Urkunde Nr. 3985 aus Band VII

Seite im UB:

5

Heute in:

Klausenburg, Staatsarchiv [Direcţia Judeţeană Cluj a Arhivele Naţionale ale Romȃniei]

Heutige Signatur:

Archiv der Stadt Desch [Primăria Oraşului Déj], Urkunden Nr. 54.

Druckvorlage:

nach Einschaltung (Insert)

Abdruck als:

Volltext

Sprache:

Latein

---

3985

Bartfeld 1474 Februar 25 König Matthias befreit die Einwohner des Marktes Desch von allen ausserordentlichen Abgaben und der Generalkontribution.

Nos Mathias¹⁾ dei gratia rex Hungariae, Bohemiae et cetera memoriae commendamus tenore praesentium significantes quibus expedit universis, quod nos tum ad intercessionem fidelis nostri venerabilis Dominici, praepositi sancti Nicolai de Alba, administratoris proventuum nostrorum regalium in partibus regni nostri Transsiluanis, pro parte fidelium nostrorum prudentum et circumspectorum civium et incolarum oppidi nostri Dees factam, tum vero consideratis fidelitate et fidelibus servitiis eorundem, quibus maiestati nostrae cum omni sedulitate hactenus gratos reddere studuerunt et acceptos, et praesertim, ut deinceps quoque ad fidelitatem solitam et ad servitia nostra tanto magis solliciti esse studeant et solertes, quanto nostram eis gratiam noverint praefuisse, praecipue autem quia ex relata et commendatione praenotati Dominici praepositi intelleximus, studium et diligentiam eorum ac obsequia nostra eosdem ab omni extraordinaria et contributione generali, quae in partibus Transsiluanis maiestati nostrae exigi solet, in perpetuum eximendos esse, duximus et supportandos, imo eximimus et supportamus per praesentes. Quocirca vobis memorato Dominico praeposito et cetera administratori proventuum nostrorum in partibus constituto, cunctis etiam aliis administratoribus eorundem Transsiluanis proventuum pro tempore constituendis, necnon dicatoribus et exactoribus taxarum extraordinariarum et contributionum generalium in partibus Transsiluanis nunc constitutis et in futurum constituendis harum serie firmiter praecipimus et mandamus, quatenus praefatos cives et incolas oppidi nostri Dees contra formam praemissae nostrae gratiosae exemptionis a modo in antea dicare vel ad exactionem taxarum extraordinariarum et contributionum generalium artare quovismodo et compellere vel eosdem occasione praemissorum in rebus et bonis impedire et molestare nusquam et nullatenus praesumatis. Secus non facturi. Praesentibus perlectis exhibenti restitutis. Datum in civitate nostra Barthfa feria sexta proxima post festum beati Mathiae apostoli, anno domini millesimo quadrigentesimo septuagesimo quarto, regnorum nostrorum Hungariae et cetera anno decimo septimo, Bohemiae vero quinto.


1) Kleine verlängerte Schrift.^{^}