Urkunde Nr. 2847 aus Band V

Seite im UB:

398-399

Heute in:

Wien, Wiener Stadt- und Landesarchiv

Heutige Signatur:

Hauptarchivsurkunden Nr. 3519.

Druckvorlage:

nach Original

Abdruck als:

Volltext

Sprache:

Deutsch

---

2847

Hermannstadt 1453 Juni 4 Der Rat von Hermannstadt berichtet dem Rat von Wien über das Ergebnis einer in Gegenwart des Wiener Beauftragten durchgeführten Untersuchung gegen zwei Mitbürger.

Unsern frewnttlichm dynst mit gutm willen erbytunge der eren. Herliche, eresamen und weyzin hern frunt und gutin gunner zu wissen tw wyr ewyr libe, das in unser keginwertekeit komen ist Augustinus schew den pfluk eyn bote mit brifin ewir stad ingesegil vorczeychent dy habe wyr mit czemlichen eren uff genomen, gehort und ire meynunge grunttlich wol vornomen habin und in der keginwertykeit des selbigin botin, wir noch dem Johannem Koetpeuer von Clausenburg im unserm mitpurger czwhant geschicket habm und ym dy sache und das vidymus in credimus statt gancz erczalt¹⁾ habm und mit dem gerichte noch gewonhat unser stad ernstlich geschikt und geschaffm habin dy sache mitsampt yn czu verhoeren yn unser keganvertykeit. Der egenante Johannes Keetpeuer hat geantwert uff dy brife alzo vor uns und den richtern der stad, das ym dy sache gar vnkünntlich wer und nicht do von wueste und ouch en der Symon Waxgyser ny doran gemant und zu wissen hett gethan. Adir wurde her sehen briff und <sygel was>²⁾ das seyn hantschrift und seyn eygm wer zo koende her dor aws nicht geweychm <und noch der>²⁾ ordenunge des rechten und laewelicher gewonhat unser stad gnuk thun. In der andern sachin alz der vorgeschrebene bote eyne copia eynes schultbriffs von her Andree Hilbrannt dyeczeit stad richter czu Wienn ouch vor uns pracht hatt, wir ouch alczuhant noch Andree Johannis Loketasson gesant habin und ym dy sache habm erczalt, zo pracht her eynen briff vor uns, der am samstag vor Judica in der nehestin fastin³⁾ ym durch her Johannis Lemmel hy königsrichter gesant, das her dy selbige schult mitsampt ander schult yn Wyen hett beczalt, alzo ouch der vorgenante Augustin ew clerlichin erczelin wirt und mündlich sagin. Dorum ersamen libm hern frünt und gunner [S. 399] in den und allen czemlichm sachm wir bereit seyn ewir libe czu behagin. Gegeben in der Hermanstat in die Quirini martyris undir unser stad segil noch Christi gebort twsund virhundert ym dreyundffwmczigisten Jar.

Burgermeyster, richter und gesworn burger der stad Cybin als Hermanstad.


1) Schwer leserlich, “irczalt“?^{^}
2) Lücke 1,5 cm. ergänzt. [2x]^{^}
3) März 17.^{^}