Urkunde Nr. 2634 aus Band V

Seite im UB:

242-243

Heute in:

Hermannstadt, Staatsarchiv [Direcţia Judeţeană Sibiu a Arhivelor Naţionale ale Romȃniei]

Heutige Signatur:

Urkundensammlung [Colecţia de documente medievale], Serie U. II (Inventar 25), Nr. 121.

Druckvorlage:

nach Original

Abdruck als:

Volltext

Sprache:

Latein

---

2634

Wien 1448 Februar 24 Der Kardinallegat Johannes verleiht einer an der Marienkirche in Hermannstadt zu errichtenden Kapelle einen Ablass von 100 Tagen.

Johannes¹⁾ miseratione divina sancti Angeli sacrosanctae Romanae ecclesiae diaconus cardinalis in Germania et nonnullis aliis partibus sanctae sedis apostolicae legatus de latere specialiter deputatus, universis et singulis Christi fidelibus praesentes literas inspecturis salutem in domino sempiternam. Splendor paternae gloriae, qui sua mundum illuminat ineffabili claritate, pia vota fidelium de ipsius clementissima maiestate sperantium, tunc praecipue benigno favore prosequitur, cum ipsorum humilitas sanctorum precibus et meritis adiuvatur. Cupientes igitur, ut nova capella ecclesiae parochialis beatae Mariae virginis in Cibinio a retro annexa et in honore eiusdem virginis Mariae nec non beatorum Laurencii, Wolfgangi, Anthonii, Francisci, Floriani, Stephani ac Ladislai regum et Emerici ducis ac Katherinae, Barbarae, Dorotheae, Ceciliae, Elisabeth et Clarae martirum construenda et aedificanda per elemosinas fidelium manus adiutrices porrigere volentium citius perficiatur et in eadem divina ad dei et praefatorum sanctorum et sanctarum laude honorificentius celebrentur et ipsa capella Strigoniensis diocesis congruis frequentetur honoribus fidelesque ipsi eo libentius devotionis causa confluant ad eandem, quo ex hoc ibidem dono coelestis gratiae uberius conspexerint se refectos a Christi quoque fidelibus iugiter veneretur de omnipotentis dei misericordia et beatorum Petri et Pauli apostolorum eius auctoritate confisi, omnibus vere poenitentibus et confessis, qui in nativitatis, circumcisionis, apparitionis, resurrectionis, ascensionis et corporis [S. 243] domini nostri Jesu Christi ac penthecostes nec non nativitatis, purificationis, annuntiationis et assumptionis eiusdem beatae Mariae semper virginis ac nativitatis beati Johannis baptistae dictorumque Petri et Pauli apostolorum ac martirum, nec non ipsius capellae dedicationis ac patronorum eiusdem festivitatibus et omnium sanctorum celebritate, dictam capellam devote visitaverint et ad reparationem ac conservationem ipsius capellae librorumque et calicum ac aliorum ornamentorum quorumcumque pro divino cultu inibi celebrando necessariorum iuriumque et emolumentorum augmentationem quotienscumque manus porrexerint adiutrices, nos cardinalis et legatus praefatus pro qualibet ipsarum festivitatum celebritate centum dies indulgentiarum de iniunctis eis poenitentiis misericorditer in domino relaxamus praesentibus vero perpetuis futuris temporibus duraturis. In quorum omnium et singulorum praemissorum fidem et testimonium praesentes literas exinde fieri et per secretarium nostrum subscribi nostrique sigilii oblongi iussimus et fecimus appensione communiri. Datum Wiennae Pataviensis diocesis sub anno domini millesimo quadringentesimo quadragesimo octavo, indictione undecima, die vero vicesima quarta mensis Februarii, pontificatus sanctissimi in Christo patris et domini nostri domini Nicolai divina providentia papae quinti anno primo.

Auf der Plica links: Jo Vaultier secretarius.

Auf der Rückseite von gleichzeitiger Hand: Dye prif hab ich aus.


1) Verlängerte Schrift.^{^}