Urkunde Nr. 2839 aus Band V

Seite im UB:

391-392

Heute in:

Klausenburg, Staatsarchiv [Direcţia Judeţeană Cluj a Arhivele Naţionale ale Romȃniei]

Heutige Signatur:

Stadt Klausenburg [Primăria Oraşului Cluj] (Inventar 1ff.), P 53.

Druckvorlage:

nach Original

Abdruck als:

Volltext

Sprache:

Latein

---

2839

Weissenburg 1453 April 20 Der siebenbürgische Bischof Matthäus beurkundet den zwischen dem Pfarrer Gregor und der Gemeinschaft der Ungarn in der Sankt-Peters Gasse zu Klausenburg geschlossenen Vergleich, der den jeweiligen Klausenburger Pfarrer verpflichtet, an der Peterskirche einen Kaplan zu unterhalten.

Nos Matheus divina providentia et apostolicae sedis gratia episcopus Transsiluanus memoriae commendamus, quod nobis die dominica quinta decima mensis Aprilis sanctam synodum celebrantibus providi viri Lucas Kerekes et Valentinus filius Emerici in ipsorum ac totius communitatis Hungaricae nationis de Coloswar in platea sancti Petri commorantium personis cum sufficientibus literis procuratoriis honorabilis conventus beatae Mariae virginis de Colosmonstra ut actores ab una parte si quidem ex altera honorabilis dominus Gregorius plebanus de dicta Coloswar ut in causam attractus personaliter in nostram accendentes praesentiam per praefatos Lvcam Kerekes et Valentinum filium Emerici nobis supplicando propositum extitit eo modo, quod licet certa litis et controversionis materia ratione conservationis¹⁾ unius capellani in ecclesia beati Petri apostoli in dicta platea Hungaricali fundata coram nobis ac praedecessoribus nostris in diversis terminis inter ipsos Hungaros ac dominum Gregorium suosque praedecessores plebanos in dicta Coloswar [S. 392] a multis annis extiterit ventilata, quae nondum adhuc finem capere potuisset, eandem inter partes diffinire ac per nostros iudices ad hoc delegatos diffiniri facere dignaremur. Unde nos ipsorum iustis supplicationibus acquiescentes venerabiles ac egregios viros dominos Anthonium cantorem et Georgium plebanum de Sassebyess canonicos ecclesiae nostrae Transsiluanae decretorum doctores iudices commiseramus delegatos, coram quibus licet lis iuxta nostram commissionem fuerit inchoata nondum tamen terminata et tempore intermedio nos partes nostras interponentes talem fecimus et ordinavimus inter ipsas partes per modum arbitrativae compositionis, concordiae et pacis unionem futuris et perpetuis temporibus valituram ac duraturam²⁾: Quod primo extinctis universis controversiis et litium processibus literisque singulis super hac causa emanatis cassis, vanis et derelictis si quae forent reservatae viribus carituris, ipse dominus Georgius de dicta Coloswar et sui successores plebani semper teneantur unum capellanum idoneum et ipsorum moribus aptum , die nocteque³⁾ penes dictam ecclesiam beati Petri apostoli perpetue in suis expensis conservare ibidemque residere, qui omnia et singula sacramenta ecclesiastica administrare debebit et tenebitur, item singulis septimanis quatuor missas celebrare de quarum numero unam die dominica tenebitur decantare. Praeterea in summis festivitatibus videlicet resurrectionis, ascensionis, penthecostes, corporis domini nostri Jhesu Christi et nativitatis eiusdem decandando missam et vesperas necnon in omnibus festivitatibus beatae Mariae virginis et in die sanctorum Petri et Pauli apostolorum similiter missam decantare tenebitur, item mortuorum corpora iuxta consuetudinem antiquam conducere et honorifice sepelire tenebitur, partibus autem huiusmodi compositionem acceptantibus per omnia contenti se ipsos reddiderunt quittos et per omnia absolutes tali tamen conditione interiecta, ut si qua partium tali nostro arbitramento seu laudo contravenire ipsamque compositionem nostram infringere quoquomodo attemptaverit, extunc in quinque marcis argenti ponderis Budensis nobis aut nostro successori ipso facto convincatus nec litem inchoare valeat nisi plenariam solutionem de praemissis impendat. Praesentibus ibidem testibus pro testimonio vocatis reverendo patre domino Petro episcopo Zwriniensi suffraganeo nostro egregioque viro domino Bronislao vicevaivoda Transsiluano ac honorabilibus viris dominis Blasio archidiacono de Crassna, Gregorio canonico ac Johanne baccalaureo plebano de Gygen rectoreque altaris apparitionis sancti Michaelis in ecclesia nostra Albense et aliis fidedignis testibus. In quorum fidem et testimonium omnium praemissorum praesentes literas nostras fieri ac sigilii nostri annularis appensione iussimus communiri. Datum Albae feria sexta ante festum beati Georgii martiris gloriosi proxima, anno domini millesimo quadringentesimo quinquagesimo tertio.

Auf der Rückseite von gleichzeitiger Hand: litera compositionis per dominum Matheum episcopum Transilvanensem inter dominum Gregorium plebanum et incolas ecclesiae sancti Petri ordinata.


1) Vorlage coservationis.^{^}
2) Vorlage duratam. ^{^}
3) Vorlage noctuque.^{^}