Urkunde Nr. 1610 aus Band III

Seite im UB:

454-456

Heute in:

Budapest, Ungarisches Landesarchiv [Magyar Országos Levéltár]

Druckvorlage:

nach Einschaltung (Insert)

Abdruck als:

Volltext

Sprache:

Latein

---

1610

Thorenburg 1408 März 21 Jakob Lachk und Johann Herrici, Woiwoden von Siebenbürgen, bekräftigen die Einführung Margaretha's, der Gattin Benedikt Bichak's von Csikfalva, in einen Anteil der Besitzung Kleinalisch.

Nos Jacobus Lachk de Zantho et Johannes Herrici de Tamasi vaivodae Transsiluani et comites de Zolnuk memoriae commendantes tenore [S. 455] praesentium significamus quibus expedit universis, quod in congregatione nostra generali universitati nobilium et alterius cuiusvis status et conditionis partis Transsiluanae hominum feria quinta proxima post diem cinerum¹⁾ Tordae celebrata Benedictas dictus Bichak de Chykfalwa pro nobili domina Margaretha vocata filia Emerici filii Pauli de Madaras consorte scilicet sua cum procuratoriis literis Johannis de Doboka vicevaivodae nostri de medio aliorum exsurgendo proposuerat eo modo, quod quia ipsa nobilis domina Margaretha sibi uti homini impossessionato foret matrimonialiter copulata, ideo ius quartale eiusdem dominae Margarethae de possessione Kyszewles in comitatu de Kykellew existente cum possessione eidem deberet provenire, quod rehabere vellet a Stephano et Ladislao filiis eiusdem Emerici fratribus eiusdem dominae regni lege requirente. Quo percepto praefati Stephanus et Ladislaus filii dicti Emerici in nostri comparendo praesentiam responderant eo modo, quod hoc bene verum foret, ut ipsum ius quartale ratione praevia eidem dominae Margarethae deberet provenire, sed medietas quartae partis eiusdem possessionis Kyszewles eo, quod ipse Emericus pater ipsorum duas filias unam videlicet ipsam dominam Margaretham et aliam puellam Katherinam haberet et alia medietas eiusdem quartae partis eiusdem possessionis Kyszewles dictae puellae Katherinae deberet provenire. Et quia praefatus Benedictus huic allegationi iam dictorum Stephani et Ladislai non contradicebat, pro eo cum nos ad ipsius iuris quartalis statutionem faciendam una cum magistro Petro de Thethey regio ac Anthonio literato capituli ecclesiae Albensis Transsiluanae hominibus nostrum hominem videlicet Stephanum literatum ad praemissam statutionem faciendam de eadem congregatione nostra destinassemus, iidem exinde ad eandem nostram congregationem ad nos reversi nobis uniformiter retulerunt, quod ipsi feria quinta proxima ante dominicam Oculi quindecimo scilicet die dictae nostrae congregationis²⁾ ad faciem iam dictae possessionis Kyszewles et per consequens praetitulatae medietatis quartae partis eiusdem possessionis Kyszewles vicinis et commetaneis suis universis convocatis³⁾ et praesentibus accedendo eandem medietatem dictae quartae partis ipsius possessionis Kyszewles ipsi nobili dominae Margarethae et suis heredibus nullo contradictore apparente possidendam statuissent. Quorum quidem regii nostri et dicti capituli ecclesiae Transsiluanae hominum relatione facta et percepta nobisque seriem eiusdem possessionariae statutionis coram universitate nobilium et alterius cuiusvis status et conditionis hominum ipsius congregationis nostrae more consueto publice et manifeste proclamari et insinuari facientibus, quia sicut in facie dictae possessionis Kyszewles et per consequens annotatae medietatis quartae partis eiusdem tempore praemissae statutionis sic et nunc in dicta nostra congregatione ipsi statutioni memoratae nobili dominae Margarethae factae nullus contradicebat, pro eo nos iudicum nobilium iuratorumque assessorum ceterorumque nobilium congregationis nostrae praedictae nobiscum existentium quaesito et assumpto [S. 456] consilio praematuro memoratam possessionariam statutionem modo praemisso factam auctoritate nostra iudiciaria mediante roborando et ratificando praemissam medietatem quartae partis dictae possessionis Kyszewles memoratae nobili dominae relinquimus et committimus iure sibi incumbente in perpetuum possidendam, tenendam et habendam, salvo iure alieno. In cuius rei memoriam firmitatemque perpetuam praesentes literas nostras privilegiales pendentium autbenticorum sigillorum nostrorum munimine roboratas eidem dominae duximus concedendas, communi iustitia suadente. Datum vigesimo primo die congregationis nostrae praedictae, in loco memorato, anno domini millesimo quadringentesimo octavo.


1) März 1.^{^}
2) März 15.^{^}
3) Fehlt in der Vorlage.^{^}