Urkunde Nr. 1235 aus Band II

Seite im UB:

633-634

Heute in:

Kronstadt, Staatsarchiv [Direcţia Judeţeană Braşov a Arhivele Naţionale ale Romȃniei]

Heutige Signatur:

Fond 1: Stadt Kronstadt [Primaria Municipiului Braşov], Privilegiensammlung (Colecţia privilegii) Nr. 11.

Druckvorlage:

nach Einschaltung (Insert)

Abdruck als:

Volltext

Sprache:

Latein

---

1235

1388 Dezember 15 König Sigmund bekräftigt seine Urkunde von 1387 Nr. »1218 mit der Urkunde des Königs Ludwig I. von 1353 Nr. »677 beziehentlich von 1364 Nr. »819, betreffend die Rechte der Sachsen des Kronstädter Distriktes.

Sigismundus dei gratia Hungariae, Dalmaciae, Croaciae, Ramae, Seruiae, Galliciae, Lodomeriae, Comaniae Bulgariaeque rex ac marchio Brandemburgensis, sacri Romani imperii archicamararius necnon Bohemiae et Lucemburgensis heres omnibus Christi fidelibus tam praesentibus quam futuris praesentium notitiam habituris salutem in omnium salvatore. Ad apicem pertinet regiae maiestatis suas literas, quarum vires veritati suffragantur et quae commoda denotant fidelium, ratificando clementer innovare, ut per ratificationis titulum ea inconcussa permaneant, quae excelsi principes suis temporibus ad eorum tranquilliorem subditorum statum rite decernendo statuerunt. Proinde ad universorum notitiam harum serie volumus pervenire, quod fideles nostri Johannes filius Nicolai villicus de civitate nostra Brassouiensi et Michael iudex de Feldwar districtus Brassouiensis suis et universorum fidelium civium et hospitum nostrorum Saxonum de eadem Brassow ac ad ipsam pertinentium personis in nostrae celsitudinis venientes conspectum exhibuerunt nobis quasdam literas nostras patentes maiori et authentico sigillo nostro consignatas tenorem literarum quondam excellentissimi principis domini Lodouici regis Hungariae patris et soceri nostri carissimi super libertatibus eorum emanatarum confirmative in se habentes supplicantes exinde nominibus quibus supra maiestati nostrae humiliter et devote, ut easdem ratas, gratas et acceptas habendo nostrisque literis privilegialibus verbotenus inseri faciendo pro ipsis ac eorum heredibus innovantes perpetue valituras dignaremur confirmare. Quarum tenor talis est. (Folgt die Urkunde des Königs Sigmund von 1387 Nr. »1218 mit der Urkunde des Königs Ludwig I. von 1353 Nr. »677 beziehentlich von 1364 Nr. »819.) Nos igitur humillimis et devotis eorundem Johannis villici et Michaelis iudicis supplicationibus nominibus quibus supra nostrae per eos subiective oblatis maiestati regia benignitate exauditis et clementer admissis praetaxatas literas nostras patentes prorsus omni suspicionis vitio destitutas praesentibusque de verbo ad verbum insertas quoad omnes earum continentias et clausulas acceptamus, approbamus et ratificamus atque nihilominus requirente fidelitatis ipsorum fidelium civium et hospitum nostrorum Saxonum Brassouiensium constantia, qua iidem nobis et sacro diademati semper praefuisse dignoscuntur, de consensu et beneplacita voluntate serenissimae principis dominae Mariae praemissa dei gratia reginae Hungariae consortis nostrae praecarae praelatorumque et baronum nostrorum consilio praematuro ex certa nostrae maiestatis scientia, [S. 634] simul cum ipsarum libertatum praerogativis superius in tenoribus earundem latius expressis pro eisdem fidelibus civibus et hospitibus nostris de Brassow et eiusdem cunctis pertinentiis ac eorundem heredibus universis innovantes perpetue valituras confirmamus praesentis scripti nostri patrocinio mediante. In cuius rei memoriam firmitatemque perpetuam praesentes concessimus eisdem literas nostras privilegiales pendentis et authentici sigilli nostri duplicis munimine roboratas. Datum per manus reverendissimi in Christo patris et domini, domini Johannis archiepiscopi ecclesiae Strigoniensis locique eiusdem comitis perpetui aulaeque nostrae et ipsius reginalis maiestatis eximii cancellarii dilecti nostri et fidelis, anno domini millesimo CCC^mo octuagesimo nono, decimo octavo Kalendas mensis Januarii, regni autem nostri anno secundo. Venerabilibus in Christo patribus et dominis Vallentino tituli sanctae Sabinae sacrosanctae Romanae ecclesiae presbytero cardinali et almae ecclesiae Quinqueecclesiensis gubernatore, eodem domino Johanne Strigoniensi, Lodouico Colocensi, Petro Jadrensi, Vgulino Spalatensi et Andrea Ragusiensi archiepiscopis, Johanne Waradiensi, Emerico Transsiluano, Johanne Zagrabiensi, Stephano Cikow Agriensi, Johanne Boznensi, Demetrio Vesprimiensi, Johanne Jauriensi, Petro Vaciensi, Johanne Sirimensi, Gregorio electo Nitriensi, Johanne Chanadiensi, Traguriensi et Scardonensi sedibus vacantibus, Paulo Tininnensi, Johanne Nonensi, Matheo Sibinicensi, Nicolao Corbauiensi et Johanne Seniensi ecclesiarum episcopis ecclesias feliciter gubernantibus. Necnon magnificis viris Stephano regni nostri palatino et iudice Comanorum, Ladislao vaivoda Transsiluano et comite de Zolnok, comite Emerico Bevbek iudice curiae nostrae, Ladislao de Losonch totius regni Sclauoniae, Dyonisio filio Thomae regnorum Dalmaciae et Croaciae, Nicolao de Gara Machowiensi banis, Nicolao filio Johannis de Kanisa tavarnicorum, Lewstasio de Ilswa ianitorum, Georgio de Chitnek dapiferorum, Nicolao de Pereni pincernarum, eodem domino Stephano palatino agasonum nostrorum magistris ac Sthiborio de Sthiborich comite Posoniensi aliisque quampluribus regni nostri comitatus tenentibus et honores.