Urkunde Nr. 3542 aus Band VI

Seite im UB:

291-292

Druckvorlage:

nach anderem Urkundenbuch mit Quellennachweis

Abdruck als:

Volltext

Sprache:

Latein

---

3542

1467 Juli 20 Richter und Rat von Klausenburg verleihen der Zunft und Bruderschaft der Klausenburger Schmiedemeister Satzungen.

Nos Nicolaus Zeesth dictus iudex, ceterique iurati cives civitatis Coloswariensis memoriae commendamus tenore praesentium significantes quibus expedit universis, quod nostri venientes in praesentiam circumspecti et honesti viri Anthonius Symon, Stephanus et Jeronimus fabri nuncupati ac laudabilis artis magistri in suis ac aliorum magistrorum eiusdem artis personis nobis per modum gravis querelae significare curarunt in hunc modum: Quod nonnulli alii praetactae artis magistri extra ipsorum zecam et confraternitatem essent, qui et ipsorum antiquas et laudabiles consuetudines more alias ab antiquo observatas diversa dampna, incommoda et praeiudicia quotidie ipsis intulissent et inferrent incessanter in ipsorum magistrorum praeiudicium ac ipsius zechae damnum manifestum. Annotati vero magistri allegantes, ut ob proventuum ac diversorum aliorum defectus ipsorum magistrorum et confraternitatis altare in honorem sancti Ladislai in ecclesia parochiali beati Michaelis archangeli fundatum dictumque altarem in divinis ut alias more christianorum consueto cultibus ob iam praedictorum magistrorum aliorum extraordinarios existentium oppressiones modo antelato factas a modo et in posterum fructuose et commode servare non possent. Supplicatum itaque extitit nobis per eosdem magistros devote et attente magna precum instantia, ut eis superinde de opportuno remedio provide dignaremur. Unde nos praefatorum magistrorum supplicationibus utpote vere iustis et legitimis nobis in hac parte porrectis et exauditis nolentesque, ut divina dicti altari opera per iam dictos magistrorum ipsorumque zecham seu confraternitatem quoquomodo frustrentur, sed potius ipsa ad laudem dei eiusque gloriosae genetricis virginis Mariae ac beati Ladislai regis nec non utilitate ac honoris incremento civitatis commodosius augmententur, dignisque et congruis honoribus frequentetur. Igitur saepefatos magistros artis fabrilis in zecha et confraternitate existentes in cunctis eorum antiquis libertatibus et consuetudinibus more aliarum civitatum regalium laudabiliter observatis sic et praetactos magistros nostri in medio tenere et conservare volumus. Ideo eisdem magistris praesentibus et futuris id annuimus et concedimus et observandum stabilimusque, ut nullus magistrorum de ipsorum medio extra zecham eorum aliquid laborare aut laborando exercere valeat neque possit. Item nullus hominum fabrorum extra zecham existentium ignem suum ultra spatium quindecim dierum ad laborandum aptum tenere et succendere valeat neque audeat, sed interim fraternitati et zechae ipsorum satisfaciendo complacuerit. Item nullus praescriptorum infamatorum sine fidefragorum in ipsam fraternitatem et zecham recipi possit aut debeat, nisi idoneus, honestus et famosus. Item nullus hominum extraneorum labores ferreos qualescumque particulatim hic inter ipsos magistros vendere possit neque audeat, nisi immo quartalis aut alia notabili quantitate. Item quod nullus serator de ipsorum laboribus videlicet secures aut alia qualiacumque reformandos quoquomodo se intromittere audeat neque possit ad eos pertinens, salvis tamen semper libertatibus et iuribus alienis. Item si ex negligentia aut ignorantia aliquis famulorum fabrorum equum cuiuscumque sufferando destruxerit aut claudum effecerit, ita quod equus restaurari aut resanari non possit, ex tunc medietatem pretii ipsius equi idem famulus aliam vero medietatem magister suus exolvere teneatur. Et idem magister [S. 292] equum laesum amministrare teneatur. Item si aliquis famulorum fabrorum aliquem equum ex corrigiarum aut aliarum attenentiarum sui magistri sufferando aut qualitercumque destruendo offenderit, ex tunc ipse magister pro huiusmodi dampno respondere teneatur. Si vero idem famulus ex sui incuria seu negligentia equum alicuius non debito modo ligavit et providerit et ipsum equum laedendo offenderit, extunc praefatus famulus pro huiusmodi dampno respondere sit astrictus prout moris est. Item ipsi magistri centum babata pro tribus florenis auri annectere debeant. Item omnes causas et eorum famulorum excessus ad ipsos magistros et zecham de iure pertinentes discutere et diffinire facultatem habeant, demptis aliis causis ad iudicem et iuratos cives de iure spectantes et cernentes se totaliter extrahant. Item quicumque ad zecham ingredi voluerit et ad hanc sufficiens et idoneus fuerit, ille pro ipsa zecha tenetur dare duos florenos auri. Ideo ne aliquis se propter ipsius paupertate excusare valeat, item unam urnam vini et quatuor libras cerae cetera ad ipsius honestatem remittendo. In cuius rei memoriae firmitatemque perpetuam praesentes literas nostras privilegiales sigilii nostri maiori et autentici sub appensione roboratas saepefactis magistris duximusque concedendas. Datum feria secunda proxima ante festum beatae Mariae Magdalenae, anno domini millesimo quadringentesimo sexagesimo septimo.