Urkunde Nr. 1771 A aus Band III

Seite im UB:

657-658

Heute in:

Budapest, Ungarisches Landesarchiv [Magyar Országos Levéltár]

Heutige Signatur:

DL (Diplomatikai Léveltár) 73950 - Familienarchiv Teleki zu Neumarkt (Családi levéltárak, Teleki család, marosvásárhelyi) Nr. 452 [erstes der beiden Originale unter dieser Signatur]

Druckvorlage:

nach Original

Abdruck als:

Volltext

Sprache:

Latein

---

1771 A

Konstanz 1415 Mai 26 König Sigmund beauftragt den Woiwoden von Siebenbürgen und Genossen mit der Untersuchung der in Scharberg für die Reisenden und Kaufleute bestehenden Abgabenverpflichtung beziehungsweise mit der Geltendmachung dieser Verpflichtung gegenüber den Szeklern und Sachsen.

Von der Kanzlei: Commissio propria domini regis.

Sigismundus dei gratia Romanorum rex semper augustus ac Hungariae et cetera rex fidelibus nostris magnificis . . vaivodae partium nostrarum Transsiluanarum et comiti Siculorum nostrorum vel eorum vices gerentibus praesentibus et futuris praesentes visuris salutem et gratiam. Querulose detexit nobis fidelis noster dilectus Anthonius filius Nicolai de Somkerek sua et Petri filii Johannis filii eiusdem Nicolai carnalis fratris sui in personis, quomodo nonnulli forent mercatores et alterius status homines signanter Siculi et Saxones, qui quadam praesumptuositate involuti tributariam solutionem in loco tributi ipsorum in possessione eorum Sarumberek vocata exigi consueti per eosdem persolvendam ipsis et tributariis ipsorum more alias consueto reddere et persolvere recusantes inventis pro se ipsis quibusdam viis sinistris seu falsis et aliis frivolis occasionibus fictis insoluto tributo hinc et hinc pertransirent in praeiudicium ipsorum et damnum satis grande. Et quia nos praescriptam possessionem Sarumberek in comitatu de Torda habitam simul cum tributo et cunctis aliis suis pertinentiis et utilitatibus, quibus ipsa per nostram maiestatem et consequenter nomine nostro regio rite tenta fuit et possessa, praefatis Anthonio et quondam Johanni fratri suo ipsorumque heredibus vigore aliarum literarum nostrarum desuper confectarum contulisse dignoscimur, via etiam cuiuslibet tributi si regale fuerit ad unum, si vero nobilis exsisterit ad medium milliaria ex utraque parte pro sua meta secundum communem consuetudinem extendi debere censetur, nolentes igitur praefatos Anthonium et Petrum eorum iuribus per quempiam indebite frustrari, fidelitati vestrae firmiter praecipiendo mandamus, quatenus dum et quamprimum per praefatum Anthonium aut Petrum seu hominem ipsorum ad id fueritis requisiti, ex tunc missis ad id certis probis et fide dignis nobilibus dicti comitatus hominibus de et super eo, quomodo et qualiter ac qua limitatione praemissa tributaria solutio seu oxactio praescripta possessione Sarumberek simul cum ipso tributo erga manus nostras regias existente rationabiliter soluta et exacta fuerit et usque quo metae seu viae eiusdem extensae fuerint seu extendi debuerint, meram, indubitatam et sufficientem experiendo [S. 658] certitudinem, quemadmodum vobis exinde sic ut praefertur sufficienter constiterit certitudo veritatis, omnes et singulos viatores et mercatores signanter Siculos et Saxones ad solutionem tributariam praemissam rite astrictos ad solvendam et reddendam praedictis Anthonio et Petro vel eorum tributariis huiusmodi tributariam solutionem rationabiliter ut praefertur exigendam more et consuetudine, quibus supra soluta et exacta fuit debuitque atque debeat, astringere et compellere debeatis, repugnantes et eandem solvere contendentes per eorum damna et gravamina opportuna artius compellendo ipsisque Anthonio et Petro vel tributariis ipsorum dum et quotiescumque opus fuerit vestris auxiliis et subsidiis assistendo. Commisimus etenim praefato Anthonio et consequenter praedicto Petro vel tributariis ipsorum et harum serie annuimus, ut ipsi saepe dictam tributariam solutionem in viis dicti tributi ad id aptis et pertinentibus ab omnibus quibus decuerit more alias rationabiliter sicut praefertur consueto exigendi et extorquendi tutam, liberam et omnimodam habeant facultatem praesentibus eis attributam. Secus non facturi. Praesentes etiam perlectas semper reddi iubemus praesentanti. Datum Constanciae, octavo die festi Penthecostes, anno domini Mo quadringentesimo quinto decimo, regnorum nostrorum Hungariae et cetera anno vicesimo nono, Romanorum electionis quinto, coronationis vero primo.