Urkunde Nr. 1533 aus Band III

Seite im UB:

356-357

Heute in:

Klausenburg, Staatsarchiv [Direcţia Judeţeană Cluj a Arhivele Naţionale ale Romȃniei]

Druckvorlage:

nach Original

Abdruck als:

Volltext

Sprache:

Latein

---

1533

1405 Juli 2 König Sigmund verfügt, dass dem Siegel der Stadt Klausenburg die gleiche Geltung und Beweiskraft zukommen soll wie dem Siegel der Stadt Ofen.

Von der Kanzlei: Relatio Marci de Neuremberga tricesimarum et urburarum regalium comitis.

Sigismundus dei gratia Hungariae, Dalmaciae, Croaciae, Ramae, Seruiae, Galliciae, Lodomeriae, Comaniae, Bulgariaeque rex, marchio Brandemburgensis ac sacri Romani imperii archicamararius necnon Bohemiae et Lucemburgensis heres omnibus Christi fidelibus praesentibus pariter et futuris praesentium notitiam habituris salutem in omnium salvatore. Regiae meditationis in eo consistere censetur effectus, si subditorum profectui intendit pariter et quieti tantoque in eorum augmento dubia submovendo et resecando ambigua solertiorem se faciat intueri, quanto exinde sibi suisque aerariis immo reipublicae senserit abundantius provideri. Proinde ad universorum tam praesentium quam futurorum notitiam harum serie volumus pervenire, quod fideles nostri Jacobus Polkischer artium liberalium magister iuratus et Nicolaus Mwn dictus cives de Koloswar partium nostrarum Transsiluanarum suis necnon universorum civium hospitum et totius universitatis civitatis eiusdem nominibus et in personis nostrae claritatis adeuntes conspectum nobis querulose curarunt declarare, quod licet ipsi et eadem civitas Koloswar vocata ac ipsius communitas seu universitas inter alias suas praerogativas et libertates dudum et tempore, cuius contrarii memoria hominum non existit, sigillum proprium habuerit et habeat de praesenti ipsiusque iurisdictione, privilegio et firmitate more aliarum regni nostri civitatum usi fuerunt et gavisi, tamen nonnulli nostri regnicolae tam ecclesiastici quam saeculares huiusmodi sigilli iurisdictioni derogando in grande praeiudicium dictae civitatis et ipsius universitatis literas sub eodem emanatas acceptare [S. 357] eisque fidem adhibere hactenus non curassent et ad praesens non curarent attentarentque velle non curare in futurum, supplicantes superinde per nos eidem civitati et eius universitati seu communitati regiae deliberationis remedium adhiberi. Nos itaque qui subditorum nostrorum quieti ex iniuncto nobis divinitus regii regiminis officio cura pervigili et sedulitate opportuna invigilare debemus pariter et utilitati, attendentes ex eo dictae civitatis commodo ut plurimum derogari ipsorumque Jacobi et Nicolai petitionem superinde nostro culmini oblatam a rationis tramite minime discrepare quin potius iuri et iustitiae ut plurimum adaequari, de regiae potestatis plenitudine et ex certa scientia praelatorumque et baronum ac regni nostri procerum deliberato et maturo accedente consilio praefatum sigillum annotatae civitatis nostrae Koloswar vocatae approbamus, roboramus et ratificamus universasque literas sub tenoribus, formis, clausulis, punctis et articulis quibuscumque sub eodem sigillo generaliter et specialiter pro eisdem civibus hospitibus incolis habitatoribus et populis memoratae civitatis Koloswar nuncupatae et inter ipsos mutuo super causis, contractibus, ultimarum voluntatum testamentariis dispositionibus, actis, factis procuratoriis et generaliter recognitionibus quibuscumque rite tamen et rationabiliter emanatis et emanandis in futurum more et ad instar literis super factis quibusvis sub sigillo civitatis nostrae Budensis confectis et conficiendis in iudicio ecclesiastico et saeculari aut quovis regni iustitiario seu alias ubique perpetuis et successivis temporibus valere et vigorem habere eisque libere et licite uti, frui et gaudere atque fidem indubiam et plenariam adhiberi volumus et regia auctoritate declaramus praesentis scripti nostri patrocinio mediante. In cuius rei memoriam firmitatemque perpetuam praesentes literas nostras privilegiales pendentis et authentici duplicis sigilli nostri novi munimine roboratas eidem civitati ipsiusque civibus et communitati ac universitati duximus concedendas. Datum per manus reverendi in Christo patris domini Eberhardi eadem dei et apostolicae sedis gratia episcopi Zagrabiensis, aulae nostrae regiae summi cancellarii fidelis nostri dilecti, anno domini millesimo quadringentesimo quinto, sexto Nonas Julii, regni autem nostri anno decimo septimo.