Urkunde Nr. 2928 aus Band V

Seite im UB:

458-460

Heute in:

Hermannstadt, Staatsarchiv [Direcţia Judeţeană Sibiu a Arhivelor Naţionale ale Romȃniei]

Heutige Signatur:

Urkundensammlung [Colecţia de documente medievale], Serie U. II (Inventar 25), Nr. 156.

Druckvorlage:

nach Original

Abdruck als:

Volltext

Sprache:

Latein

---

2928

Gran 1454 Juli 30 Dionysius, Erzbischof von Gran, trägt den Plebanen von Salzburg, Agnethlen und Alzen auf, alle Personen, die aus einigen verwüsteten Kirchen der Stühle Leschkirch und Schenk Sachen entwendet haben, unter Androhung des Bannes zur Auslieferung derselben zu verhalten.

[S. 459] Dyonisius miseratione divina tituli sancti Ciriaci in thermis sanctae Romanae ecclesiae presbiter cardinalis, archiepiscopus Strigoniensis locique eiusdem comes perpetuus ac in regno Hungariae et partibus eidem subiectis et in futurum subiicendis primas ac in utroque foro apostolicae sedis legatus natus, dilectis nobis in Christo honorabilibus viris dominis N. de Salisfodio, N. de valle Agnetis et N. de Alczina ecclesiarum parochialium plebanis, qui cum praesentibus fueritis requisiti seu alter vestrum fuerit requisitus salutem in domino benedictione cum paterna et nostris diligentiam adhibere in commissis. Noveritis quod ex certa nobis quorundam facta significatione accepimus displicenter, quomodo nonnulli forent homines tam spirituales quam seculares in sedibus Lewschkyrch et Schenck vocatis constituti et commorantes, qui bona videlicet monstrancias, calices, libros, ornamenta, imagines, campanas, florenos aliasque res quarundam ecclesiarum collapsarum et destructarum in dictis sedibus existentium publice et occulte ad manus suas recepissent eaque tenerent, celarent et sibi ipsis perpetuo usurpare et appropriare nitterentur et licet tales debitis inductionibus et exhortationibus amoniti fuerint. Tamen ipsi huiusmodi res et bona dictarum ecclesiarum, quominus eaedem possent restaurari et reparari reddere et restituere ac manifestare non curassent, in praeiudicium et dampnum dictarum ecclesiarum et dispendium salutis animarum huiusmodi bonorum et rerum retentorum manifestum. Cum itaque nos ut ex officii nostri pastoralis debito tenemur, cunctarum ecclesiarum nobis subiectarum et potissime dictarum collapsarum ecclesiarum indempnitati consulere, quantum ex deo permittitur volumus, vestrae igitur et cuiuslibet vestrum dilectioni insolidum, in virtute sanctae obedientiae et sub excommunicationis poena, quam in vos et alterum vestrum huiusmodi mandatum nostrum exequi recusantes seu recusantem, trium dierum canonica monitione praemissa ferimus in hiis scriptis districte praecipimus et mandamus, quatenus mox visis praesentibus ad universos cum praesentibus fuerint nominati, personaliter accedatis ipsosque auctoritate nostra ordinaria requiratis et amoneatis, quos et nos harum serie sic requirimus et monemus, ut ipsi infra novem dierum spatium, a die ipsius vestrae requisitionis et monitionis de ipsis fiendum computando, quorum dierum spatium tres pro primo, tres pro secundo, reliquos vero tres dies pro tertio ultimo et peremptorio termino, canonica monitione praemissa et sub dicta excommunicationis poena eisdem assignamus et praefigimus, quam in eos nisi fecerint, quae ipsis praesentibus mandamus, ferimus in hiis scriptis, dictas monstrancias, calices, libros, ornamenta, imagines, campanas, florenos aliasque res et bona praefatas ecclesias collapsas et destructas concernendas ad manus circumspecti Oswaldi magistri civium civitatis Cibiniensis effective assignare et restituere debeant et teneantur. Alioquin lapso dictorum novem dierum spatio, dictorum bonorum et rerum retentores, vobiscum praesentibus nominandos in vestris et cuiuslibet vestrum ecclesiis singulis diebus dominicis et festivis infra missarum solempnia dum maior ad divina audienda in eisdem populi convenerit multitudo, pulsatis campanis, candelis accensis ac demum extinctis ac in signum maledictionis aeternae in terram proiectis excommunicetis et faciatis denunctiari tamdiu, quousque dictas monstrancias, calices, libros, ornamenta, imagines, campanas, florenos et alias res restituerint cum effectu salvo reservato, quod si quis ex hiis se minus iuste gravatos allegarent, ex<tunc>¹⁾ ipsos in vicarii nostri in spiritualibus generalis peremtorie citetis praesentiam ad terminum competentem, causam reddituros rationa<bilem>¹⁾ si quam habuerint, quare ad praemissa non teneantur aliasque de iure < >²⁾ recepturique a dicto vicario nostro < id>¹⁾, quod iustum fuerit et ordo dictaverit rationis. Et post haec seriem vestrae executionis cum nominibus monitorum denunciatorum sive citatorum et quitquid in praemissis feceritis dicto vicario nostro conscienciose rescribatis. Praesentes in specie [S. 460] remittentes. Datum Strigonii penultima die mensis Julii, anno domini millesimo quadringentesimo L^mo quarto.

Von anderer Hand: Johannes Zaz de Coloswar, notarius in praemissis.


1) Lücke 1 cm. [3x]^{^}
2) Lücke 1,4 cm.^{^}