Urkunde Nr. 1611 aus Band III

Seite im UB:

456-459 ^a)

Druckvorlage:

nach Einschaltung (Insert)

Abdruck als:

Volltext

Sprache:

Latein

---

1611

Thorenburg 1408 März 23 Jakob Lachk und Johann Henrici, Woiwoden von Siebenbürgen, ersuchen das Weissenburger Kapitel, bei der Einführung Peters, des Sohnes Johanns von Mediasch, in einen Besitzanteil von Puschendorf mitzuwirken.

Amicis suis reverendis capitulo ecclesiae Albensis Jacobus Lachk et Johannes Henrici de Thamasy vaivodae Transiluani et comites de Zolnuk amicitiam paratam cum honore. Noveritis quod in congregatione nostra generali universitati nobilium et alterius cuiusvis status et conditionis dictae partis Transsiluanae hominum feria quinta proxima post diem cinerum¹⁾ ex speciali regio literatorio mandato Tordae celebrata Petrus filius Johannis alias civis de Megyes de medio aliorum exsurgendo, praesente Andrea filio Nicolai de Herepe quasdam literas vestras privilegiales feria sexta proxima post festum inventionis sanctae crucis, anno domini millesimo trecentesimo nonagesimo secundo²⁾ confectas nostro iudiciario examini curavit exhibere declarantes, quod Gregorio filio Mychaelis nobile de Pochteleke ab una parte, ab alia vero Johanne filio Nicolai de Megyes pro se ac Jacobo fratre suo coram vobis personaliter constitutis confessum exstitisset per eundem Gregorium filium Mychaelis pariter et relatum, quod ipse quibusdam suis necessitatibus ipsum urgentibus totalem portionem suam in dicta possessione Postheleke cum cunctis eiusdem utilitatibus modo et ordine literis in eisdem specificatis pro mille florenis aureis praenotatis Johanni et Jacobo filiis Nicolai, per eos eorum heredibus iure perpetuo et irrevocabiliter tenendam sub expeditoria cautione similiter literis in eisdem declarata vendidisset. Quibusquidem literis exhibitis praefatus Petrus allegavit eo modo, quod unam particulam praedictae portionis eorum per praenominatos Johannem patrem et Jacobum fratrem patruelem suos modo [S. 457] praemisso emptam nobilis domina Katherina filia dicti Jacobi consors praedicti Andreae absque prolibus utriusque sexus iam defuncta eidem Andreae, prout in ipsa constitisset, iure perpetuo donasset et contulisset, quam nunc ipse Andreas minus iuste occupative conservaret, cuius occupationis ipse rationem scire vellet ab Andrea praenotato. Quo percepto, ut praescribitur, praefatus Andreas in nostri adhaerens praesentia respondit ex adverso, quod hoc bene foret, quod praefata nobilis domina Katherina vocata consors sua sponte et ex propria sua voluntate praetitulatam portionem possessionariam modo praemisso sibi donasset et contulisset, et ex eo ipse eandem portionem non indebite, immo iuste et iuridice possideret et conservaret, et super hoc literas haberet efficaces. Et ibidem in horum suorum verborum corroborationem et comprobationem quasdam literas Jacobi canonici vicariique venerabilis in Christo patris domini Stephani dei et aposlolicae sedis gratia episcopi dictae ecclesiae Transsiluanae praelati vestri in spiritualibus generalis adiudicatorias pariter et compositionales, Albae in octavis festi purificationis virginis gloriosae, anno domini millesimo quadringentesimo sexto¹⁾ privilegialiter subortas nostrum produxit iudiciarium in conspectum. In quibus inter cetera habebatur, quod Johannes Gereb filius praedicti Jacobi frater carnalis ante fatae nobilis dominae Katherinae quondam consortis ipsius Andreae per ordinativam dispositionem vestram et ceterorum proborum et nobilium virorum in causa coram ipso vicario in facto praedictae portionis possessionariae et ceterarum nonnullarum rerum mobilium et immobilium literis in eisdem specificatarum adversus eundem Andream mota et vertenti praetitulatam portionem possessionariam in dicta Pochteleke habitam²⁾ secundum continentiam³⁾ quarundam literarum privilegialium in dictis literis dicti domini vicarii sensualiter conscriptarum, super ipsa donatione dictae portionis possessionariae per eandem quondam dominam Katherinam ipsi Andreae marito suo facta emanatarum eidem Andreae filio Nicolai et suis heredibus iure perpetuo possidendam commisisset, immo ipse dominus Jacobus vicarius eandem portionem possessionariam vigoribus praetactarum literarum privilegialium per ipsum Andream coram ipso productarum ipsi Andreae adiudicando praefato Johanni perpetuum silentium imposuisset. Quibusquidem literis exhibitis ante fatus Petrus filius Johannis subiunxit in hunc modum, quod quamvis primo praenominata nobilis domina filia dicti Jacobi ipsam portionem possessionariam eidem Andreae nomine sui iuris modo praemisso legaverit, tamen requirente consuetudine huius regni semper et ab antiquo inviolabiliter observata iurium hereditariorum et emptionalium nobilitatis titulum concernentium possessorum successores demptis iuribus emptitionalibus per se ipsos acquisitis et emptis in praeiudicium suorum fratrum condivisionalium aliquibus advenis nullo⁴⁾ umquam tempore donare possent aut aliquo alio titulo a se alienare, sed semper huiusmodi iura mortuo uno [S. 458] in alium superviventem successive condescenderent et derivarentur, et in eo se ad veridicam attestationem iudicum nobilium iuratorum assessorum septem comitatuum praedictae nostrae congregationis committere praesto esset et paratus. Et quia praefatus Andreas filius Nicolai per nos legitime requisitus se in praemissis similiter ad attestationem eorundem iudicum nobilium iuratorum assessorum benigne committebat, pro eo cum nos ipsis partibus volentibus eosdem iudices nobilium, iuratos assessores clare et seriatim requisivissemus, mox et in instanti iidem iudices nobilium iuratique assessores ad fidem eorum deo debitam fidelitatemque domino nostro regi et suae sacrae coronae regiae conservandam pro dicenda veritate et iustitia observanda tacto dominicae crucis ligno nobis praestitam, maturo inter se deliberativo tractatu praehabito, id ut totius huius partis regnicolae huius libertatis praerogativa a consuetudine semper et ab antiquo approbata ac immutabiliter observata usi fuissent et gratulati, ut¹⁾ successores et superstites nullorum progenitorum²⁾ ipsorum et per consequens ipsi iura possessionaria per quemcumque vel per quoscumque emptionali vel alio quocumque titulo acquisita in suorum fratrum condivisionalium praeiudicium et dispendium donare possent³⁾ et legare, unanimi et concordi testificatione incunctanter affirmarunt. Quibus auditis partibusque praedictis eis in praemissis per nos iuris medelam praeberi precantibus, quamvis primo et principaliter praefata nobilis domina Katherina quondam consors dicti Andreae praetitulatam portionem possessionariam in dicta possessione Pochteleke habitam mediantibus dictis literis vestris privilegialibus in eisdem literis dicti domini Jacobi vicarii sensualiter insertis eidem Andreae inter alia bona sua donaverit et legaverit, et eandem idem dominus Jacobus vicarius nondum de huius regni consuetudine plene informatus vigoribus earundem literarum vestrarum perpetuo dicto Andreae ante fatis literis suis privilegialibus adiudicaverit, postremoque praetitulatus Johannes ante fatam donationem praedictae portionis possessionariae per ipsam sororem suam factam vestri in praesentia adstando perpetue corroboraverit, tamen quia sanctiente praedictae partis consuetudine praedicta nobilis domina memoratam portionem possessionariam in dicta Pochtelke habitam in praeiudicium iuris dicti Petri eidem Andreae marito suo donare et legare ac demum ipse dominus Jacobus vicarius eandem memorato Andreae adiudicare, ante fatus siquidem Johannes frater dictae nobilis dominae carnalis huiusmodi donationi possessionariae praemissam corroborationem minime de iure facere valuisse et potuisse ex praemissis omnibus clare reperiebantur, ob hoc ipsam portionem possessionariam in dicta possessione Pochthelke existentem, apud manus dicti Andreae habitam cum cunctis suis utilitatibus et pertinentiis quibuslibet rationibus ex praemissis memorato Petro filio Johannis, cum his quibus convenit, in perpetuum possidere, tenere et habere adiudicantes, et eandem modo subnotando eidem statui et relinqui committentes vestram amicitiam praesentibus petimus diligenter, quatenus vestrum mittatis hominem pro testimonio fide dignum, quo [S. 459] praesente Anthonius de Darlaz vel Symon et Nicolaus filii Sandor de Kyzd aut Jacobus de¹⁾ Sarus dictus de Balasthelke aliis absentibus homo noster ad faciem praedictae possessionis Pochteleke vocatae vicinis et commetaneis eiusdem universis inibi legitime convocatis et praesentibus accedendo, praetitulatam portionem possessionariam per praescriptam nobilem dominam Katherinam dicto Andreae de Herepe modo praemisso donatam memorato Petro filio Johannis de Megyes cum his quibus congruit statuat et committat perpetuo possidendam, contradictione praefati Andreae et aliorum quorumlibet praevia ratione non obstante. Et post haec ipsius possessionariae statutionis seriem ut fuerit expediens ad octavas festi beati Georgii martyris nunc venturi²⁾ nobis amicabiliter rescribatis. Datum vigesimo tertio die congregationis nostrae praedictae, anno domini millesimo quadringentesimo octavo.


a) Die Fußnoten wurden in diesem Band des UB jeweils seitenweise gezählt. Auf die vorliegende Urkunde entfallen: 1-2 auf S. 456, 1-4 auf S. 457, 1-3 auf S. 458, 1-2 auf S. 459 (dortige 3-5 zu nachfolgender Urkunde).^{^}
[S. 456]
1) März 1.^{^}
2) 1392 Mai 10.^{^}
[S. 457]
1) 1406 Februar 9.^{^}
2) Hierauf: et.^{^}
3) Vorlage: convenientiam.^{^}
4) Vorlage: ullo.^{^}
[S. 458]
1) Vorlage: et.^{^}
2) Vorlage: progeniorum.^{^}
3) Vorlage: posset.^{^}
[S. 459]
1) Fehlt in der Vorlage.^{^}
2) 1408 Mai 1.^{^}