Urkunde Nr. 3387 aus Band VI

Seite im UB:

189-191

Heute in:

Kronstadt, Archiv der Honterusgemeinde

Heutige Signatur:

I E (Burzenländer Kapitel, Urkunden), Nr. 144 (Liber promptuarii capituli Braschowiensis), fol. 191 verso - 192 recto.

Druckvorlage:

nach Abschrift

Abdruck als:

Volltext

Sprache:

Latein

---

3387

Kronstadt 1464 Juli 3 Petrus, Pleban von Weidenbach und Burzenländer Dechant, bestätigt den Schiedsspruch im Erbschaftsprozess zwischen Hyl von Zeiden und Nikolaus von Brenndorf.

Petrus plebanus de Wydenbach ac decanus Braschouiensis universis et singulis quibus expedit recognoscimus tenore praesentium significantes, quod nostram veniens in praesentiam honesta domina Hyl vulgariter vocitata de Cydino, uxor legitima magistri Mathiae querulose nobis insinuans, quomodo quidam immansor villae Bringis¹⁾ Nicolaus nomine testamentum praefati magistri Mathiae viri ipsius legitimi, quod bona ratione ac dispositione fieri pro salute animae suae ordinasset, revocare et in nichilum redigere praesump-[S. 190] sisset. Qui Nicolaus auctoritate nostra ordinaria coram nobis vocatus comparuit, eidem dominae Hyl de Cydino respondit uxorem ipsius legitimam Dorotheam nuncupatam esse et fore filiam legitime conceptam et progenitam a praefato magistro Mathia qui de iure haereditario in singulis bonis tam mobilibus quam immobilibus antedicto magistro Mathiae succederet cui non parva iniuria per testamentum praefatum immo praeiudicium et dispendium dinosceretur irrogari. Ex adverso vero dicta Hyl de Cydino contra eundem Nicolaum de Bringis replicando respondit uxorem suam dictam Dorotheam minime fore aut aliquando fuisse filiam legitimam seu de thoro legitimo progenitam sed potius fornicarie conceptam et extra thorum legitimum progenitam plurimum asserebat. Productis itaque coram nobis habunde variis literarum testimoniis super legitimitate praefatae Dorotheae mulieris uxoris Nicolai saepedicti de Bringis partes ex mera et libera voluntate non coactae nec compulsae aut vi, dolo, fraude aut metu inductae causam controversiam altercationes et omnia iura ipsis competentia coniunctim et divisim ad manus venerabilium patrum et dominorum magistri videlicet Johannis plebani Brassouiensis, domini Andreae plebani de Castromariae ac domini Jacobi plebani de Bringis tamquam arbitratorum et amicabilium compositorum libera et spontanea voluntate tradiderunt et omnimode de plano in bassum et de basso in planum coram nobis resignarunt, supplicantes dictis dominis arbitratoribus et amicabilibus compositoribus, ut eandem causam sive causas complanare et concordiam plenariam iuxta literarum testimonia pronuntiare cum poenis annexis dignarentur, promittentes stipulatione manuali sub iuramento et fide data omnia et singula per supradictos dominos arbitratores in praefata causa seu causis arbitrata seu arbitranda, declarata vel declaranda, pronuntiata vel pronuntianda compositaque et componenda firma grata et rata habere et inviolabiliter perpetue sub poena imponenda servare. Unde dicti domini arbitratores et amicabiles compositores praefatarum partium suplicationibus et petitionibus annuentes et inclinati, dictam causam controversiam et altercationem tamquam arbitratores et amicabiles compositores coram nobis susceperunt, concordarunt et omnem discreptationem inter dictas partes in causa ipsa exortam complanarunt et de alto in bassum deposuerunt nec non in formam et poenam infrascriptas pronuntiarunt et declararunt. Primo concludimus, approbamus, ratificamus et pronuntiamus, quod mulier Dorothea uxor legitima Nicolai de Bringis sit filia legitime concepta et progenita praefati magistri Mathiae iuxta sanctorum canonum sanxiones et declarationes, quae omnia iura haereditaria tamquam filia legitima censetur apud patrem obtinere et in nollo posse privari. Deinde eodem modo concludimus quod licet praefata Dorothea filia magistri Mathiae praefati legitima possit, debeat et valeat ei in bonis paternis succedere tamquam filia legitima, tamen propter maiorem concordiam, amicitiam et favorem volumus et ordinamus, ut magister Mathias in vita praesenti adhuc existens eam de parte sua et bonorum suorum dotet et remuneret tamquam filiam legitimam ipsius. Primo cum una tunica de panno Ypri cum nodulis argenteis cum uno pallio similiter Ypri et cingulo argenteo²⁾ de una marca, Nicolao vero marito eius et genero suo unam tunicam de Ypri subductam pellibus vulpinis, picarium argenteum de una marca et filio eius tunicam unam pro floreno et pileum. Ita ut in vita et similiter post mortem praefata Dorothea uxor Nicolai de Bringis et filia legitima magistri Mathiae omnino nichil iuris habeat repetendi seu postulandi de quibuscunque bonis sive mobilibus sive immobilibus possessis et relictis a magistro Mathia praefato neque in vita neque post mortem. Pro finali conclusione ratificamus, volumus et concludimus ut in praescriptis omnibus et singulis sic ut praemittitur nulla expost fiat exorbitatio cuiuscunque partis seu recusatio formis et modis per nos arbitratis sub poena quinquaginta florenorum auri decano Brassouiensi pro tempore constituto [S. 191] solvendorum et ammissionis totius causae et omnium iurium praemissam causam irrecuparabiliter concernentium. Super quibus omnibus et singulis praefatae partes nos debita cum instantia requisierunt, ut ipsis de praedictis arbitratis, pronuntiatis et declaratis aliisque omnibus et singulis sic ut praemittitur factis literas nostras sigillo nostri officii consignatas atque sigillis praefatorum dominorum arbitratorum in maiorem cautelam, evidentiam et firmitatem appendentibus roboratas conficeremus et ipsis ob ipsarum maioris cautelae respectum assignaremus. Quorum petitis exauditione tamquam benedignis favorose annuentes, praesentes literas nostras sigillis nostris appendentibus ut praefertur roboratas dignum duximus concedendas. Acta sunt haec in dote parochialis ecclesiae beatae Mariae virginis et matris gloriosae in civitate Brassouiensi praesentibus ibidem providis et dicscretis viris Petro Rewel, Iacobo Hon, magistro Petro vitrico ecclesiae, Laurencio eruginatore, Nicolao Fus et Melchyor de Bringis, testibus praemissorum idoneis et fidedignis, die tertia mensis Julii, anno domini millesimo quadringentesimo sexagesimo quarto.


1) Paläographisch so zu lesen; es ist wohl die Abkürzung für Bringdorff = Brenndorf. ^{^}
2) Vorlage argerteo. ^{^}