Urkunde Nr. 2812 aus Band V

Seite im UB:

370-371

Heute in:

Hermannstadt, Staatsarchiv [Direcţia Judeţeană Sibiu a Arhivelor Naţionale ale Romȃniei]

Heutige Signatur:

Urkundensammlung [Colecţia de documente medievale], Serie U. II (Inventar 25), Nr. 138.

Druckvorlage:

nach Original

Abdruck als:

Volltext

Sprache:

Latein

---

2812

Pressburg 1453 Februar 1 König Ladislaus verleiht den untertänigen Gemeinden Bulkesch und Seiden die hohe Gerichtsbarkeit.

Nos Ladislaus dei gratia Hungariae, Bohemiae¹⁾, Dalmaciae, Croaciae et cetera rex Austriaeque et Stiriae dux necnon marchio Morauiae memoriae commendamus tenore praesentium significantes quibus expedit universis, quod nos cum ad humillimae supplicationis instantiam fidelis nostri dilecti spectabilis et magnifici Johannis de Hunyad comitis Bistriciensis pridem regni nostri Hungariae gubernatoris per eum nostrae maiestati propterea porrectae, tum etenim ob devotionem, quam ad beatissimam virginem Mariam gerimus sed et desiderio desiderantes pacem et tranquillum statum regni et nostrorum²⁾ regnicolarum ut malefactorum et nocivorum hominum offensam iustorum fraudulanter et tiranide machinantium iniquitas ne in amplum excrescat virga aequitatis deleatur, iusti autem et innoxii pacis amoenitate gaudeant sub protectione principis gloriosi fidelibus nostris iudicibus, villicis et iuratis senioribus ceterisque Saxonibus villarum seu possessionum Sythwe et Bolkach vocatarum quarum directa medietas annotati comitis Johannis existit, altera vero medietas ad civitatem nostram Cibiniensem et ad ecclesiam beatae Mariae virginis in eadem fundatam³⁾ pertinere dinoscitur id gratiose duximus annuendum et concedendum immo annuimus et concedimus praesentium per vigorem, ut ipsi iudices, villici, iurati seniores ac ceteri Saxones praesentes et futuri in praescriptis villis ac earum territoriis in locis congruis et convenientibus patibula, rotas ac cetera poenarum signa iuxta morem et consuetudinem septem sedium nostrarum Saxonicalium, quarum uti dicitur utuntur iuribus, erigere universosque fures, latrones, praedones, domorum incensores, iuxta eorum antiquas iurium approbatorum praerogativas in praefatis singulis [S. 371] falsarios ceterosque malefactores qui dei timore postposito in praemissis et aliis publicis criminibus et factis detestabilibus procedentes in personis detinere detentosque prece, pretio favore et amore quibuslibet postergatis in hac parte deumque et eius iustitiam ferentes prae oculis iuxta ipsorum demerita publicorumque criminum facinora iuris ordine observato iudicandi diffinitivaque sententia condempnandi, suspendendi, decollandi, comburendi ceterisque poenis condignis feriendi aliaque et singula in praefatis villis seu possessionibus ac eorum territoriis et pertinentiis, quae de iure in his iuxta regni nostri consuetudinem fieri conserverunt exercendi et peragendi plenam et omnimodam habeant potestatis facultatem nostra auctoritate ipsis in hac parte attributa et iustitia mediante harum nostrarum, quibus secretum sigillum nostrum appensum est, vigore et testimonio literarum mediante. Datum Posonii in vigilia festi purificationis beatae Mariae virginis gloriosae, anno domini millesimo quadringentesimo quinquagesimo tertio , regni autem nostri anno tredecimo.


1) Fehlt in der Vorlage.^{^}
2) Vorlage nostarum.^{^}
3) Vorlage fundatae. ^{^}