Urkunde Nr. 3364 aus Band VI

Seite im UB:

175-176

Heute in:

Hermannstadt, Staatsarchiv [Direcţia Judeţeană Sibiu a Arhivelor Naţionale ale Romȃniei]

Druckvorlage:

nach Manuskript 19. Jahrhundert

Abdruck als:

Volltext

Sprache:

Latein

---

3364

Ofen 1464 April 14 König Matthias bestätigt die Abgabenfreiheit, die Johannes von Hunyad den Einwohnern von Salzburg gewährt hat.

Von der Kanzlei: De commissione domini regis.

Nos Mathias dei gratia rex Hungariae, Dalmaciae, Croaciae et cetera memoriae commendamus tenore praesentium significantes, quibus expedit universis, quod fidelis noster Johannes Cheh iudex oppidi nostri Wyzakna personaliter veniens in conspectum maiestatis nostrae suo ac universorum civium, populorum et inhabitatorum in eodem oppido nostro commorantium et commoraturorum maiestatis nostrae exponere curavit hoc modo. Quoniam ipsi a dudum ex concessione praedecessorum nostrorum regum Hungariae ac etiam condam illustris principis domini Johannis de Hwnyad, comitis Bistriciensis, alias gubernatoris praefati regni nostri Hungariae, genitoris nostri carissimi felicis memoriae ab omnibus censibus, taxis, collectis ac contributionibus ab antiquo [S. 176] exonerati et exemti essent. Unde supplicavit maiestati nostrae idem Johannes iudex in suo¹⁾ ac aliorum praedictorum nominibus, ut eosdem in huiusmodi concessione ac dispositione relinquere et conservare dignaremur. Nos igitur tum huiusmodi supplicationi inclinati, tum vero consideratis fidelibus servitiis ipsorum eosdem in omnibus illis dispositionibus et concessionibus ac libertatibus, quas a praefato genitore nostro aut regibus Hungariae praedecessoribus nostris habeant, relinquimus praesentium per vigorem volumusque conservare, mandantes vobis fidelibus nostris vaivodis ac vicevaivodis partium Transsilvanarum regni nostri nec non universis dicatoribus et exactoribus huiusmodi censuum, taxarum ac collectarum necnon contributionum cunctisque aliis sollicitatoribus quarumcumque²⁾ solutionum praesentibus et futuris praesentes visuris firmiter praecipimus, quatenus a modo deinceps praefatos cives et inhabitatores dicti oppidi nostri contra praemissas dispositiones et concessiones ac libertates in quantum eas habent in aliquo cogere vel impedire et molestare nullatenus praesumatis. Praesentibus perlectis exhibenti restitutis. Datum Budae in festo beatorum Tiburcii³⁾ et Valeriani martirum, anno domini millesimo quadringentesimo sexagesimo quarto, regni nostri anno septimo, coronationis vero primo.


1) Vorlage nach Zimmermann sua. ^{^}
2) Vorlage nach Zimmermann quarumque. ^{^}
3) Vorlage nach Zimmermann nur Tiburcii. ^{^}