Urkunde Nr. 342 aus Band I

Seite im UB:

315-316 ^a)

Heute in:

Hermannstadt, Staatsarchiv [Direcţia Judeţeană Sibiu a Arhivelor Naţionale ale Romȃniei]

Heutige Signatur:

Kirchenarchive A.B. [Colecţia de documente ale parohiilor ev. CA săseşti] Serie I (Inventar 223), Nr. 190 - Abt. 13: K. A. Mediasch [Parohia Ev. CA Mediaş], Nr. 1.

Druckvorlage:

nach Original

Abdruck als:

Volltext

Sprache:

Latein

---

342

1315 August 12 König Karl spricht die Wiedervereinigung der Sachsen von Mediasch, Schelk und Birthälm mit den Sachsen von Hermannstadt aus und verleiht ersteren die gleichen Freiheiten.

Karolus dei gratia Hungariae, Dalmaciae, Croaciae, Ramae, Seruiae, Galliciae, Lodomeriae, Comaniae Bulgariaeque rex omnibus Christi fidelibus praesentem paginam inspecturis²⁾ salutem in salutis largitore. Regiae providentiae consideratio tunc bene regnum disponit cum sicut superiores altioribus sic inferiores dignis sibi gradibus pro modo meritorum conservat ordinatos divinae potestatis instar gerens, quae deponit potentes de sede et exaltat humiles, sic haec a conditione sua depositos restaurat et temere erectos deprimit iustitiae tramitem ex debito sui suscepti officii utrobique observando. Proinde ad universorum tam praesentium quam futurorum [S. 316] notitiam harum serie volumus pervenire, quod accedentes ad nostram praesentiam Andreas de Ecul, Petrus filius Konc et Herbordus de Mosna fideles Saxones nostri nomine suo et totius communitatis Saxonum de Medyes, de Selk, de Berethalm et de ad easdem pertinentibus eorum libertatis seriem exponendo nobis proponere et allegare semel, secundo et quam pluries cum interstitiis curaverunt in hunc modum, quod ab olim sub una libertate communitatis Saxonum de Cybinio a sanctis regibus progenitoribus nostris illustribus regibus Hungariae concessa gaudentes residebant, sed per factum et potentiam Ladizlai quondam vaivodae Transsiluani ab eadem communitate Saxonum de Cybinio separati et occupati fuissent et demum per filium suum similiter Ladizlaum nomine vaivodam Transsiluanum contra libertatem eorum usque modo detenti exstitissent, humili supplicatione a nobis petentes cum instantia, ut ipsos eorum pristinae libertati restituere in integrum et comnmnitati Saxonum de Cybinio, cum qua et prius unum fuerant, unire et combinare antiquae contionis ipsorum morem sequendo dignaremur. Nos vero habito tractatu et deliberatione super hoc cum fidelibus baronibus nostris, videlicet Dominico palatino nostro, Nicolao vaivoda Transsiluano, venerabili patre domino Benedicto episcopo Chanadiensi, magistro Petro filio Kompoldi et aliis nobilibus regni nostri quam pluribus, qui tunc praesentes nobiscum aderant, cognito de hoc, quod iidem Saxones de Medyes, de Selk, de Berethalm ac de pertinentibus ad easdem ad communitatem Saxonum de Cybinio tamquam eisdem libertatibus cum ipsis perfruentes pertinebant, eosdem Saxones de Medyes, de Selk, de Berethalm in pristinae libertatis eorundem praerogativam restituentes in nomine domini eidem communitati Saxonum de Cybinio a quolibet illicito detentore auferentes eosdem duximus uniendos tali modo, quod una et eadem libertate a sanctis regibus progenitoribus nostris concessa et ordinata, cum eadem communitate Saxonum de Cybinio in exercituando et terragium seu censum nobis persolvendo et alia quae in privilegio eorundem Saxonum de Cybinio continentur faciendo in perpetuum in filios filiorum gaudeant perfruentes. In cuius rei memoriam perpetuamque firmitatem praesentes eisdem Saxonibus nostris de Medyes, de Selk, de Berethalm et de pertinentibus ad easdem concessimus nostras privilegiales literas duplicis sigilli nostri munimine roboratas. Datum per manus discreti viri magistri Johannis Albensis ecclesiae praepositi, aulae nostrae vicecancellarii et archidiaconi de Kukullu dilecti et fidelis nostri, anno domini M^o. CCC^o. quinto decimo, secundo Ydus Augusti, regni autem nostri anno similiter quinto decimo.


a) Die Fußnoten wurden in diesem Band des UB jeweils seitenweise gezählt. Auf die vorliegende Urkunde entfallen: 2 auf S. 341 (1 zu voranstehender Urkunde).^{^}

2) Vorlage: inspecturis. [Abkürzungsstrich über pec]^{^}