Urkunde Nr. 1245 aus Band II

Seite im UB:

642-643

Druckvorlage:

nach Manuskript 19. Jahrhundert

Abdruck als:

Volltext

Sprache:

Latein

---

1245

Lublin 1390 Januar 20 Mircius, Woiwode der Walachei, schliesst mit Wladislaus, dem Könige von Polen, ein Bündnis gegen den König von Ungarn.

Mircius dei gratia vaivoda Transalpinus, Ffogoras et Omlas dux, Seuerini comes, terrarum Dobrodicii despotus et Tristri dominus harum notitiam habituris tam praesentibus quam futuris significamus quibus expedit [S. 643] universis, quod sincerae mentis affectu cupientes inire inviolabilis amicitiae foedera et volentes cum serenissimo principe domino Wladislao dei gratia rege¹⁾ Poloniae necnon terrarum Cracouiae, Sandomiriae, Syradiae, Lauciciae, Cuyauiae, Littwaniae principe summo, Pomoraniae Russiaeque domino et herede de . . baronum nostrorum unanimi consilio ordinationem huiusmodi parte ab utraque temporibus perpetuis servandam irrefragabiliter²⁾ fecimus et facimus ipsam nostrarum literarum robore confirmantes scilicet, quod memoratum serenissimum principem dominum Wladislaum Poloniae et cetera regem toto nostro posse atque potentia, dum affectando nostrum auxilium postulaverit, et homines sibi subditos ab insultu et hostili incursu . . regis Vngariae ac ipsius homagialium et quorumlibet hominum sibi subditorum constantissime volumus adiuvare, contra alios vero praedicti domini . . regis aemulos aut iniuriatores quoslibet ipsum iuxta nostri arbitrii beneplacitum iuvare promittimus et spondemus, quemadmodum amicum facere expedit atque decet. Idemque dominus . . rex ad nostrae postulationis affectum contra . . regem Vngariae et ipsius subditos pro toto ipsius posse atque potentia nos debet et tenebitur adiuvare, contra alios vero nostros aemulos iuxta ipsius liberi arbitrii beneplacitum, ut de nobis praemissum est, nobis auxiliabitur ut amicus. In cuius rei testimonium firmitatemque perpetuam literas nostras praesentes dedimus privilegiales pendentis³⁾ et authentici sigilli nostri maioris munimine roboratas. Datum in Lublin, in vigilia sanctae Agnetis virginis gloriosae, anno domini millesimo trecentesimo nonagesimo.


1) Vorlage: regi.^{^}
2) Vorlage: irrefrangibiliter.^{^}
3) Vorlage: pendenti.^{^}