Urkunde Nr. 287 aus Band I

Seite im UB:

216-217

Heute in:

Karlsburg (Weissenburg), Batthyaneum [Biblioteca Naţională a României, Filiala Biblioteca documentară Batthyaneum, Alba Iulia]

Druckvorlage:

nach Original

Abdruck als:

Volltext

Sprache:

Latein

---

287

1300 Juli 13 Das Weissenburger Kapitel bezeugt, dass Elisabeth, Witwe Herbords, die Besitzungen Varadgya und Damasfeldu dem Kapitel vermacht hat.

[N]os¹⁾ capitulum ecclesiae beati Mychaelis archangeli Transsiluanae memoriae commendantes tenore praesentium quibus expedit significamus universis, quod domina Elisabeth relicta comitis Herbordi filii Henningii de Vinch inferiori, volentibus et consentientibus filio nomine Herbordo et filia Elisabeth nuncupata, ac comite Daniele, filio Chelonis fratre eiusdem dominae necnon et comite Hanch de Vinch inferiori ac Petro plebano de Sebus, filio comitis de Wasmodi, astantibus praesentia personali coram nobis constituta, deum habens prae oculis et cogitans de supremis, de possessione comitis Herbordi quondam mariti sui praelibati ad eam devoluta, qui divino vocante iudicio viam universae carnis est ingressus, Warda vocata, simul cum terra Damasafeldu nuncupata, ubi ecclesia lapidea in honore sanctae trinitatis est constructa, quae de bonis mariti sui supra scripti et propriis sunt comparatae, talem ordinationem fecisse et ex voto quod praesentibus confirmat firmiter observaturam promisisse est confessa, videlicet quod si ipsa mortua filius et filia superviverent et eos successu temporum absque heredum solatio decedere contingeret aut tractu temporis successores seu heredes eorundem filii videlicet et filiae utriusque sexus tam de linea feminina quam masculina, ex tunc dicta possessio Warda simul cum terra Damasafeldu supra dicta cum omnibus adiacentiis et utilitatibus, molendinis, vineis, silvis, nemoribus, pratis ac portu navium cum naulo ad ipsam villam Warda pertinenti et aliis pertinentiis omnibus ad ipsas Warda et Damasafeldu quomodolibet spectantibus ex voto et ordinatione nunc facta in ius et pro- [S. 217] prietatem nostram devolverentur ipso facto. Si vero praedictos filium et filiam cum tota posteritate eorundem adhuc ipsa vivente debita naturae solvere contingeret et praedicta domina Elysabeth superviveret, ex tunc praefatas possessiones Warda et Damasafeldu cum omnibus utilitatibus pertinentiis et adiacentiis pacifice et quiete absque humano impedimento libere possidebit, relicturam ac donaturam, immo donationem ex nunc factam effectui mancipaturam. Si autem ipsa domina Elisabeth instinctu spiritus sancti dictas possessiones viva voce et voluntarie resignare voluerit et recedere ab eisdem possessionibus, ex tunc nos quinquaginta marcas fini argenti eidem dominae plene et integre dare debemus et tenemur pro voluntate sua distribuendas vel habendas, et ne in hoc casu voto suo ex nunc ordinato et sollennisato malitia hominum possit aliquatenus obviare, cum casus fortuiti et inopinabiles nullatenus praevideri possint, si ipsam morte improvisa transire ex hoc saeculo contingeret, dictas possessiones in ius et proprietatem sive dominium nostrum ex nunc vult transferri, contradictione cuiuslibet non obstante. Hoc adiecto, quod nos supra dictas quinquaginta marcas fini argenti pro remedio animae comitis Herbordi bonae memoriae mariti sui et suae necnon et filiorum ac filiae seu totius posteritatis distribuere tenebimur modo infra scripto. Decem videlicet marcas dabimus fratribus Praedicatoribus de domo Albensi ad opus ecclesiae beatae virginis, decem fratribus Heremitanis sancti Augustini de conventu Albensi ad opus ecclesiae sancti Stephani protomartyris, quinque marcas fratribus Praedicatoribus de Cybinio ad opus ecclesiae sanctae crucis, quinque marcas fratribus Minoribus de eodem ad opus ecclesiae sanctae Elysabeth, decem fratribus Praedicatoribus in Vinch existentibus, si in conventum usque ad completionem conditionum supra dictarum fuerit erectus idem locus, sin autem quinque marcas fratribus illic residentibus et quinque fratribus de Candela ac decem fratribus Praedicatoribus de Seguswar et sic complebuntur quinquaginta marcae superius nominatae, nec prius adire debemus possessiones memoratos, nisi prius quinquaginta marcae saepe dictae secundum modum praenotatum plene et integre fuerint persolutae. Ceterum totam ordinationem factam de verbo ad verbum nos nullo de nobis contradicente benevole cum gratiarum actione gratanter duximus acceptandam. In cuius rei gestae testimonium praesentes concessimus literas munimine nostri sigilli roboratas. Datum in festo beatae Margaretae virginis, anno domini millesimo trecentesimo.


1) Raum für N leer gelassen.^{^}