Urkunde Nr. 4007 aus Band VII

Seite im UB:

19-20

Heute in:

Hermannstadt, Staatsarchiv [Direcţia Judeţeană Sibiu a Arhivelor Naţionale ale Romȃniei]

Druckvorlage:

nach Manuskript 19. Jahrhundert

Abdruck als:

Volltext

Sprache:

Latein

---

4007

Ofen 1474 Juli 22 König Matthias verbietet allen Besitzinhabern Siebenbürgens, Untertanen, die ihren Grundzins entrichtet haben und schuldenfrei sind, an der Übersiedlung in die Stadt Broos zu hindern.

Mathias dei gratia rex Hungariae, Bohemiae et cetera fidelibus nostris universis et singulis nobilibus et alterius cuiuscumque status possessionatis hominibus, item civitatibus, oppidis ac liberis villis ipsorum rectoribus ac iudicibus et villicis in partibus nostris Transsilvanis et alibi ubivis constitutis et existentibus praesentes visuris salutem et gratiam. Exponitur nobis in personis fidelium nostrorum iudicis, iuratorum ceterorumque civium [S. 20] et hospitum oppidi nostri Zazvaros per modum gravis querelae, quod nonnulli forent ex vobis, qui suos iobbagiones de eorum possessionibus habita licentia iustoque terragio deposito et aliis eorum debitis persolutis ad ipsum oppidum nostrum Zazvaros et eius pertinentias cum eorum rebus et bonis libere recedere et abire non permitterent, immo eosdem nimis impedirent et res et bona eorum aufferent; nonnullos etiam ex ipsis dum per medium ipsorum bonorum in libera via proficiscerentur simulcum rebus ac bonis eorum detinerent et in bonis eorum descendere cogerent et locare, in praeiudicium ipsorum exponentium et damnum valde magnum. Et quia iuxta consuetudinem regni nostri quilibet iobbagio et iobbagionalis conditionis homo quam de nostris quam aliorum quorumvis bonis et possessionibus habita licentia et iusto terragio deposito aliisque debitis persolutis ad quorumcumque possessiones se transferre voluerit moraturus liberam recedendi habet facultatem rebus, personis, bonis suis per omnia semper salvis remanentibus. Fidelitati igitur universitatis vestrae et cuiuslibet vestrum harum serie strictissime committimus et mandamus, quatenus habita praesentium notitia omnes tales vestros iobbagiones, qui ut praefertur licentia et depositis terragiis iustis et aliis debitis legitime persolutis de eorum possessionibus et bonis ac vestri e medio ad praefatum oppidum nostrum Zazvaros ac eius pertinentias se transferre voluerint moraturi simul cum omnibus rebus et bonis eorum libere recedere et abire permittatis, contradictione et difficultate sine omni. Alioquin commisimus et serie praesentium strictus committimus fidelibus nostris magnificis vaivodis nostris Transsilvanis et eorum vicevaivodis ac comitibus Siculorum, ut ipsi mera certitudinis veritate vos et quemlibet vestrum ad praemissa efficaciter facienda per omnia gravamina vestra in talibus fieri solita arctius compellant et adstringant auctoritate nostra praesentibus ipsis in hac parte attributa et iustitia mediante. Secus ergo non facturi. Praesentibus perlectis exhibenti restitutis. Datum Budae in festo beatae Mariae Magdalenae, anno domini quadringentesimo septuagesimo quarto, regnorum autem nostrorum anno Hungariae et cetera decimo septimo, Bohemiae vero sexto.