Urkunde Nr. 293 aus Band I

Seite im UB:

222-223

Heute in:

Karlsburg (Weissenburg), Batthyaneum [Biblioteca Naţională a României, Filiala Biblioteca documentară Batthyaneum, Alba Iulia]

Druckvorlage:

nach Original

Abdruck als:

Volltext

Sprache:

Latein

---

293

1302 Februar 18 Propst Martin und der Konvent der Praemonstratenser von Grosswardein bezeugen, dass Comes Bosouch die villa Baassen dem Weissenburger Kapitel geschenkt hat.

Martinus praepositus et conventus sancti Stephani de promontorio Waradiensi omnibus Christi fidelibus praesens scriptum inspecturis salutem [S. 223] in eo qui sceptro regio gloriantibus dat salutem. Aequitatis ratio suadet et iuris ordo postulat et requirit, ut quid cuiquam donatur iustis causis et titulis intervenientibus vel transfertur, id solidum firmumque debeat permanere, praesertim cum aliquid in ius et proprietatem sacrosanctae ecclesiae matris nostrae quae nos in Christo regeneravit pia consideratione conceditur vel transfertur. Quicquid enim in usus pios impenditur id non amittitur, sed potius conservatur, cum taliter faciendo in caelis thezaurizari dicatur, ubi nec tinea demolitur nec fures effodiunt vel furantur. Proinde ad universorum notitiam harum serie volumus pervenire, quod vir nobilis comes Bozouch filius Inok coram nobis personaliter constitutus, cum iam in diebus suis processisset et heredum careret solatio cuperetque talentum sibi traditum cum multiplicato fructu domino reportare et diem messionis extremum misericordiae operibus praevenire, ecclesiam beati Mychaelis archangeli de Alba Transsiluana sibi in heredum adoptavit, villam suam Bozna vocatam in comitatu de Kukullu inter fluvios Kukullu existentem, quam ex donatione domini Stephani regis Hungariae recordationis inclitae mediante privilegio eiusdem confirmato, nihilominus privilegio domini Ladizlai regis clarae memoriae et aliis instrumentis quibus mediantibus dixisse possidere, pro remedio animae suae et suorum capitulo praedictae ecclesiae confessus est se dedisse, donasse et reliquisse perpetuo et irrevocabiliter possidendam, ipsa etiam privilegia et instrumenta quibus mediantibus possedit simul cum ipsa villa iam a quarto anno statuisse ad manus capituli supra dicti. Ut autem haec donatio et collatio tam salubris perpetuo perseveret, praesentes ad instantem petitionem eiusdem concessimus literas sigilli nostri munimine roboratas. Datum in dominica Circumdederunt, anno domini M^o. CCC^o. secundo.