Urkunde Nr. 2351 aus Band V

Seite im UB:

38-39

Heute in:

Kronstadt, Staatsarchiv [Direcţia Judeţeană Braşov a Arhivele Naţionale ale Romȃniei]

Heutige Signatur:

Fond 1: Stadt Kronstadt [Primaria Municipiului Braşov], Privilegiensammlung (Colecţia privilegii) Nr. 89.

Druckvorlage:

nach Original

Abdruck als:

Volltext

Sprache:

Latein

---

2351

Segedin 1439 August 2 König Albrecht verbietet den Szeklergrafen, die den Sachsen der Stadt Kronstadt und des Burzenländer Distriktes verliehenen Rechte und Freiheiten zu verletzen.

Nos Albertus dei gratia Romanorum rex Semper augustus ac Hungariae, Bohemiae, Dalmaciae, Croaciae et cetera rex et dux Austriae et cetera memoriae commendamus tenore praesentium significantes quibus expedit universis, quod fideles nostri providi et circumspecti Georgius Mysche, Johannes Kylhaw, iurati cives nostrae civitatis Brassouiensis, necnon Petrus Dapper, iudex civitatis nostrae Fewldwar vocatae, nostrae serenitatis venientes in conspectum suis ac universorum et singulorum iudicum, villicorum, iuratorum seniorum atque civium ceterorumque nostrorum Saxonum dictae civitatis nostrae Brassouiensis ac terrae Barczensis nominibus et in personis nostrae significarunt maiestati gravi cum querela, quomodo comites Siculorum nostrorum pro tempore constituti praefatos querulantes contra libertates et praerogativas ipsorum per divos reges Hungariae nostros scilicet praedecessores et praesertim per quondam principem gloriossissimum benedictae memoriae dominum Sigismundum Romanorum imperatorem ac Hungariae et cetera regem patrem socerum et praedecessorem nostrum carissimum eis gratiose concessas diversimode iniusteque et indebite per detentiones ac minus licitas pactationes hominum ac per diversarum novitatum introductiones impedirent, molestarent et damnificarent eosdem exponentes praescriptis eorum antiquis libertatibus et praerogativis uti, frui et potiri non permitterent in ipsorum praeiudicium non modicum atque damnum. Supplicantes praenotati Georgius, Johannes et Petrus per eos suis ac aliorum praescriptorum nominibus modo praemisso nostrae prece subiectiva porrectis maiestati [S. 39] regia pietate exauditis tum etiam attentis et consideratis fidelitatibus et fidelium servitionem meritis annotatorum iudicum, villicorum, iuratorum, seniorum ac civium ceterorumque Saxonum nostrorum praefatae civitatis nostrae Brassouiensis et terrae Barczensis per ipsos semper sacrae regni nostri Hungariae coronae atque nostrae maiestati exhibitis et constanter observatis eisdem id gratiose duximus annuendum et concedendum immo annuimus et concedimus praesentium per vigorem, ut ipsi et eorum quilibet universis et singulis antiquis eorum libertatibus et praerogativis indultisque et gratiosis exemptionibus per divos praedecessores nostros reges Hungariae et signanter per dictum quondam dominum Sigismundum imperatorem et regem eis vigoribus literarum suarum exinde confectarum gratiose concessis quibusque iidem ab antiquo usque in praesentiarum iusto modo riteque et legitime usi fuerint et gavisi, in posterum uti, frui et gaudere valeant atque possint. Quocirca vobis fidelibus magnificis comitibus Siculorum nostrorum nunc constitutis et in futurum constituendis firmissime praecipimus et mandamus, aliud utique habere nolentes, quatenus a modo in antea contra praenarratorum exponentium libertates et praerogativas nullum ex eisdem in personis detinere aut quovis quaesito illicito colore eosdem seu alterum ipsorum minus iuste et indebite impedire, molestare et damnificare nusquam et nequaquam praesumatis nec sitis ausi modo aliquali, quin immo ipsos et quemlibet eorum in praescriptis ipsorum universis antiquis libertatibus, praerogativis, indultis et exemtionibus atque iustis iuribus contra alios quoslibet illegitimos impetitores conservare, tueri protegereque et defensare sic et adeo debeatis, ut ipsis exponentibus de cetero non sit necesse similes querelas nostrae porrigere sublimitati. Et aliud nullo modo facere praesumatis gratiae nostrae sub obtentu. Praesentes quoque post earum lecturam semper reddi iubemus praesentanti. Datum Zegedini dominico die proximo post festum ad vincula beati Petri apostoli, anno domini millesimo quadringentesimo tricesimo nono.

Auf der Rückseite von gleichzeitiger Hand: Literae constituendae omnia privilegia antiqua per Sigismundum regem concessa.

Unter dem Siegel Kanzleibemerkung.