Urkunde Nr. 1739 aus Band III

Seite im UB:

608-610 ^a)

Heute in:

Hermannstadt, Staatsarchiv [Direcţia Judeţeană Sibiu a Arhivelor Naţionale ale Romȃniei]

Heutige Signatur:

Bischofsurkunden [Colecţia de documente episcopale] (Inventar 1), B. U. Nr. 11.

Druckvorlage:

nach Original

Abdruck als:

Volltext

Sprache:

Latein

---

1739

Hermannstadt 1414 Juli 3 Die Notare Stephan Rasteter und Stephan Nicolai bezeugen, dass der siebenbürgische Bischof Stephan vor den päpstlichen Stuhl vorgeladen worden ist.

In nomine domini amen. Noverint universi praesens publicum instrumentum inspecturi, quod in mei notarii publici et testium infra scriptorum praesentia personaliter constituti honorabiles et discreti viri domini Nicolaus rector parochialis ecclesiae omnium sanctorum de villa Dominarum et Dauid plebanus sancti Petri de Haschadia procuratores legitimi venerabilium virorum in infra scripta citatione nominatorum et descriptorum quandam literam citatoriam cum certo sigillo oblongo pendenti,¹⁾ quam in suis tenebat²⁾ manibus cuiusque tenor sic incipit, universis et singulis Christi fidelibus et praesertim Vngariae nationis Conradus Conhouer utriusque iuris doctor canonicus Eystetensis, domini nostri papae capellanus ipsiusque sacri palatii causarum et causae ac partibus infra scriptis ab eodem domino nostro papa auditor specialiter deputatus et cetera, et sic finit, datum et actum Bononiae in domo habitationis nostrae, sub anno domini millesimo quadringentesimo quarto decimo, indictione septima, die vero Sabbati tertia decima mensis Januarii,³⁾ pontificatus sanctissimi in Christo patris et domini nostri domini Johannis divina providentia papae vicesimi tertii praedicti anno quarto. Praesentibus ibidem honorabilibus et discretis viris magistris Johanne Chyrichkoff literarum apostolicarum abreviatore et Petro Rendel notario publico scribaque nostro clericis⁴⁾ Patauiensis diocesis testibus ad praemissa vocatis specialiter et rogatis. Subscriptio notarii in eadem citatione sic incipit videlicet, et ego Johannes Thomae de Creyuelt clericus Coloniensis diocesis publicus apostolica et imperiali auctoritate notarius ac venerabilis et circumspecti viri domini Conradi Conhouer auditoris praefati et causae huiusmodi coram eo scriba praedictis citationi et inhibitioni, petitioni et decreto omnibusque aliis et singulis praemissis una cum testibus ante dictis praesens fui, hoc praesens publicum instrumentum per alium fideliter scriptum exinde in hanc formam redegi signoque quo utor apostolica auctoritate et nomine meis solitis una cum eiusdem domini Friderici Deys auditoris sigilli appen- [S. 609] sione corroboravi rogatus et requisitus in fidem et testimonium omnium et singulorum praemissorum. Quam citationis literam praefati procuratores hora primarum vel quasi cum duobus clavis ferreis affixerunt in valvis sive portis ecclesiae parochialis beatae Mariae virginis Cybiniensis Strigoniensis diocesis et ibidem affixam et extensam dimiserunt usque ad horam tertiarum et donec missarum sollennia fuerunt celebrata. Quam citationem multae personae legerunt et transacta dicta hora tertiarum et finitis missis idem dominus Nicolaus et dominus Dauid procuratores supra dicti dictam literam citatoriam de dictis portis dictae ecclesiae removerunt ipsumque dominum Stephan um episcopum Albensem publice et expresse citaverunt, ut ipse octuagesima die a die citationis sibi facta¹⁾ coram dicto domino auditore vel suo surrogato seu surrogando per se vel per alium procuratorem legitimum Bononiae vel alibi, ubi tunc forsan dictus dominus noster papa cum sua curia residebit, in palatio apostolico, ubi²⁾ iura redduntur, mane hora causarum legitime compareat³⁾ praefatis dominis aut eorum⁴⁾ procuratori legitimo de et super omnibus et singulis in dicta commissionis et citationis litera expressis de iustitia responsurus et ad omnes actus gradatim et successive usque ad definitivam sententiam inclusive processurus, prout dictaverit ordo debitae rationis. Et de praedictis omnibus et singulis videlicet affixione, dimissione et amotione rogaverunt me notarium publicum infra scriptum, ut ipsis conficerem unum vel plura publicum seu publica instrumenta. Acta sunt haec Cybinii iuxta et ante portas dictae ecclesiae parochialis, sub anno nativitatis domini millesimo quadringentesimo quarto decimo, indictione septima, die vero tertia mensis Julii, pontificatus sanctissimi in Christo patris et domini nostri domini Johannis divina providentia papae vicesimi tertii anno quarto.⁵⁾ Praesentibus honorabilibus et religiosis viris fratre Michaele⁶⁾ crucifero ordinis sancti spiritus et magistro hospitalis Cybiniensis, fratre Clemente de Quotwicz ordinis eiusdem, domino Georgio plebano de Hvmelstarff et domino Osbaldo presbytero de Cybinio testibus fide dignis Strigoniensis diocesis ad praemissa vocatis specialiter et rogatis.

Notarzeichen mit der Inschrift: Stephanus Rasteter.
Et ego Stephanus Johannis dicti Rasteter de Noua civitate clericus Salczburgensis diocesis sacra imperiali auctoritate notarius publicus, quia praedictarum literarum citatoriarum in portis affixioni, dimissioni et amotioni ac aliis omnibus et singulis supra scriptis, dum sic fierent et agerentur, una cum praenominatis testibus praesens interfui eaque omnia et singula sic fieri vidi et audivi, ideo in hanc publicam formam manu propria redegi meisque signo et nomine [S. 610] solitis et consuetis consignavi rogatus et requisitus in fidem et testimonium omnium praemissorum.

Notarzeichen mit der Inschrift: Stephanus.
Et ego Stephanus Nicolai de Olomucz clericus eiusdem diocesis publicus auctoritate sacri imperii notarius approbatus, quia praedictarum literarum citatoriarum lectioni et in portis affixioni, dimissioni et amotioni ac aliis omnibus et singulis praemissis, dum sic ut praemittitur fierent et agerentur, una cum supra scripto notario publico et testibus praenominatis etiam praesens interfui eaque omnia et singula s[ic]¹⁾ fieri vidi et audivi, sed me aliis certis et arduis negotiis praepeditum per dictum notarium publicum conscribi et in publicam formam redigi procuravi, hic me manu propria subscripsi meisque signo et nomine solitis et consuetis ad maiorem evidentiam signavi rogatus personaliter et requisitus in fidem et evidens testimonium omnium et singulorum praemissorum.

Auf der Rückseite, von gleichzeitiger Hand: Recognitio citationis facta in Cibinio.


a) Die Fußnoten wurden in diesem Band des UB jeweils seitenweise gezählt. Auf die vorliegende Urkunde entfallen: 1-4 auf S. 608, 1-6 auf S. 609, 1 auf S. 610.^{^}
b) Die Unterfertigungen der beiden Notare im UB jeweils in nach rechts eingerückten Textblöcken.^{^}
[S. 608]
1) Satzbau unvollständig.^{^}
2) So Vorlage.^{^}
3) 1414 Januar 13.^{^}
4) Vorlage: cleric.^{^}
[S. 609]
1) September 20.^{^}
2) Vorlage: vero.^{^}
3) Vorlage: conpareat, Unterlänge von p horizontal durchstrichen.^{^}
4) Vorlage: eius.^{^}
5) Richtig: quinto.^{^}
6) Vorlage: Michaelo.^{^}
[S. 610]
1) ic rasiert.^{^}