Urkunde Nr. 2597 aus Band V

Seite im UB:

208-209

Heute in:

Hermannstadt, Staatsarchiv [Direcţia Judeţeană Sibiu a Arhivelor Naţionale ale Romȃniei]

Heutige Signatur:

Kirchenarchive A.B. [Colecţia de documente ale parohiilor ev. CA săseşti] Serie I (Inventar 223), Nr. 501 - Abt. 21. K. A. Hermannstadt [Parohia Ev. CA Sibiu], Nr.13.

Druckvorlage:

nach Original

Abdruck als:

Volltext

Sprache:

Latein

---

2597

Hermannstadt 1447 August 16 Der öffentliche Notar Urbanus Petri von Steinau bezeugt, dass Nikolaus Apa von Malmkrog neuerdings auf das Gräfenamt von Birthälm verzichtet hat und das Testament seiner Verwandten Anna nicht anfechten wird.

In nomine domini amen. Anno nativitatis eiusdem millesimo quadringentesimo quadragesimo septimo, indictione decima, die vero Mercurii, sexta decima mensis Augusti, hora tertiarum vel quasi, pontificatus sanctissimi in Christo patris et domini nostri domini Nicolai divina providentia papae quinti anno eius primo, in domo superiori habitationis quondam Ladislay Walteri in maiori circulo oppidi Cybiniensis, Strigoniensis iurisdictionis, in mei notarii publici et testium subscriptorum ad hoc vocatorum et rogatorum praesentia personaliter constituti honorabilis vir dominus Bartholomeus, plebanus de Berthallem ac providus Nicolaus Busener, iuratus de eadem, Transsiluanensis diocesis, in eorum ac universorum hospitum et inhabitatorum de iamdicta Berthallem nominibus et personis egregium ac strenuum militem Nicolaum, filium Apa de Almakrek, diocesis Transsiluanensis praenotatae, debita cum instantia requisiverunt, quatenus de iure dominio proprietate grebatus seu senatus in dicta Berthallem existentis, si quod idem nobilis Nicolaus, fratres, sorores ac eorum communis progenitores ex vetustate aliqua seu partem habuerint in dicto grebatu et senatu dei omnipotentis intuitu, suaeque ac universae cognationis suae salutem animarum praesentium, praeteritorum et futurorum ac amore iustitiae perhiberet testimonium veritati et fateri dignaretur. Ad quorum quidem requisitorum verba idem nobilis Nicolaus, filius Apa, ad fidem suam conscientiam et honorem in manibus mei notarii publici solemniter per eum stipulatis, elevatis in coelum oculis, intervenientibus suspiriis, asserens se velle usque ad extremam horam suae vitae meram veritatis evidentiam profiteri recognoscendo deposuit in hunc modum; quod nec ipse nobilis Nicolaus filius Apa, nec fratres sui nec sorores sed nec aliqui progenitores ipsorum cognati, amici, nec aliquis ipsorum in dicto grebatu et senatu de praefata Berthallem aliquod ius, dominium, proprietatem, possessionem. imo nec minimam terrae particulam seu portionem, quae etiam ad mensuram unius [S. 209] pedis sc extenderet unquam et ullo tempore possedisset et habuisset, possedissent et habuissent nec possideret ac quovis modo possiderent etiam in praesentiarum, sed quod annis aliquibus transactis ipse nobilis Nicolaus, filius Apa, eundem grebatum seu senatum nosceretur aliquamdiu tenuisse, hoc per hospites et totam communitatem de praedicta Berthallem sponte et libere propter sinceram amicitiam et vicinitatem sibi fuisset indultum, eorum annuentia speciali, tamen movente eum ad hoc conscientia sua, idem Nicolaus, filius Apa, saepedictum grebatum et senatum cum omnibus suis iuribus, proprietatibus et concernentiis, prout ipse tenuisset, in manus ipsorum hospitum et communitatis de dicta Berthallem plene et integre resignasset et restituisset pleno cum effectu, quiquidem hospites et communitas de eadem Berthallem visa tali resignatione et restitutione grebatus ac senatus praedicti pleno iure per praetactum nobilem Nicolaum, filium Apa, in manus eorum facta, ipsum dominum Nicolaum Apa amicitiae ob respectum quodam grato munere remunerassent viceversa. Praeterea idem nobilis Nicolaus filius Apa, per annotatos dominum Bartholomeum plebanum et Nicolaum Busener propterea legitime requisitus similiter recognovit in hunc modum, quod postquam per nobilem quondam dominam Annam, cognatam suam, annis in retroactis in Berthallem moram trahentem ultimae suae voluntatis cond < >¹⁾ fuerat testamentum, ipsa domina Anna adhuc in lecto suae aegritudinis decumbente, licet tunc ipse nobilis Nicolaus idem testamentum irritare voluisset et contradicere, paulo post tamen dum percepisset id testamentum iuste, legitime fuisse debite celebratum per ipsam dominam Annam, ipse illud testamantum assumsisset nec in posterum aliquam contradictionem eidem obiecisset. Super quibus omnibus et singulis saepefati dominus Bartholomeus plebanus et Nicolaus Busener ipsorum et totius communitatis, ut praefertur, personis et nominibus de praedicta Berthallem a me notario publico subscripto unum vel plura petiverunt sibi confici instrumentum seu publica instrumenta, quorum supplicationibus ego notarius publicus iure inclinatus praesens ideo instrumentum eisdem videlicet praesentibus et futuris universis de Berthallem traddidi et assignavi. Acta et data sunt haec anno, indictione, die, mense, hora, loco et pontificatu quibus supra. Praesentibus ibidem venerabilibus²⁾, circumspectis et honorandis dominis magistro Nicolao de Corona, monasterii beatae Dorotheae virginis in Wyennia praeposito, magistro Jeronimo de Olomucz, canonico eiusdem ecclesiae Olomucz, licentiato in decretis Nicolao Nicolai de Berthallem in Almakrek, Petro Jacobi de Aggya in Nova Villa ecclesiarum parochialium plebanis, Clemente de Ludas presbitero, Anthonio Trawtenberger, magistro civium, Johanne Aurifabro, Sigismundo Marrczken, iuratis civibus oppidi Cybiniensis, Johanne Zas, sedis Zassebes iudice regio in Cybinio residente et pluribus fide dignis personis Transsiluanensis, Strigoniensis, Waradiniensis, Olomuczensis diocesis et iurisdictionis, testibus ad praemissa vocatis pariter et rogatis.

Notarzeichen. Et ego Vrbanus Petri de Stynawia, clericus Wratislauiensis diocesis, publicus papali ac imperiali auctoritatibus notarius approbatus, quia praedictis requisitioni, recognitioni et fassioni aliisque omnibus et singulis praemissis dum sic, ut praemittitur, fierent et agerentur, unacum praescriptis venerandis et circumspectis testibus praesens fui eaque sic fieri vidi et audivi, ideo praesens publicum instrumentum propria mea manu scriptum subscripsi, publicavi et in hanc formam publicam redegi et exinde confeci signoque et nomine meis solitis et consuetis roborando consignavi, rogatus et requisitus in findem et testimonium omnium praemissorum. [S. 210]


1) Lücke.^{^}
2) Vorlage veneralibus. ^{^}