Urkunde Nr. 1658 aus Band III

Seite im UB:

507-509 ^a)

Heute in:

Hermannstadt, Staatsarchiv [Direcţia Judeţeană Sibiu a Arhivelor Naţionale ale Romȃniei]

Druckvorlage:

nach Einschaltung (Insert)

Abdruck als:

Volltext

Sprache:

Latein

---

1658

1411 Juni 2 König Sigmund bekräftigt für die Marktgemeinde Winz und Burgberg die Urkunde des Königs Sigmund von 1393 Nr. »1308, betreffend die Befreiung der genannten Marktgemeinde von der Machtbefugnis und Gerichtsbarkeit des Woiwoden, betreffend ferner ihre Vereinigung mit den sieben Stühlen, das Recht zur Wahl und Absetzung des Richters, die nicht mehr zur Einhebung gelangende Maut für die Maroschbrücke und die an den König zu entrichtende Abgabe von 35 Mark Silber.

Sigismundus¹⁾ dei gratia Hungariae, Dalmatiae, Croatiae, Ramae, Seruiae, Gallitiae, Lodomeriae, Cumaniae Bulgariaeque rex, marchio Brandemburgensis, sacri Romani imperii archicamerarius necnon Boemiae et Lucemburgensis heres omnibus Christi fidelibus tam praesentibus quam futuris praesens scriptum inspecturis salutem in omnium salvatore. Circumspecta regiae dignitatis animadversio, cuius proprium est in multitudine populorum gloriari, solet suis subditis illa semper gratiose concedere, ex quibus eorum augetur numerus, et opum ubertate profluentes ad fidei ferventioris zelum excitantur. Proinde ad universorum tam praesentium quam futurorum notitiam harum serie volumus pervenire, quod fidelis noster vir providus magister Michael literatus civis et inhabitator oppidi nostri Alsowyncz vocati sua necnon universorum civium populorumque et incolarum in eadem Alsowyncz et Borpergh residentium in personis nostrae claritatis veniens in conspectum exhibuit nobis quasdam literas nostras patentes priori minori secreto alias ex causis et rationibus legitimis per nos confracto et permactato sigillo nostro consignatas, quibus mediantibus ipsum oppidum nostrum regale Alsowyncz et Borpergh appellatum, in partibus nostris Transsiluanensibus habitum, ex utraque parte Morusii situm eiusdemque oppidi incolas a potestate seu iurisdictione vaivodarum earundem partium ipsorumque officialium pro tempore constitutorum eximendo ad instar aliarum civitatum septem sedibus nostris Saxonicalibus subiectarum modo et ordine infra scriptis libertasse dignoscimur, [S. 508] tenoris infra scripti. Supplicans exinde idem magister Michael literatus sua et in personis quibus supra maiestati nostrae humiliter et devote, ut easdem literas nostras ratas, gratas et acceptas habendo nostrisque literis privilegialibus verbotenus inseri faciendo pro ipsis civibus et populis nostris eorumque heredibus et posteritatibus universis innovando perpetuo valituras dignaremur confirmare. Quarum tenor talis est. (Folgt die Urkunde des Königs Sigmund von 1393 Nr. »1308.) Nos¹⁾ igitur humillimis et devotis praefati magistri Michaelis supplicationibus ante fatis per eum suo et nominibus quibus supra nostrae subiective oblatis maiestati regia benignitate exauditis et clementer admissis praefatas literas nostras patentes non abrasas, non cancellatas nec in aliqua earum parte suspectas sed omni prorsus suspicionis vitio carentes, immo merae et sincerae veritatis integritate praepollentes praesentibusque de verbo ad verbum sine diminutione et augmento aliquali insertas quoad omnes earum continentias, clusulas et articulos acceptamus, approbamus et ratificamus, eas nihilominus requirentibus fidelitatibus et fidelibus obsequiis praefatorum civium hospitum et incolarum nostrorum de Alsowyncz et Borpergh per eos nobis et sacro nostro regio diademati locis et temporibus opportunis constanter exhibitis et impensis simul cum praemissa exemptione et libertatione aliisque omnibus et singulis superius in earundem literarum tenore limpidius explicatis mera auctoritate regia et potestatis plenitudine ac ex certa scientia nostrae maiestatis de consensu serenissimae principis dominae Barbarae reginae consortis nostrae carissimae, praelatorum etiam et baronum nostrorum consilio praematuro ac uniformi decreto eorundem, non obstante decreto per nos una cum praelatis et baronibus ac potioribus regni nostri proceribus alias super exhibendis inter cetera literis nostris signanter praenarrato sigillo nostro priori ut praedicitur permactato munitis²⁾ et consignatis usque certum tempus in ipso decreto expressum et iam elapsum edito dictarumque literarum nostrarum patentium ex tunc non exhibitione elapso tempore³⁾ huiusmodi, in earum vigore plene relinquendo pro praefatis civibus hospitibus et incolis nostris de Alsowyncz et Borpergh ipsorumque heredibus et posteritatibus universis innovantes perpetuo valituras confirmamus praesentis scripti nostri patrocinio mediante. In cuius rei memoriam firmitatemque perpetuam praesentes concessimus literas nostras privilegiales pendentis et authentici sigilli nostri novi duplicis munimine roboratas. Datum per manus reverendi in Christo patris domini Eberhardi episcopi Zagrabiensis, aulae nostrae summi cancellarii fidelis nostri dilecti, anno domini millesimo quadringentesimo undecimo, quarto Nonas Junii, regni autem nostri anno vigesimo tertio. Venerabilibus in Christo patribus Joanne Strigoniensi, Andrea Spalatensi, altero Andrea Ragusiensi archiepiscopis, Colocensi et Jadrensi sedibus vacantibus, eodem domino Eberhardo Zagrabiensi, Andrea Varadiensi, Stephano Transsiluano, Stiborio Agriensi, Joanne Quinqueecclesiensi, Benedicto confirmato Boznensi electis, Joanne Jauriensi, Philippo [S. 509] Vaciensi, Dosa Chanadiensi, Hincone Nittriensi, Ladislao Tininiensi et Thoma Seniensi ecclesiarum episcopis ecclesias dei feliciter gubernantibus, Vesprimiensi, Sirmiensi, Traguriensi, Sibinicensi, Nonensi, Scardonensi, Makarensi, Pharensi et Corbauiensi sedibus vacantibus. Necnon magnificis viris Nicolao de Gara regni Hungariae praedicti palatino, Stiborio de Styborych vaivoda nostro Transsiluano, comite Simone de Rozgon iudice curiae nostrae, comite Karulo de Korbauia Dalmatiae et Croatiae regnorum praedictorom, Ladislao et Emerico filiis quondam Bartholomei de Wylak Machouiensi banis, totius Sclauoniae et Zewriniensis banatuum honoribus vacantibus, Joanne Bubek de Pelseucz tavernicorum, Joanne filio Henrici de Thamassy ianitorum, Joanne Groff de dicta Corbauia dapiferorum, Joanne filio Gregorii de Alsan pincernarum, Petro Cheh agasonum nostrorum magistris et Christophoro comite nostro Posoniensi aliisque quampluribus regni nostri comitatus tenentibus et honores.


a) Die Fußnoten wurden in diesem Band des UB jeweils seitenweise gezählt. Auf die vorliegende Urkunde entfallen: 1 auf S. 507, 1-3 auf S. 508.^{^}
[S. 507]
1) Kleine verlängerte Schrift.^{^}
[S. 508]
1) Kleine verlängerte Schrift.^{^}
2) Vorlage: minutis.^{^}
3) Vorlage: elapsi temporis.^{^}