Urkunde Nr. 3321 aus Band VI

Seite im UB:

145-146

Heute in:

Klausenburg, Staatsarchiv [Direcţia Judeţeană Cluj a Arhivele Naţionale ale Romȃniei]

Heutige Signatur:

Stadt Bistritz [Primăria Oraşului Bistriţa] (Inventar 58ff.), Urkunden Nr. 56.

Druckvorlage:

nach Original

Abdruck als:

Volltext

Sprache:

Latein

---

3321

Ofen 1463 April 24 König Matthias schreibt dem Rat von Bistritz, dass auf Beschluß des Reichtags neue Münzen geprägt wurden u. ordnet an, dass ausschliesslich die neuen Münzen benutzt werden.

Von der Kanzlei: Commissio propria domini regis.

Matthias dei gratia rex Hungariae, Dalmaciae, Croaciae et cetera fidelibus nostris prudentibus et circumspectis iudici, iuratis ceterisque civibus et toti communitati civitatis nostrae Bistriciensis salutem et gratiam. Impulsati iam pridem precibus fidelium nostrorum praelatorum, baronum et nobilium regni nostri in congregatione generali in oppido Tholnawar existente, consideratis incommoditatibus et dampnis earundem ac totius reipublicae, quae hactenus propter multiplicem variationem ac crebram vilificationem monetarum pertulerunt, unam novam monetam bonam et durabilem cuius centum denarii, oboli vero tricenti unum florenum auri valeant, cudere fecimus. Volumusque ut ipsa nova moneta abiecta omni alia moneta antiqua renovata et extranea per totum regnum nostrum et partes sibi subiectas cursum habeat et quod proventus lucri camerae nostrae ac decimae et omnes proventus quorumcunque subditorum nostrorum extradari debeant et persolvi. Ideo fidelitati vestrae harum serie sub perpetuae infidelitatis ac amissione capitum omniumque rerum et bonorum vestrorum firmiter praecipiendo mandamus, quatenus a modo deinceps abiecta omni alia moneta in omnibus emptionibus, venditionibus et negociationibus vestris iuxta limitationem et dispositionem, quas fidelis noster nobilis Christoforus de Florencia, comes camerae nostrae Rivolidominarum, de valore rerum venalium vobiscum fecerit, praedicta nova moneta nostra uti omnemque antiquam et revocatam monetam sub forma concambii et per modum probae ad ipsam cameram nostram Rywolidominarum praefato Christoforo comite camerae nostrae praedictae vel hominibus suis importare et praesentare debeatis et teneamini. Et nullus omnino hominum ultra praedictam limitationem florenos cambire aut alia quacumque¹⁾ antiqua moneta extranea et revocata uti, vel pro rebus venalibus sive sint panni sericei sive lanei aut res alterius uniuscumque ex contractu²⁾ maneriei venditionis florenorum petere vel antiquas monetas revocatas con-[S. 146] flare aut eas cambire sive argentum emere vel huiusmodi argentum aut monetas antiquas et revocatas extra hoc regnum nostrum portare et cum eis negotiationem suam facere vel falsas monetas cudere aut cudi facere aut eisdem uti praesumat, alioquin facultatem dedimus et firmiter commisimus committimusque praefato Christoforo comiti dictae camerae nostrae, ut ipse contra facientes per detentiones personarum et ablaciones rerum et bonorum ac alia opportuna gravamina ad observationes praemissorum arcius compellat et astringat, auctoritate nostra praesentibus sibi in hac parte attributa mediante. Secus non facturi. Praesentibus perlectis exhibenti³⁾ restituitis. Datum Budae in festo beati Georgii⁴⁾ martiris, anno domini millesimo quadringentesimo tertio.


1) Hierauf alia gestrichen.^{^}
2) 45 mm im Bug unleserlich.^{^}
3) Hierauf ex gestrichen.^{^}
4) Vorlage: Georgi. ^{^}