Urkunde Nr. 3398 aus Band VI

Seite im UB:

198-199

Heute in:

Klausenburg, Staatsarchiv [Direcţia Judeţeană Cluj a Arhivele Naţionale ale Romȃniei]

Heutige Signatur:

Stadt Bistritz [Primăria Oraşului Bistriţa] (Inventar 58ff.), Nr. 64.

Druckvorlage:

nach Original

Abdruck als:

Volltext

Sprache:

Latein

---

3398

1464 September 5 Der Konvent von Kolozsmonostor schaltet die Urkunde König Matthias' von 1464 Nr. »3378 ein und bezeugt, dass die Vertreter der Stadt Bistritz und der umliegenden Gemeinden dem Familiaren Matthias Pan des Johannes Giskra von Brandeis 6000 Goldgulden ausgefolgt haben.

Conventus monasterii beatae Mariae virginis de Kolosmonostra omnibus Christi fidelibus tam praesentibus quam futuris praesens scriptum inspecturis salutem in omnium salvatore. Ad universorum notitiam harum serie volumus pervenire, quod cum nos ad instantiam et legitimam petitionem prudentum et circumspectorum virorum Thomae Hawzer iudicis, Jacobi Krechmer iurati civis civitatis Bistriciensis ac Laurencii Panczel in Besenew, Andreae Brewfar in Nagdemeter et Stephani Magni in Lekencze in pertinentiis eiusdem civitatis Bistriciensis commorantium, venerabilem et religiosum virum fratrem dominum Petrum, abbatem praetactae ecclesiae nostrae dominum et praelatum nostrum, duos ex nobis videlicet religiosos viros fratres Stanislaum custodem et Ambrosium sacerdotem socios nostros conventuales ad infrascripta videnda, audienda et tandem nobis referenda nostro pro testimonio transmisimus fidedignos. Qui tandem exinde ad nos reversi nobis conscientiose retulerunt eo modo: Quod ipsi feria tertia post festum beati Egidii abbatis proxime praeteritum¹⁾ ad civitatem Coloswar demum domum habitationis providi viri Eliae Nyrew pariter accessissent, ubi praefati Thomas, Jacobus, Laurencius, Andreas et Stephanus coram ipsis domino abbate ac nostris testimoniis necnon nobilibus viris Michaele de Swk, Anthonio Desew de Patha, item prudentibus et circumspectis viris Luca Kerekes iudice ac Johanne de Longocampo, Ladislao Hwnyady iuratis civibus et Stephano Byrthalan concive civitatis Coloswar, nobili Mathiae Pan dicto, familiari magnifici Johannis Gyskra de Brandis mediantibus literis serenissimi principis et domini, domini Mathiae dei gratia regis Hungariae et cetera ac dicti magnifici Johannis Gyskra sex millia florenos auri puri, veri et iusti ponderis plene et integre pro redemptione castri Bistriciensis dedissent et assignassent et eosdem per ipsum Mathiam Pan levatos et acceptos. Facta huiusmodi praedictorum florenorum solutione praenominati Thomas et Jacobus in ipsorum ac totius communitatis civitatis Bistriciensis et pertinentiarum eiusdem personis nostram venientes in praesentiam exhibuerunt et praesentaverunt nobis quasdam literas memorati domini Mathiae regis duplici sigillo suo consignatas tenoris infrascripti in quarum margine superiori tales sunt dictiones scriptae: Commissio propria domini regis, petentes nos debita cum instantia, ut [S. 199] tenorem earundem de verbo ad verbum sine diminutione et augmento aliquali transscribi et transumpmi faceremus transscriptumque et transsumptum eisdem Thomae ac Jacobo ac aliis praescriptis dare dignaremur iuris eorum uberiorem ad cautelam. Quarum tenor talis est. (Folgt die Urkunde König Matthias' von 1464 Nr. »3378). Nos itaque petitionibus praelibatorum Thomae et Jacobi favorabiliter inclinati praescriptas literas dicti domini regis praesentibus literis nostris privilegialibus de verbo ad verbum sine diminutione et augmento aliquali transscribi et transsumpmi facientes transscriptumque et transsumptum earundem annotatis Thomae et Jacobo ac aliis supradictis duximus concedendas, iuris uberiorem ad cautelam. In cuius rei memoriam firmitatemque perpetuam praesentes literas nostras privilegiales pendentis et autentici sigilii nostri munimine roboratas duximus concedendas. Datum feria quarta proxima post praedictum festum beati Egidii abbatis, anno domini millesimo quadringentesimo sexagesimo quarto supradicto.


1) Über der Zeile.^{^}