Urkunde Nr. 4448 aus Band VII

Seite im UB:

297-298

Druckvorlage:

nach anderem Urkundenbuch mit Quellennachweis

Abdruck als:

Volltext

Sprache:

Latein

---

4448

Weissenburg 1481 November 17 Bischof Ladislaus Gereb von Weissenburg bestätigt die von seinem Vorgänger Gabriel und vom Weissenburger Vikar Thomas getroffenen Verfügungen betreffend Furkeschdorf.

Nos Ladislaus Gereb dei et apostolicae sedis gratia electus et confirmatus ecclesiae Albensis Transsilvanae memoriae commendamus significantes tenore praesentium quibus expedit universis, quod honorabilis dominus Johannes, canonicus ecclesiae nostrae praefatae ac plebanus parochialis ecclesiae de Mwsna, nostram veniens in praesentiam personaliter exhibuit nobis quasdam literas honorabilis quondam Thomae, artium et secretorum doctoris, canonici dictae ecclesiae Albensis ac reverendissimi in Christo patris et domini domini Gabrielis dei et apostolicae sedis gratia episcopi eiusdem ecclesiae Albensis praedecessoris¹⁾ nostri cancllariique regiae maiestatis ac dictae sedis in regnis Hungariae, Bohemiae et cetera inque locis et terris temporali dominio eiusdem regiae maiestatis subiectis cum potestate legati de latere legati, vicarii in spiritualibus et causarum auditoris generalis, in quibus clare vidimus contineri, quomodo alias discretus Andreas, plebanus ecclesiae parochialis sancti Nicolai confessoris de Farkasthelke nostrae praefatae Albensis dioecesis de communi consensu et unanimi voluntate parochianorum suorum propter metum quorundam cismaticorum in vicinitatu dictae possessionis Farkasthelke continuis spoliationibus et devastationibns insistentium, se cum universis rebus et bonis dictae suae ecclesiae de consensu praefati domini Thomae vicarii ad praefatum Mwsna moraturum transtulisset et easdem res altari beati Nicolai confessoris in ecclesia parochiali de eadem Mwsna fundato, sub conditione in dictis literis praefati Thomae vicarii contenta applicuisset, donec dictam possessionem Farkasthelke populosiorem effici contigisset. Sed quia eadem possessio omnibus iam habitatoribus destituta et penitus desolata iugeraque et rura eiusdem ex indulto regio inter colonos Mwsnenses et Meggyesienses divisa forent et distributa, supplicavit igitur nobis praefatus dominus Johannes Mwsna, ut praetactas literas ipsius quondam Thomae vicarii ratas habere earundemque contentis nostrum consensum benivolum praebere et easdem roborare atque confirmare dignaremur. Nos igitur ipsarum literarum continentiis ruminatis, matura superinde deliberatione praehabita, easdem literas sub eisdem conditionibus, articulis et clausulis, quibus confectae sunt, ratificamus, roboramus et nostra ordinaria auctoritate confirmamus, nostrumque eisdem consensum benivolum praebemus pariter et assensum per praesentes. Ne autem cultus divinus, [S. 298] qui in praefata ecclesia de Farkasthelke exhibebatur, simulcum eadem possessione iam desolata, perpetua evanescat oblivione, volumus et taliter committimus, ut decimae de iugeribus et ruris possessionis praedictae divisis et ad partem colonorum Mwsnensium deventis, provenire debentes, simul cum fructibus agrorum dictae ecclesiae propriorum praedicto altari sancti Nicolai in dicta ecclesia de Mwsna fundato cuius patronos ad idem altare conferendum et ad eiusdem rectoratum quandocumque vacare contigerit, personam idoneam praesentandum (eo non obstante, quod praedicta ecclesia sancti Nicolai de Farkasthelke simul cum ruribus divisis ad partem colononorum praedictorum Meggyesiensium cesserit.) ²⁾ praedicta nostra ordinaria auctoritate comitem, villicum atque iuratos seniores praefatae Mwsna constituimus et semper haberi volumus, ac eiusdem altaris rectori pro tempore constituto proveniant et integre exsolvantur, qui in divinis laudibus in eodem altari inservire et ministrare cultumque divinum futuris temporibus continuare debeat et teneatur, ita tamen et eo modo, ut directam medietatem census, qui a praefata ecclesia de Farkasthelke honorabili capitulo praedictae ecclesiae nostrae Albensis solito more quottannis debebatur, idem altarista dicto capitulo absque contradictione exsolvere teneatur. Ut autem huiusmodi nostra ordinatio et annuentia dicto altari per nos facta in aevum duratura³⁾ permaneat, committimus et nihilominus in virtute sanctae obedientiae ac sub excommunicationis poena universis plebanis praenominatae ecclesiae de Mwsna pro tempore constitutis ac aliis omnibus cuiuscumque status et conditionis hominibus firmiter inhibemus, ne eidem quomodo libet contradicere aut eandem quovis pacto in toto vel in parte revocare et retractare audeant. Quicumque enim id attentare praesumpserint, contra tales communiter et divisim exnunc prout extunc et extunc prout exnunc excommunicationis sententiam ferimus in his scriptis et eandem eos incurrere volumus ipso facto. Praesentes vero, ut perpetuae robus obtineant firmitatis, sigillo nostro authentico iussimus communiri. Datum Albae die saturni, decima septima Novembris, anno domini millesimo quadringentesimo octogesimo primo.


1) Vorlage praecessoris.^{^}
2) So Vorlage.^{^}
3) Vorlage dutura.^{^}