Urkunde Nr. 2590 aus Band V

Seite im UB:

203-204

Heute in:

Vatikanstadt, Vatikanisches Archiv [Archivum Secretum Apostolicum Vaticanum, Archivio Segreto Vaticano]

Druckvorlage:

nach anderem Urkundenbuch mit Quellennachweis

Abdruck als:

Volltext

Sprache:

Latein

---

2590

Rom 1447 Juni 30 Papst Nikolaus V. fordert den Erzbischof von Gran und den Bischof von Weissenburg auf, ihre siebenbürgischen Bistumsgebiete zu visitieren und die Kirchenzucht wiederherzustellen.

Nicolaus episcopus et cetera venerabilibus fratribus archiepiscopo Strigoniensi et episcopo Albensi¹⁾ salutem et cetera. Ad ecclesiarum ecclesiasticorumque locorum omnium statum salubriter dirigendum pastorali solertia intendentes circa eorum visitationem et reformationem cum illa deformata sentimus partes apostolicae sollicitudinis adhibemus et hec nimirum circa barbaris et infidelibus vicinas contiguasque provincias debemus eo vigilantius agere quo ad id specialius obligamur. Sane ad nostrum nuper auditum non absque multa animi displicentia fide digna relatione pervenit, quod nonnulla et fere omnia partium Transilvanarum vestrarum diocesium ecclesiastica loca secularium clericorum in spiritualibus et temporalibus deformata sunt multipliciter et collapsa, et multi²⁾ eorum praelati et personae tam de negligentiis executionis suorum officiorum quam de aliis excessibus sunt notati ac merito corrigendi quae absque debiti appositione remedii non debemus sub dissimulatione transire. Nos igitur de praemissis digne dolentes et ad ipsorum ecclesiasticorum locorum reformationem ac eorundem praelatorum et personarum correctionem paternis et sollicitis studiis intendere cupientes ac de vestra utriusque prudentia ac zelo religionis plenarie in domino confidentes, fraternitatibus vestris per apostolica scripta comittimus et mandamus, quatenus ad omnia vestrarum diocesium Transilvana ecclesiastica loca saecularium, clericorum, presbiterorum eorumque membra personaliter si commode potueritis accedentes aut vicarios vestros mittentes et ad solum deum ac salutem animarum commodaque huiusmodi ecclesiasticorum locorum habendo respectum, auctoritate nostra visitetis et inquiratis ibidem super praemissis et aliis quae visitationis et inquisitionis officio videbitis indigere et ea quae per visitationem et inquisitionem huiusmodi reformanda, corri-[S. 204] genda et emendanda inveneritis, auctoritate praedicta reformetis, corrigatis et emendetis tam in capite quam in membris et puniatis quoscumque inveneritis puniendos adeoque in praemissis vestram operam diligentiamque impendatis ut praefatorum vestrorum suppositorum incorrectio vobis merito notam infamiae non adscribat, in contrarium facientibus non obstantibus quibuscumque contradictores etiam auctoritate nostra appelatione postposita, compescendi. Datum Romae apud sanctum Petrum, anno et cetera millesimo quadringentesimo quadragesimo septimo, pridie Kalendas Julii, pontificatus nostri anno primo.


1) Register Vorlage Albanensi. ^{^}
2) Register Vorlage nulli. ^{^}