Urkunde Nr. 4624 aus Band VII

Seite im UB:

413-414

Heute in:

Klausenburg, Staatsarchiv [Direcţia Judeţeană Cluj a Arhivele Naţionale ale Romȃniei]

Druckvorlage:

nach Original

Abdruck als:

Volltext

Sprache:

Latein

---

4624

Ofen 1486 Februar 8 König Matthias befiehlt den mit den Sachsen benachbarten Adligen, ihr Vieh nicht auf Sachsenboden zu treiben.

Von der Kanzlei: Commissio propria domini regis.

Mathias dei gratia rex Hungariae, Bohemiae et cetera fidelibus nostris unis versis et singulis nobilibus, officialibus et alterius cuiusvis status, conditioni et possessionatis hominibus in vicinitate Saxonum nostrorum ubivis bona et possessiones habentibus, praesentes visuris salutem et gratiam. Conquestum est apud maiestatem nostram in personis universorum Saxonum nostrorum, quomodo plures essent ex vobis, qui non contenti limitibus metisque et terminis olim inter possessiones ipsorum positis et locatis et quibus ab antiquo inter se cum nostris Saxonibus usi fuissent, sepenumero greges, pecora et armenta eorum ad terras et segetes feniliaque ipsorum Saxonum abigerent et contra inhibitiones et reclamationes eorum temerarie inmitterent. Immo, cum pro hiisce dampnis illatis iuxta consuetudinem in hac parte ab olim observatam, armenta seu pecora eiusmodi impellere vellent, vi et armis sese tutarentur impellendique adimerent facultatem sicque Saxones ipsi in segecibus, fenilibus, silvisque et vineis eorum indicibilia dampna nocumentaque varia et oppressiones iniuriasque maximas plerisque suscepissent et susciperent in dies; supplicatum itaque est maiestati nostrae exinde ipsis de remedio provideri opportuno. Nos igitur, volentes huiusmodi insolentiis illorum qui talia ipsis dampna inferre non formidant obviare, mandamus fidelitati universitatis vestrae harum [seri]e¹⁾ strictissime quatenus [S. 414] de cetero unusquisque vestrum a[b hui]usmodi¹⁾ dampnis, inferendis modis omnibus desistere debeat suisque metis et terminis ab olim positis contentus habeatur, alioquin commisimus magistro civium Cibiniensi ac iudicibus et iuratis singularum sedium Saxonicalium ut ipsi huiusmodi armenta et pecora vestra de huiusmodi terris inhibitis pro damnis perpetratis impellendi et iuxta qualitatem dampni commissi pactandi habeant facultatem. Qui vero ut praemittitur violenter se defenderent et impellendi huiusmodi pecora armentaque vi et armis resisterent et omnimodam abigendi adimerent eis facultatem dampnificati illos in territoriis tamen propriis ipsorum vel nostris regiis captivandi ac iudicio iudicum territorii illius ex parte illorum iudicium et iustitiam accepturi similiter liberam habeant potestatis facultatem, auctoritate nostra praesentibus ipsis in hac parte attributa mediante. Secus ergo non facturi. Praesentibus perlectis exhibenti restitutis. Datum Budae in die Cinerum, anno domini millesimo quadringentesimo octogesimo sexto, regnorum nostrorum Hungariae et cetera anno vigesimo nono, Bohemiae vero decimo septimo.

Auf der Rückseite gleichzeitiger Kanzleivermerk: Ut unusquisque nobilium suo teritorio contentus sit.


1) Lücke 7 mm. [2x]^{^}