Urkunde Nr. 2964 aus Band V

Seite im UB:

489-490

Heute in:

Budapest, Ungarisches Landesarchiv [Magyar Országos Levéltár]

Druckvorlage:

nach Original

Abdruck als:

Volltext

Sprache:

Latein

---

2964

Wien 1455 März 17 König Ladislaus befiehlt den Zwei Stühlen, zur Entscheidung des Streites zwischen Jodok von Kussow und dem Hermannstädter Bürgermeister Oswald den ihnen von Oswald eingehändigten Steuerzahlungsauftrag König Alberts von 1438 bzw. eine Bestätigung über die Höhe ihrer Steuerleistung im jenem Jahr auszufolgen.

Von der Kanzlei: Commissio domini regis.

Ladislaus dei gratia Hungariae, Bohemiae, Dalmaciae, Croaciae et cetera rex, ac Austriae et Stiriae dux necnon marchio Morauiae et cetera fidelibus nostris iudicibus et iuratis senioribus ac ceteris Saxonibus nostris duarum sedium Selk et Meggyes salutem et gratiam. Noveritis quod nobis unacum nonnullis praelatis et baronibus nostris de regno nostro Hungariae, sabbato proximo post festum beati Gregorii papae¹⁾ pro nonnullis dicti regni nostri Hungariae negotiis tractandis consedentibus, egregius Jodocus de Kwssa contra providum et circumspectum virum Osualdum magistrum civium civitatis nostrae Cibiniensis personaliter coram nobis ac dictis praelatis et baronibus nostris repertum suo ac egregii Henneng de Somzedwar nominibus²⁾ proposuit eo modo, quod cum dudum alias videlicet in anno domini millesimo quadringentesimo tricesimo octavo, serenissimus quondam princeps dominus Albertus dicti regni nostri Hungariae et cetera rex et cetera genitor noster carissimus felicis recordii ipsis Jodoco et Henneng pro eorum serviciis et sallariis serviciorum census suos regales praediciti anni videlicet millesimi quadringentesimi tricesimi octavi de vestri medio proveniendos³⁾ deputasset, ipsi ad exigendos et recolligendos huiusmodi census praefatum Osualdum ac Jacobum alias similiter magistrum civium et Michaelem Magnum cives eiusdem civitatis nostrae Czibiniensis deputassent, [S. 490] literas etiam praefati quondam domini Alberti regis expeditorias ad manus eorundem Osualdi, Jacobi, Michaelis Magni assignassent et commisissent eisdem ut easdem expeditorias non prius nisi plenaria solutione praetactorum censum facta vobis redderent, ipsi quoque Osualdus, Jacobus et Michael ipsis de huiusmodi censibus non plus quam mille florenos auri solvissent, cum vero dicti census singulis annis duo milia florenorum auri faciant, residuos mille florenos auri vel praetactas literas memorati quondam domini Alberti regis ab eisdem Osualdo, Jacobo et Michaele rehabere vellet iure admitente. Quo audito praefatus Osualdus personaliter exurgens respondit ex adverso, quod licet bene verum foret, quod dictus dominus Albertus rex praetactos census dicti anni ipsis Jodoco et Henneng deputaverit, ipsique huiusmodi census ad recolligendos sibi et praefatis Jacobo ac Michael simul cum dictis literis praefati quondam domini Alberti regis commiserint, tamen ipsi non plus quam praetactos mille florenos auri ratione dictorum censuum praetacti anni eo quod eodem anno Turci pagani partes nostras Transsiluanas subintrando pertinentias dictarum duarum sedium plurium vastassent exigere potuissent dictas vero literas praefati domini Alberti regis propter solutionem dictorum mille florenorum auri vobis consignassent et licet eaedem partes plura inter sese coram nobis ac dictis praelatis et baronibus nostris contenderint literas etiam nonnullas exhibuerint. Tamen nos huiusmodi literis veluti ad causam ipsam parvum facientibus repulsis et abiectis volentes contentiones eorundem dirimere fidelitati vestrae firmiter praecipiendo mandamus, quatenus receptis praesentibus ad unum certum et brevem terminum sedis vestrae per praefatum Osualdum magistrum civium vobis deputandum, insimul convenire et praetactas literas memorati quondam domini Albertis regis pro expeditione solutionis censuum praedicti anni vobis per praefatos⁴⁾ Osualdum ac Jacobum et Michaelem consignatas requiri et reinveniri, requisitasque et reinventas recepta prius expeditione a praefato Osualdo super solutione sibi facta eidem reddere et restituere debeatis. Quae quidem literae regales, si inveniri non poterint, extunc volumus, ut vos ad fidem vestram deo debitam fidelitatemque nobis et sacro nostro regio diademati observandam tacto dominice crucis signo praestandam id videlicet quantae summae solutionem memoratis Osualdo, Jacobo et Michaeli ratione censuum vestrorum praetacti anni videlicet millesimi quadringentesimi tricesimi octavi fecistis fateri et testificari et tandem huiusmodi depositiones vestras in literis vestris conscribi facere et memorato Osualdo per ipsum ad quintum decimum diem festi pentecostes nunc venturi⁵⁾ ubi eo tunc intra ambitum dicti regni nostri Hungariae constituemur maiestati nostrae apportandas, dare et tradere debeatis, ut hiis visis iudicium facere valeamus inter partes. Et secus in praemissis facere non praesumatis. Praesentibus perlectis exhibenti restitutis. Datum Wiennae tertio die termini praenotati, anno domini millesimo quadringentesimo quinquagesimo quinto, regnorum autem nostrorum anno Hungariae et cetera quinto decimo, Bohemiae vero secundo.


1) März 15.^{^}
2) Auf Rasur.^{^}
3) Hierauf eia unterpunktiert.^{^}
4) os auf Rasur.^{^}
5) Juni 8.^{^}