Urkunde Nr. 2953 aus Band V

Seite im UB:

478-479

Druckvorlage:

nach Original

Abdruck als:

Volltext

Sprache:

Latein

---

2953

Breslau 1455 Januar 20 König Ladislaus verbietet Johann Greb von Weingartskirchen die Sachsen von Stadt und Stuhl Mühlbach in dem Besitz der zum Stuhl bzw. zur Stadt gehörenden Waldungen zu stören und trägt ihm auf, seine Ansprüche auf dem Rechtswege zu verfolgen.

Von der Kanzlei: Commissia propria domini regis.

Ladislaus dei gratia rex Hungariae, Bohemiae, Dalmaciae, Croaciae et cetera ac Austriac et Stiriae dux necnon marchio Morauiae et cetera fideli nostro egregio Johanni Greb de Wyngarth salutem et gratiam. Exponitur nobis pro parte fidelium nostrorum iudicis et iuratorum civium ac totius communitatis sedis et civitatis nostrarum Zaazsebes vocatarum gravi cum querela, quod licet ipsi vivente quondam Michaele filio Salomonis de Nadas in dominio quarundam silvarum nostrarum regalium ad praedictas sedem et civitatem spectantium et antea ab illo tempore cuius contrarium hominum memoria non comprehenderet extiterint et eisdem usi fuerint praetextuque earundem dudum quaedam lites et controversiae inter ipsos exponentes et annotatum quondam Michaelem filium Salamonis ortae et tandem per medium bonorum hominum sedatae et in dominio ipsarum silvarum sub certis conditionibus ipsi exponentes relicti extiterint, tamen mortuo praefato quondam Michaele de Nadas possessionibusque eiusdem ad tuas manus devenientibus ipsos exponentes ab usu et fruitione dictarum silvarum diversis minis eisdem impositis prohibuisses et ipsas silvas vi et potentialiter velles tibi appropriare, quod nedum in ipsorum Saxonum damnum, sed et in nostrae maiestatis cedit praeiudicium manifestum. Verum quia a certo teneas quod nos talismodi silvarum et aliarum terrarum nostrarum regalium occupationes per te aut alios quoscumque sic ut praedicitur minus iuste et potentialiter factas impune et absque debita vindicta pertransire nolumus sed easdem intendimus toto posse pro nobis recuperare. Ideo fidelitati tuae firmiter praecipiendo mandamus et utique aliud habere nolentes. [S. 479] quatenus nullo alio nostro mandato superinde expectato annotatos exponentes in praetactis silvis ac usu et fruitione earundem nequaquam impedire, molestare et perturbare praesumas, nec sis ausus modo aliquali. Si enim quitquam actionis vel causae ratione praedictarum silvarum contra annotatos Saxones habere te speras id non potentialiter sed iure mediante prosequere coram iudicibus eorum ordinariis et si de eorum iudicio contentus non fueris poteris ipsam causam deducere in personalem praesentiam nostrae maiestatis per legitimam appellationem nosque in praemissis inter te et dictos exponentes tale iudicium talemque iustitiam faciemus iure exigente, quod exinde merito poteris contentari et in hiis sic agas, ut sentiamus, te nostris paruisse praeceptis atque mandatis. Alioquin te in praemissis contrafaciendo commisimus vigore aliarum literarum nostrarum et praesentium serie firmiter committimus spectabili et magnifico Johanni comiti Bystriciensi generali capitaneo in regno nostro Hungariae, ut ipse scita veritate praemissorum te ad observationem praedictorum nostrorum mandatorum iure mediante compellat et astringat nostra in persona et auctoritate sibi in hac parte attributa mediante. Praesentes quoque post earum lecturam semper reddi iubemus manibus exhibentis. Datum Wratislauiae in festo beatorum Fabiani et Sebastiani martirum, anno domini millesimo quadringentesimo quinquagesimo quinto, regnorum autem nostrorum anno Hungariae et cetera quintodecimo, Bohemiae vero secundo.