Urkunde Nr. 2680 aus Band V

Seite im UB:

277-278

Heute in:

Hermannstadt, Staatsarchiv [Direcţia Judeţeană Sibiu a Arhivelor Naţionale ale Romȃniei]

Heutige Signatur:

Urkundensammlung [Colecţia de documente medievale], Serie U. II (Inventar 25), Nr. 125.

Druckvorlage:

nach Original

Abdruck als:

Volltext

Sprache:

Latein

---

2680

Hermannstadt 1449 Juni 13 Die Sieben Stühle verurteilen den Mühlbächer Goldschmied Jakob und dessen Gattin, als Erben des Antonius Buzar, zur Rückzahlung eines Darlehens des Buzar an den Guldenmünzer Simon und dessen Gattin Ursula.

Von der Kanzlei: Ex commissione provinciae.

Nos¹⁾ iudices iuratique seniores septem sedium Saxonicalium partium Transsiluanarum memoriae commendamus per praesentes, quod cum nos die datarum praesentium hic simul pro tribunali more solito consedissemus venerunt nostri in praesentiam providi Symon cusor monetae aureae suo ac virtuosae dominae Vrsulae consortis eiusdem legitimae nomine et in personis, ut actor ab una parte vero ex altera Jacobus aurifaber cum consorte eiusdem de Zazsebes et per annotatum Symonem nomine quorum supra contra dictos Jacobum et consortem ipsius propositum extitit eo modo: Quod cum ipsi bonorum et haereditatum quondam Anthonii Buzar de dicta Muelenbach avunculi videlicet Vrsulae praetactae successores et possessores fore dinoscerentur idemque quondam Anthonius Buzar de bonis annotatae Vrsulae per quondam Vrbanum Gotschalk de Cibinio patrem eiusdem sibi relictis centum triginta sex florenos auri Hungaricales et decem marcas argenti a sagacibus Jacobo magistro civium et Luca Truttemberger cive iurato Cibiniensi, tutoribus annotatae Vrsulae in usum [S. 278] proprium ipsius quondam Anthonii Buzar convertendum accomodative, tali sub conditione percepisset, quod huiusmodi centum triginta sex florenos auri et decem marcas argenti, dum superinde requireretur dictae Vrsulae reddere et absque aliquali renitentia assignare deberet, huiusmodique persolutio dictae Vrsulae usque impraesentiarum a quoquam exhibita minime fuisset. Supplicans nobis exinde dictus Symon suo ac nomine consortis suae huius supra, quatenus sibi praetactos centum triginta sex florenos auri et decem marcas argenti per praetactos Jacobum successorem dicti quondam Anthonii Buzar et relictam eiusdem, nunc ut supra tangitur consortem praedicti Jacobi persolvendos adiudicare dignaremur, ex adverso autem dicti Jacobus Aurifaber cum consorte eiusdem praemissis allegationibus taliter obviarunt, quod ipsis de praetactis debitis in quibus quondam Anthonius Buzar obligatus permansisse dictae Vrsulae asseretur, nihil et penitus constaret. Quam ob rem exhibuit nobis superinde dictus Symon quasdam literas obligatorias sigillatas, cirographo proprio dicti quondam Anthonii Buzar emanatas, in quibus inter cetera continebatur, quod idem quondam Anthonius Buzar praecise quemadmodum supra expositum est, centum triginta sex florenos auri Hungaricales et decem marcas argenti de bonis dictae Vrsulae filiae videlicet sororis eiusdem Anthonii accomodative percepisset. Unde nos praemissarum ambarum partium allegationibus probationibusque et responsionibus pensatis, dictaeque causae habitudine bene ruminatis et intellectis, huiusmodi sententiam in dicta causa observata provinciae nostrae consuetudine approbata definitive duximus proferendam, quod ex quo ut supra tangitur annotati Jacobus Aurifaber cum consorte ipsius bona et haereditates praetacti²⁾ quondam Anthonii Buzar iure successorio possidere perhibeantur, tum etiam quod praetactos centum triginta sex florenos auri Hungaricales et decem marcas argenti saepius fatas quondam Anthonius Buzar fassione cirographi proprii dictae Vrsulae obligatus permansisse coram nobis, ut supra extitit comprobatum. Ob hoc nos iustiusmodi centum triginta sex florenos auri Hungaricales et decem marcas argenti per dictos Jacobum aurifabrum et consortem ipsius annotatis Symoni et Vrsulae consortis eiusdem persolvendos adiudicamus harum nostrarum literarum vigore et testimonio mediante. Datum Cibinii in nostra generali iudiciaria congregatione, in crastino festi sacratissimi corporis Christi, anno eiusdem millesimo quadringentesimo quadragesimo nono.

Unten links von anderer Hand: Lecta et correcta manu notarii.


1) Verlängerte Schrift.^{^}
2) Gebessert aus praetacte. ^{^}