Urkunde Nr. 4544 aus Band VII

Seite im UB:

347-348

Heute in:

Hermannstadt, Staatsarchiv [Direcţia Judeţeană Sibiu a Arhivelor Naţionale ale Romȃniei]

Druckvorlage:

nach Einschaltung (Insert)

Abdruck als:

Volltext

Sprache:

Latein

---

4544

Hermannstadt 1483 November 21 Die Sieben Stühle sprechen die Einkünfte der Hälfte von Walachisch-Pien, die Richter und Rat von Mühlbach für die Stad beanspruchen, der Gemeinde Deutsch-Pien zu.

Nos magistri civium, iudices et iurati seniores septem sedium Saxonicalium partium Transsilvanarum memoriae commendamus tenore praesentium significantes quibus expedit universis praesentibus et futuris, quod cum nos feria sexta proxima ante festum beatae Catharinae virginis et martyris¹⁾ pro rebus publicis tractandis in nostra iudiciaria sessione pariter consedissemus, comparuerunt coram nobis providi Johannes Tengel dictus villicus et Laurentius Stephani iuratus de Pyen Saxonicali sedis Mylenbach nomine et in persona totius communitatis de eadem per modum querelae eo modo proponentes: Quod cum ipsi medietatem possessionis Pyen Olachicalis ad dictam ipsorum villam Pyen dinoscantur pretio comparasse et emisse ipsisque rite appropriasse iudices et iurati cives civitatis Myllembach, ad quam alia medietas possessionis praedictae dinosceretur spectare ab illis inhabitatoribus, qui super portionem medietatis dictorum inhabitatorum de Pyen morarentur et residerent, proventus et birsagia minusiuste et indebite exigere vellent in eorundem praeiudicium manifestum. Supplicantes nobis exinde praedicti Johannes Teggel et Laurentius Stephani quatenus eosdem in eorum iuribus et privilegiis conservare dignaremur. Unde nos iustis atque legitimis eorum petitionibus annuentes eosdem in eorum iuribus conservari volentes harum serie declaramus et pronuntiamus, quod amodo et deinceps nullus iudicum seu inhabitatorum de dicta Myllembach proventus, fructus, census et quorumvis emolimentorum genera seu birsagia ab inhabitatoribus illis, qui in possessonaria portione praedictae communitatis de Pyen Saxonicali commorantur, recipere, exigere seu recipi et exigi facere amplius debeat vel audeat modo aliquali. Sed potius praenominata communitas de Pyen Saxonicali tamquam proprium praedictae portionis possessionariae Pyen Olachicalis cum ipsorum posteris universis omnes proventus, fructus, birsagia et quaevis emolimentorum genera de praedicta medietate portionis possessionariae ipsorum [S. 348] exigere et recipere possint, debeant et valeant nullo contradictorio se opponente. In cuius rei evidentiam firmitatemque perpetuam praesentes literas nostras patentes sigillo nostro provinciali minori et authentico subappenso consignatas praedictis inhabitatoribus de Pyen Saxonicali et singulis eorum posteritatibus ad cautelam duximus concedendas. Datum Cibinii in nostra iudiciaria sessione die et loco quibus supra, anno domini millesimo quadringentesimo octogesimo tertio.

Commissio dominorum provincialium.


1) November 21.^{^}