Urkunde Nr. 1655 aus Band III

Seite im UB:

504

Heute in:

Hermannstadt, Staatsarchiv [Direcţia Judeţeană Sibiu a Arhivelor Naţionale ale Romȃniei]

Heutige Signatur:

Urkundensammlung [Colecţia de documente medievale], Serie U. II (Inventar 25), Nr. 10.

Druckvorlage:

nach Original

Abdruck als:

Volltext

Sprache:

Latein

---

1655

Kaschau 1411 April 14 König Sigmund erlässt zu Gunsten der Stadt Hermannstadt eine Verordnung, betreffend das Verbot gegen die Ausübung fremder Gerichtsbarkeit über die Hermannstädter und gegen die Pfändung ihrer Sachen und Waren, betreffend ferner die Anhängigmachung von Klagen vor dem Rat von Hermannstadt.

Sigismundus dei gratia Romanorum rex semper augustus ac Hungariae et cetera rex fidelibus nostris universis praelatis, baronibus, comitibus, castellanis, nobilibus ipsorumque officialibus et tributariis item civitatibus et liberis villis ipsarumque rectoribus iudicibus et villicis praesentes visuris salutem et gratiam. Gravi ex querela fidelium nostrorum universorum civium et hospitum civitatis nostrae Cybyniensis terrae nostrae Transsiluanae sitae¹⁾ nostrae detegitur maiestati, quod cum ipsos seu alterum eorum pro acquirendis victuum suorum necessariis regni nostri climata perlustrare contingeret, quod tunc nonnulli vestri in medio forent homines, qui ipsos seu alterum eorum pro debitis seu offensis aliorum niterentur impedire. Cum vero iusti pro iniustis et innoxii pro reorum excessibus puniri non debeant nec aggravari, igitur vestrae fidelitati firmissime praecipiendo mandamus, quatenus dum, quando et quotiescumque praefatos cives et hospites civitatis Cybyniensis seu alterum eorum cum rebus suis mercimonialibus pro acquirendis victuum suorum necessariis regni nostri climata perlustrantes ad tenutas, honores, possessiones, districtus, officiolatus seu alia quaecumque vestrarum iurisdictionum loca pervenire contigerit, ex tunc eosdem ad nullius instantiam in personis iudicare seu ad vestro astandum indicatui compellere necnon ipsorum res et bona arestare seu prohiberi facere nullatenus praesumatis nec sitis ausi modo aliquali et signanter pro debitis, excessibus vel offensis aliorum. Si qui enim quidquam actionis seu quaestionis contra praefatos cives et hospites de civitate Cybiniensi habent seu se habere praetendunt, hi id coram iudice et iuratis civibus civitatis eiusdem legitime prosequantur, qui uni cuique querulanti ex parte ipsorum concivium omnimodam satisfactionem ac meri iuris et iustitiae complementum impendere et exhibere tenebuntur, prout dictaverit ordo iuris. Et aliud facere non ausuri. Praesentes etiam sigillo nostro solito secreto fecimus communiri, quas post lecturam semper reddi volumus praesentanti. Datum Cassouiae, feria tertia proxima post festum Paschae domini, anno eiusdem millesimo quadringentesimo undecimo. [S. 505]


1) Scilicet: in terra nostra Transsiluana sitae.^{^}