Urkunde Nr. 2348 aus Band V

Seite im UB:

35-36

Heute in:

Hermannstadt, Staatsarchiv [Direcţia Judeţeană Sibiu a Arhivelor Naţionale ale Romȃniei]

Heutige Signatur:

Zunfturkunden [Documente de breaslă] (Inv. 32), Serie Z. U. I, Nr. 5.

Druckvorlage:

nach Original

Abdruck als:

Volltext

Sprache:

Latein

---

2348

Ofen 1439 Juli 5 König Albrecht verbietet allen Zolleinnehmern im Königreich Ungarn, von den Sachsen der Sieben Stühle Zölle einzuheben.

Von der Kanzlei: Relatio Henning militis.

Albertus dei gratia Romanorum rex semper augustus ac Hungariae, Bohemiae, Dalmaciae, Croaciae et cetera et dux Austriae et cetera fidelibus nostris universis et singulis tributariis et vicetributariis tam nostris regalibus et reginalibus, quam aliorum quorumcumque in terris scilicet, et super aquis in regno nostro Hungariae et in partibus nostris Transsilvanis ubilibet constitutis et existentibus praesentium notitiam habituris salutem et gratiam. Exponitur nobis pro parte universorum et singulorum Saxonum civium, hospitum, mercatorum et incolarum tam Cybiniensis et Zazsebes, quam aliarum civitatum, oppidorum et villarum septem sedium Saxonicalium partium nostrarum Transsilvanarum praedicatarum gravi cum querela, quod licet ipsi et eorum quilibet vigore efficacissimarum literarum et literalium instrumentorum per divos reges Hungariae et praesertium Geysam, Andream, Karolum et Lodouicum reges nostros videlicet praedecessores, eis gratiosae datarum et concessarum et per quondam serenissimum principem dominum Sigismundum, Romanorum imperatorem ac Hungariae et cetera regem, patrem, socerum et praedecessorem nostrum carissimum confirmatarum ab omni tributaria solutione, de rebus t a m mercimonialibus quam aliis quibuscumque in locis iamfatorum tributorum facienda exemti sint et supportati. Tamen vos et nonnulli ex vobis, nescitur quo motivo ducti, in locis praedictorum tributorum a praedictis mercatoribus septem sedium Saxonicalium [S. 36] nostrorum ac rebus et bonis eorum contra praefatas eorum libertates et praerogativas tributum et solutiones tributarias plerisque vicibus exegissetis et exigeretis incessanter in ipsorum libertatis et praerogativae praeiudicium et derogamen satis grandum. Unde nos praedictos exponentes eorum libertatibus et praerogativis saepedictis illibate et inviolabiliter uti, frui et potiri volentes, vestrae et cuiuslibet vestrum fidelitati firmissime praecipimus et aliud habere nollentes mandamus, quatenus alio nostro mandato exinde non expectato a modo in antea a praefatis mercatoribus¹⁾ praedictarum septem sedium Saxonicalium nostrarum aut altero eorundem, rebusque et bonis ipsorum tam mercimonialibus, quam aliis quibuscumque contra formam praemissae eorum libertatis et praerogativae, nullum tributum, nullamve tributariam solutionem petere et exigere petique et exigi facere praesumatis nec sitis ausi modo aliquali. Alioquin commisimus et harum serie districte committimus fidelibus nostris comitibus vel vicecomitibus illorum comitatum in quibus huiusmodi nostra mandata non observarentur, ut ipsi transgressores huiusmodi mandatorum nostrorum ad plenariam observationem eorundem arcius compellant et astringant auctoritate nostra ipsis praesentibus in hac parte attributa et iusticia mediante. Aliud ergo sub obtentu nostrae gratiae nullomodo facere praesumatis. Praesentes quoque post earum lecturam semper reddi iubemus exhibenti. Datum Budae die dominico proximo post festum visitationis beatae Mariae virginis gloriosae, anno domini millesimo quadringentesimo tricesimo nono.

Unter dem Siegel Kanzleibemerkung.

Unten links von gleichzeitiger Hand: <St>²⁾ ozenberg.

Auf der Rückseite von der Kanzlei: Cybiniensibus.


1) Vorlage mecatoribus. ^{^}
2) Beim Zuschneiden des Pergamentstückes weggefallen.^{^}