni salvatoris annuentia deificaque imbutione, omnia opera vetera olim in tempore malitiose per utrasque partes perpetrata, haec necare suffocando nisu cordis studebant, partem litigiosam mitigare sub regula salutari, exhinc pro reformatione praemissorum ac concordia inter ipsos facienda, sub anno igitur domini millesimo trecentesimo septuagesimo secundo, Sabbato primo adventus summi conditoris,³⁾ assumptis ipsis idoneis viris sacerdotibus et laicis videlicet egregio viro domino Johanne plebano Cibiniensi, domino Johanne plebano de Burperg, domino Thoma plebano de Hanabach, item comite Laurencio de Ruffomonte, Alberto de Magno horreo, comite Andrea de Burperg, comite Georgio de Dalhem, item comite Seruacio de Cybinio, Michaele Nunecleppel magistro civium, Andrea Francz villico, Seruacio, Michaele Schoder, Henczmanno Schebneczer, Johanne Sulcener, Petro Czwilling, Nicolao Baran civibus Cibiniensibus, item Andrea Ham villico de Helta, Johanne Hertvich, Heinrich Czerner, Matthia Robach, Andrea Vrguet, Hannus Schebniczczer, Lenen⁴⁾ Cles civibus de Helta, et quampluribus viris sapientibus ipsis dominis adhaerentibus, partium pacem corde iusto zelantibus, ut omnis rancoris, irae, rixae et odii radicibus evulsis, exstirpatis de medio eorum sopiatur et aeterna pacis pulchritudine se mutuo queant amplexari, super omnibus praemissis praemissorum et singulis necnon in damnis, rerum ablationibus quomodocumque sibi invicem usque haec tempora illatis et perpetratis talem pacis et concordiae unionem inter iam dictas partes perpetue duraturam, ab omnibus ipsorum successoribus firmo diligamine inviolabiliter rite tenendam fecerunt,⁵⁾ veluti ex utriusque⁶⁾ partis bona voluntate rate consistit foederatum, eo die dum distinxitio ipsorum territoriorum ad manus praefatorum totaliter fuerat commissa. Qui viri honorabiles facta contemplatione universarum metarum huius territorii de principio ad finem diligenter perlustrabant videlicet nemora, prata, arva, exinde in omnibus locis huius grenniciae metas signatas sublevare palam conabantur. Prima meta in monte alpino, quam profundius et remotius laborare poterint, utilitate nemoris caute uti dignoscuntur, tali conditione, quod nemus versus solis occasum civitati facultative serviet, sic similiter nemus versus orientem universitati de Heltha cum omni fructu subiacebit, abhinc descendendo ad unam metam, ad quam itur per quoddam dorsum [S. 396] inter duos rivulos, quorum unus vocatur der Cleynschebs, secundus vero dy Kaldebach, ita notando, quod casura aquae versus occidentem pertinet civitati, et e contra casura aquae versus orientem villae Helta ministrabit, abhinc descendendo per altitudinem montis ad unam metam, quae iacet inter duos rivulos, quorum unus vocatur des Wolffezsyfen hop, alter vero vocatur des Nyzkam syffen hop, abhinc descendendo ad unam publicam viam, quae est communis meta inter partes saepe fatas, quae via se extendit quousque ad quendam rivulum der Wolssezsyfen vocatum, taliter notando quod viam ascendendo et descendendo semper communis meta manere cognoscitur, quod ipsi de Helta ultra ipsam viam in solis occasu nihil iuris habeant, aequali forma cives civitatis Cibiniensis sub via versus orientem in nullo dominentur, quod tamen iure deputato villae Helta ministrabit, item de rivulo qui dicitur der Wolssezsyfen transeundo per quendam fossam quousque ad montem qui dicitur der Gesenggetberg, abhinc descendendo ad quasdam vias, quae crucifixionaliter a monte sancti Michaelis se extendunt, et ibidem est una vera meta, abhinc eundo ad unam metam quae dicitur der Bukkestirn, iuxta quam signanter iacet unus lapis, item ad unam metam quae dicitur der Slaufberg, abhinc per dorsum ad unam metam eundo in qua stat arbor quercinea, ubi per viam meatur subtus vineas, quidquid ad sinistrum latus huius viae iacere cernitur, in pratis, vineis, nemoribus, terris arabilibus civitati plene famuletur, in eadem via transeundo ad locum, ubi quaedam arbores stantes existunt,¹⁾ quae dicuntur vulgariter kyppendorn, aliae arbores eychbom, abhinc ad quandam metam, quae erecta est in quodam loco qui vulgariter dicitur des Buchsyfen hop, per ipsum rivulum descendendo ad quendam locum, ubi quondam hortus apium exstiterat, quem fossata circumdant, ibidem una meta erecta, dehinc ascendendo per quoddam parvulum campum et ibidem in cacumine montis una meta sublevata est, abhinc lineatim iuxta alias communes metas descendendo quoad unam metam, quae sublevata est circa litus cuiusdam rivuli Schebes vocati, ab eadem meta ad manum dextram circa decursum aquae ex illa parte rivuli ipsi de Helta praecipere cognoscuntur et dominari, sed ex ista parte ipsius rivuli Schebs versus civitatem civibus Cybiniensibus id territorium suadente iustitia in toto famuletur quoad unam viam, in qua ad forum itur, sitam²⁾ prope Schebs, quae etiam est una meta, tamen ob tutelam clariorem tres metae signatae sunt, ultra quas civitatis universitas nihil praecipere habeat nec dominari ita intelligendo, dum in ipsa via de rivulo Schebs versus civitatem itur, territorium ad sinistrum latus civitati ministrabit ad dexterum vero villae Helta pertinet iure decenti, cuius ultima meta est in quodam loco erecta qui dicitur daz Steynreich. Ibidem metae utrarumque partium metaliter terminantur. Item si aliquis ligna in nemore civitatis Cibiniensis furari nititur, dum per viredum silvae arripitur, solita pignoratione provincialibus consueta pro suis excessibus licite pigneretur,³⁾ et sic e contra dum ipsi de Helta aliquem de civitate in ipsorum silva invenerint, eadem poena caute punietur, donec satisfacere curat, ne duae universitates praefixae [S. 397] talem ob levem causam amplius simul irascentur. Item si aliqui singulares personae mutuo inimicarentur, quarum una de civitate alia de Helta has personas praeconsul cum villico et cum omnibus iuratis domare et corrigere tenetur, simili modo si sub potestate civium de Helta stare contemplantur easdem personas aequali correctione et argumento mitigabunt, ne praefixae universitates propter aliquos acephalos¹⁾ in saeviores dissensiones suscitentur. Praeterea notandum quod omnes veteres literae olim in tempore scriptae et confectae cuiuscumque materiae censeantur omnes mortuas has cognoscimus et cassas numquam sub aliqua virtute valituras nunc et in futurum. Item volumus, ut communitas civitatis Cibiniensis aliquod opprobrium contra ipsos de Helta numquam extendat²⁾ nec ipsi de Helta universitati civitatis viceversa, sed nexu perpetui zeli³⁾ se mutuo puro corde, omni loco et tempore constiterint⁴⁾ amicose combinantes. Item nullus alium in suo territorio appropriato molestat impediendo, sed quivis praefatarum communitatum suo territorio pleno iure gaudeat et fruatur sub poena et birsagio centum marcarum, in quibus fractor huius pacti⁵⁾ provincialibus subiacebit in emendam. In cuius rei testimonium firmum, verum et ratum novum sigillum omnium septem sedium praesentibus cernitur subappensum. Datum per manus magistri Michaelis tunc temporis notarii provinciae, anno domini millesimo trecentesimo septuagesimo secundo, in die sequenti sancti Andreae apostoli domini nostri Jhesu Christi.


a) Die Fußnoten wurden in diesem Band des UB jeweils seitenweise gezählt. Auf die vorliegende Urkunde entfallen: 1-6 auf S. 395, 1-3 auf S. 396, 1-5 auf S. 397 (6-8 zu nachfolgender Urkunde).^{^}
[S. 395]
1) Vorlage: transquillitatis.^{^}
2) Vorlage: horrio.^{^}
3) November 27.^{^}
4) Kann auch: Leuen gelesen werden.^{^}
5) Fehlt in der Vorlage.^{^}
6) Vorlage: utraeque.^{^}
[S. 396]
1) Vorlage: exstituunt.^{^}
2) Vorlage: scitam.^{^}
3) Vorlage: pignoretur.^{^}
[S. 397]
1) Vorlage: asephalos.^{^}
2) Vorlage: extendant.^{^}
3) Vorlage: zeleris.^{^}
4) Vorlage: consisterint.^{^}
5) Vorlage: facti.^{^}