Urkunde Nr. 3308 aus Band VI

Seite im UB:

138-139

Heute in:

Hermannstadt, Staatsarchiv [Direcţia Judeţeană Sibiu a Arhivelor Naţionale ale Romȃniei]

Druckvorlage:

nach Einschaltung (Insert)

Abdruck als:

Volltext

Sprache:

Latein

---

3308

Reussmarkt 1462 Dezember 14 Der öffentliche Notar Lucas Lewthener bezeugt das Übereinkommen zwischen den Hannen und den Altschaften von Grosspold und Dobring über die Benützung des Grosspolder Baches.

In nomine domini amen. Anno nativitatis eiusdem millesimo quadringentesimo sexagesimo secundo, indictione decima, pontificatu sanctissimi in Christo patris ac domini nostri domini Pii divina providentia papae secundi anno eius quinto, serenissimo principe ac domino domino Frederico Romanorum imperatore regnante feliciter anno coronationis eius decimo, die vero mensis decembris quarta decima, hora meridiei vel quasi, in oppido Reusmargt, in stuba habitationis Hanß Gassner in mei notarii testiumque infrascriptorum praesentia constituti personaliter providi et circumspecti viri villarum villici et seniores villae scilicet Appoldiae maioris dicti Clauß Henkil, Symon Ssehewer¹⁾ Petir Schuster et villae Dobircow dicti Valtin Kunrad, Clauß Korsenn, Valiin Swobin vice et nomine suarum communitatum cum longis ex temporibus inter praedictarum villarum communitates non modica discordia fuisset de flumine sive ripa Appoldia in convallibus montium Hoekircholcz dictorum descendenti atque villam Flosawe pertranseunte cui videlicet communitatem deservire deberet quamque villarum pertingere deberet cuive pertinere deberet de iure naturali concorditer igitur et pure voluntarie partibus congregatis duobus iudicibus praedicti oppidi Reusmargt praesentibus uno iudice regali Niclaß Nasner dicto, altero sedis Hanß Heltner via et intentione concordiae laudabilis inibi, ut praemittitur, specialiter convocatis inceperunt dicti villicus et seniores Appoldiae maioris eos de Dobircow requirere ad dicendum coram iudicibus praedictis aliisque multis fidedignis personis quid aut quantum iuris aestimarent aut habere vellent super dicta ripa sive flumine. Interrogantes etiam si aliquando futuris temporibus intenderent eis de Appoldia maiori aquam eandem alienare sive accessum eiusdem quomodolibet impedire. Ad haec responderunt praedicti villicus et seniores villae Dobircow nullo iure compulsi sed matura ex deliberatione libere sponte et voluntarie de consensu voluntate et speciali commissione totius suae communitatis, quod saepedictum flumen sive ripa Appoldia nuncupata pertinet et pertinere debet ad Appoldiam maiorem eamque suo fluxu naturali pertingere debet perpetuis temporibus adicientes, quod ipsi nunc et semper accessum suum fluxum eiusdem aquae nunquam prohibere velint directe vel indirecte per se nec per alios verbo nec facto impedire aut alienare quovismodo obligantes. Nihilominus omnes suos heredes praesentes et futuros ad omnia praedicta teneri aeque similiter promiseruntque mihi notario publico solemniter stipulanti manu nomine et potestate totius suae communitatis omnium quoque heredum praesentium et fu-[S. 139] turorum praedictas resignationem, promissionem, obligationem ac omnia supradicta inviolabiliter observare. Super quibus omnibus et singulis saepedicti villicus et seniores villae Appoldiae maioris pro sua communitate a me notario publico supplicarunt sibi unum vel plura confici instrumentum vel instrumenta officio meo thabellionatus exigente. Acta sunt haec anno, indictione, pontificatu, imperio, die, mense, hora, loco quibus supra, praesentibus ibidem honorabilibus et discretis viris domino Clemente plebano in oppido praedicto Reusmargt, domino Stephano plebano in Appoldia minori, Petro scholastico ibidem, Symone Carpener atque Michaele Werner testibus ad praemissa specialiter vocatis pariterque rogatis.


1) Gebessert aus Dehewer.^{^}