Urkunde Nr. 2935 aus Band V

Seite im UB:

463-465 ^a)

Heute in:

Hermannstadt, Staatsarchiv [Direcţia Judeţeană Sibiu a Arhivelor Naţionale ale Romȃniei]

Heutige Signatur:

Bischofsurkunden [Colecţia de documente episcopale] (Inventar 1), B. U. Nr. 24.

Druckvorlage:

nach Original

Abdruck als:

Volltext

Sprache:

Latein

---

2935

Prag 1454 Oktober 4 König Ladislaus ermahnt die Sachsen Siebenbürgens, ihren Pfarrern den Weinzehnten nach der Verordnung König Sigmunds ohne jede Hinterziehung zu entrichten. [S. 464]

Ladislaus dei gratia rex Hungariae, Bohemiae, Dalmaciae, Croaciae et cetera Austriaeque et Stiriae dux necnon marchio Morauiae et cetera fidelibus nostris universis et singulis iudicibus, magistris civium, villicis, senioribus, ceterisque Saxonibus et alterius cuiusvis status et conditionis hominibus in quibuslibet civitatibus, oppidis et villis tam nostris Transsiluanis et in quibusvis earum terris, tenutis et districtibus habitis constitutis et commorantibus salutem et gratiam. In personis fidelium nostrorum universorum et singulorum plebanorum dictarum civitatum, oppidorum et villarum gravis admodum maiestati nostrae querela in eo porrecta est qualiter plures essent ex vobis, qui literas praeceptorias quondam serenissimi principis divae memoriae domini Sigismundi imperatoris et regis avi nostri carissimi super modo et ordine solutionis decimarum vinorum plebanis seu rectoribus ecclesiarum vestrarum, pro tempore constitutis, per quos vobis ecclesiastica ministrarentur sacramenta animo indurato non adverterent, nec ipsas decimas eo ordine, quo praefatus quondam dominus Sigismundus imperator et rex vobis mandasset, plebanis suis extradare et persolvere curarent, in salutis animarum suarum grande dispendium humanaeque et divinae legis praevaricationem ipsarumque ecclesiarum proventuum diminutionem ac inopiam et paupertatem ministrorum earundem atque dampnum. Supplicatumque extitit, eisdem plebanis seu ecclesiarum rectoribus per nos circa praemissa regali sublevamine provideri. Unde quia nos ex officio nostri regiminis regalis tenemur, circa ecclesias dei tamquam praecipuus patronus ipsarum ac ministros earundem, ne per indebitam diminutionem proventuum divinus cultus in eisdem diminuatur, pervigilem curam habere ac diligentur invigilare nolumus iura praefatarum ecclesiarum et plebanorum earum in aliquo illicite offendi. Immo literas antefati domini Sigismundi imperatoris avi nostri, quas rationabiliter datas credimus, quoad omnem dispositionem in eis contentam per vos et quemlibet vestrum irrefragabiliter et inconcusse teneri et observari facere volentes, mandamus fidelitate vestrae universitatis et cuiuslibet vestrum firmiter, quatenus visis praesentibus a modo imposterum huiusmodi decimas vinorum praefatis plebanis vestris seu ecclesiarum rectoribus vestri parte provenientes omnino eo modo et ordine quibus antefatus quondam dominus Sigismundus imperator et rex avus noster per praetactas suas literas rationabiliter mandasse dinoscitur et quemadmodum eaedem literae suae continere videntur semper et omni anno antefatis plebanis vestris seu ecclesiarum rectoribus pro tempore constitutis vel hominibus eorundem, ad id per eos deputatis, dare et exsolvere aliisque omnibus et singulis in ipsis literis contentis sine contradictione et renitentia aliquali parere, obedire et obtemperare ac ea effectui et fine debito adimplere et efficere implerique ac effici permitti admittere debeatis. Nam aliter vobis facientibus, quod non credimus, volumus et serie praesentium firmiter committimus fideli¹⁾ nostro¹⁾ reverendo in Christo patri domino Matheo episcopo ecclesiae Transsiluanensis, ut ipse vos et vestrum quemlibet per censuram ecclesiasticam aliaque iusta remedia opportuna ad ea omnia et singula, quae in tenoribus praescriptarum literarum saepefati domini Sigismundi imperatoris avi nostri continentur, arcius compellant et astringant. Aliud ergo in praemissis non facturi, et hoc idem iniungimus per futuros episcopos dictae ecclesiae Transsiluanensis inviolabiliter et inconcusse observare. Praesentibus denique perlectis semper exhibenti restitutis. Datum Pragae in festo beati Francisci confessoris, anno domini millesimo quadringentesimo quinquagesimo quarto, regnorum [S. 465] autem nostrorum anno Hungariae et cetera quinto decimo, Bohemiae vero primo.

Von der Kanzlei: De commissione domini regis Jo.E.W.

Unter dem Siegel: De commissione domini regis Johannes episcopus Waradiensis.


a) Erster Seitenumbruch nach Kopfregest.^{^}

1) Gebessert aus: fidelibus nostris. [2x]^{^}