Urkunde Nr. 2738 aus Band V

Seite im UB:

318-319

Heute in:

Karlsburg (Weissenburg), Batthyaneum [Biblioteca Naţională a României, Filiala Biblioteca documentară Batthyaneum, Alba Iulia]

Druckvorlage:

nach Original

Abdruck als:

Volltext

Sprache:

Latein

---

2738

1451 Mai 11 Der Konvent von Kolozsmonostor bezeugt, dass der Weissenburger Domherr Anthonius, Pfarrer von Hermannstadt, die Wiederaufnahme des Prozesses gegen Johann Gereb von Weingartskirchen um die Besitzungen Spring, Draşov / Troschen und Sebeşel / Kleinmühlbach angemeldet hat.

Conventus ecclesiae beatae Mariae virginis de Colosmonostra et cetera. Veniens coram nobis venerabilis et egregius dominus Anthonius decretorum doctor plebanus Cybiniensis et canonicus ecclesiae Transylvanae, in sua et omnium dominorum canonicorum capituli¹⁾ dictae ecclesiae Transylvanae personis nobis significare curavit per hunc modum, quod licet post elapsum quorundam dierum, videlicet transactionem unius anni infra octavas festi Pascae domini²⁾ dum et quando videlicet anno domini M CCCC L primo illustris ac magnificus dominus Johannes de Hwniad regni Hungariae gubernator in dictis Transylvanis partibus, puta in oppido Sassebes fuisset constitutus, ibidemque quidam certi domini ex¹⁾ canonicis praedictis de dicto capitulo dictae ecclesiae Transylvanae cum sua magnificentia fuissent constituti, inter cetera autem ignorarent praescripti domini canonici ecclesiae antelatae, quo animo vel spiritu ducti cuiusque intentionis illecti, quandam causam ipsorum arduissimam, imo verius ecclesiae ipsorum ac totius capituli cum egregio Johanne³⁾ Gereb de Wingarth tempore statutionis quarundam possessionum videlicet Springh, Drasso et Kyssebes vocatarum cum suis pertinentiis, quae alias quondam egregii Michaelis filii Salamonis de Nadasd praefuissent, suscitatam et habitam quomodo tempore eiusdem statutionis et occupationis earundem possessionum iuxta regni consuetudinem cum homine regio et conventus monasterii nostri beatae Mariae virginis de dicta Colosmonostra ad statuendum et acceptandum illac transmisissent. Tunc idem Johannes Gereb furia invectus manibus armatis potentialiter ipsos insequendo usque ad dictam possessionem Springh, ibique ad hominem regium irruendo eundemque interfici voluisset, si fugae praesidio cimiterium captare non valuisset, ibidemque dictum conventum proprio gladio verberando et in locis diversis vestimenta ipsius transfigendo turpibus etiam vocibus ipsum afficiendo ac baculis ipsorum eundem acriter proiiciendo, unumque ex canonicis antelatis dictae ecclesiae Transylvanae, videlicet magistrum Jacobum consocium ipsorum per tempora et crines hinc inde trahi faciendo, pugnisque eundem frequenter afficientes, taliter de possessione Springh ipsos expellendo potentialiter ad alias autem possessiones causa statutionis et occupationis ire non permittendo sed morte dira ipsos affici proclamasset. Quas scilicet possessiones antedictus quondam Michael filius Salamonis de dicta Nadasd ipsis et ecclesiae ipsorum ob spem et refrigerium animae suae ac omnium parentum suorum ex annuentia et indulto dicti domini Johannis gubernatoris necnon omnium baronum regni Hungariae vacante solio regiae celsitudinis, testamentaliter legavisset et donasset. Ipsi vero praetitulati domini canonici qui ut antefertur pro tunc una cum [S. 319] dicto domino gubernatore fuissent constituti per eundem dominum Johannem gubernatorem rogati et petiti ut praetactam violentiam iniuriamque toti capitulo et ecclesiae isporum per saepe dictum Johannem Gereb illatam indulgere velint atque relaxare, tali conditione et dispositione inserta, quod ipsas possessiones interim dominus gubernator quiete et absolute stare permitteret et permitti faceret tamdiu quousque lis inter dictas partes, videlicet Johannem Gereb et dominos de capitulo finali decisione determinaretur. Quod idem dominus gubernator minime hoc implesset, sed potius contrarium et praeiudicium ipsis generasset, ipsum Johannem Gereb adversarium scilicet ipsorum dominorum potentialiter ad dominium dictarum possessionum imponendo. Qui quidem ante nominati certi canonici pro tunc ibi existentes, nescitur utrum favore vel amore an timore concussi et perterriti, sed ut ipsis notum fuisset et expositum magis timore quam amore relaxassent et indulsissent in periclitationem iurium dictae ecclesiae dampnumque et praeiudicium dictorum dominorum intollerabile sine commissione et consensu ac voluntate maiorum partium dominorum capitularium. Quamquidem relaxationem et ipsum indultum praeallegatus dominus Anthonius doctor coram nobis publice et manifeste in sua, ut praescribitur, et omnium dominorum dicti capituli Transylvani personis revocavit et reclamavit, imo revocat et reclamat praesentium per vigorem easdemque vanas, frivolas, cassas omnibusque viribus carituras pronunciavit, causamque saepedictam dominorum cum antedicto Johanne Gereb usque ad finalem decisionem dicti domini protrahere intendunt et prosequi. Insuper autem idem Anthonius doctor solemniter et publice prohibuit saepedictum Johannem gubernatorem a collatione et donatione saepedictarum possessionum quibuscumque fienda¹⁾ signanter vero praescripto Johanni Gereb, quem a dominio earundem se quoquo modo intromissione ac fructum perceptione prohibuit coram nobis imo et prohibet effective. Harum literarum nostrarum testimonio mediante. Datum undecimo die mensis Maii, anno supradicto.


1) Über der Zelle nachgetragen. [3x]^{^}
2) 25. April - 1. Mai.^{^}
3) Hierauf de durchgestrichen.^{^}