Urkunde Nr. 4324 aus Band VII

Seite im UB:

221-222

Heute in:

Budapest, Ungarisches Landesarchiv [Magyar Országos Levéltár]

Heutige Signatur:

DL (Diplomatikai Léveltár) Nr. 36 405, pag. 64-67.

Druckvorlage:

nach Einschaltung (Insert)

Abdruck als:

Volltext

Sprache:

Latein

---

4324

1479 Dezember 13 Richter und Rat von Klausenburg verleihen der dortigen Kürschnerzunft Satzungen.

Nos Nicolaus Petri Matthiae iudex universique protoconsules et iurati cives civitatis Colosvariensis, ad universorum notitiam tam praesentium quam futurorum harum serie cupimus pervenire, quod circumspecti et honesti viri Joannes Kim, Cristannus Pellifex, Casper Holczer et Joannes Fegendorffer in suis ac universorum magistrorum pellipariorum seu artis pellificum personis nobis detexerunt gravibus cum quaerelis, quod hospites de aliis districtibus, comitatibus, civitatibus et villis in medium nostri venientes totum profectum et utilitatem in emptione pellium cuiuslibet generis animalium, de quibus iidem pellifices nostri sua victualia deberent habere et nutrimenta et sacrae regiae coronae exactionales solvere contributiones poenitus tollerent ipsis in annullationem et derogamen satis grande. Cum tamen in aliis civitatibus regalibus cives in eisdem incolarum et residentiam habentes prae hospitibus extraneis specialibus gauderent praerogativis, de quibus eaedem civitates efficacem percepissent et continuatam participarent meliorationem. Et quia expediens et ratione censetur fore dignum ut cives seu homines quarumlibet civitatum in loco suae residentiae prae aliis extraneis hospitibus de eadem loca accessum suum dirigentibus, speciali praerogativa uti frui debeant et gaudere. Nos igitur praedictis pellificibus nostris concivibus super ipsorum defectibus praemissis de remedio cupientes providere opportuno, ut ipsi sua victualia copiosius habentes praedicta Colosvar profectuum uberitate munita maius percipiant incrementum et exinde uberiores servitiorum et bonorum fructus regiae provenient maiestati et signanter ea ratione non obmissa: quod ex quo praefati magistri turrim in platea Rapularum sitam [S. 222] per eorum solicitudines cum armis bellicis, defendiculis, ballistis, bombardis necnon aliorum armorum ingeniis diligentius appositis partim eorum expensis et laboribus munendo et fulciendo decorarunt. Nos igitur his permoti rationibus in medio nostri universitatis tales pro ipsis magistris facimus seu ordinavimus constitutionis ex certa nostra scientia infrascriptos: item nullus magistrorum pellificiim extra czeham et fraternitatem laborare debeat; item nullus nostrorum concivium seu aliorum extraneorum in medium nostri accidentium pelles ovium ac agnorum sive aliorum animalium domesticorum, silvestrium, campestrium ac cuiuslibet generis ferarum ad ipsos pellifices pertinentium necnon alias pelles vulgo Storling numero centenario minus emendae debeat habere facultatem; item quicumque magistrorum cum alieno magistro extra czeham existente labores artis pellificum laborat talis suo magisterio sit privatus eo facto: quicumque magistrorum iuvenem causa informationis acceptaverit talis iuvenis ad czeham florenum unum dare teneatur, quicumque magistrorum alieno forensi aut concivi nostro extra czecham existenti pelles quascumque praedictos in suo proprie operiario laborare faciat aut permittat, talis magisterio suo sit privatus eo facto, necnon iudicis pro tempore constituto in decem marcis sit convictus, quicumque ad czecham et fraternitatem ingredi voluerit et ad hanc sufficiens idoneus fuerit, ille pro czecha sex florenos dare debeat, necnon litteras famatoriales de suis parentibus exhibere teneatur; quilibet filius magistrorum sit absolutus a contributione czechae. Quicumque filius magistrorum filiam alicuius magistri illius artis matrimonialiter sibi in uxorem duxerit, talis etiam ab onere solutionis et contributionis sit exemptus et supportatus: quicumque relictam alicuius magistri in uxorem matrimonialiter, talis a contributione mediae czechae sit exemptus et supportatus. Omnes relictae postobitum suorum dominorum et maritorum per integrum annum illud artificium laborare et exercere et non ultra habeat potestatis facultatem. Volentes igitur praedictas constitutiones ordinationes perpetue et irrevocabiliter fore valituras ea tamen interposita conditione, quod praefati pelliparii seu pellifices nostri concives inter se in communitate et fraternitate ipsorum nullas constitutiones communi bono contraria facere seu ordinare debeant; si qui vero contra praemissas ordinationes sive constitutiones nostras facere praesumendo attemptarent, eosdem iudici nostro pro tempore constituto iuxta nostram deliberationem relinquimus puniendos. Et ut praemissa et quorumvis praemissorum singula perpetue et irrevocabiliter permaneant et perdurent praenotatis nostris concivibus pellipariis in huius rei memoriam firmitatemque perpetuam praesentes litteras nostras privilegiales nostri maioris et authentici sigilli appensione munitas duximus concedendos. Datum in die beatae Luciae virginis et martyris, anno domini millesimo quadringentesimo septuagesimo nono.