Urkunde Nr. 3590 aus Band VI

Seite im UB:

324-325

Heute in:

Klausenburg, Staatsarchiv [Direcţia Judeţeană Cluj a Arhivele Naţionale ale Romȃniei]

Heutige Signatur:

Stadt Klausenburg [Primăria Oraşului Cluj] (Inventar 1ff.), Priv. T Nr. 49.

Druckvorlage:

nach Original

Abdruck als:

Volltext

Sprache:

Latein

---

3590

Klausenburg 1468 Januar 19 König Matthias verbietet allen Zollinhabern Siebenbürgens und besonders dem siebenbürgischen Bischof und den Zolleinnehmern in Thorenburg, von den Bewohnern Klausenburgs Zölle einzuheben, und fordert sie auf, ihr Recht auf diesen Zoll innerhalb einer bestimmten Frist nachzuweisen.

Von der Kanzlei: Propria commissio domini regis.

Mathias dei gratia rex Hungariae, Dalmaciae, Croacie et cetera fidelibus nostris vayvodis vel vicevayvodis Transsilvanis omnibusque castellanis et officialibus eorundem pro tempore ubique in dictis partibus Transsilvanis constitutis nobilibusque et ecclesiarum rectoribus possessionatisque ac aliis cuiusuis conditionis hominibus in eisdem partibus Transsilvanis ubique tributa habentibus et eorum tributariis seu officialibus specialiter autem episcopo ecclesiae Transsilvanae et tributariis in Thorda commorantibus et pro tempore constitutis salutem et gratiam. Cum privilegiata libertas fidelium civium nostrorum de Kolosuar per pios progenitores nostros eis ob fidelitatis eorum sinceritatem mediantibus suis literis privilegialibus coram nobis in specie exhibitis gratiose concessa id requirat, ut iidem de rebus ipsorum et mercibus universis in tota terra Transsilvana et in aquis tributum aliquod solvere non teneantur, nos siquidem eosdem cives nostros de Kolosuar in praemissa eorum libertatis prearogativa illaese conservare volentes, fidelitati vestrae et cuiuslibet vestrum firmis damus in praeceptis, quatenus de rebus et mercibus dictorum civium nostrorum, dum iidem vel aliquis eorum ad loca tributorum nostrorum et vestrorum pervenerint, nullum tributum nullamque tributariam exactionem recipere vel exigi facere debeatis. Immo eosdem cum rebus et mercibus ipsorum quibuslibet semper et vbique in eundo et redeundo de locis dictorum tributorum¹⁾ vestrorum libere et absque omni tributaria solutione transire permittentes auxilium vestrum et iuvamen in locis et temporibus necessariis potius [S. 325] eisdem impendentes. Aliud sicuti nos graviter offendere formidatis non facturi. Alioquin si scilicet quipiam ex vobis vel super executione huiusmodi tributorum antiquiora et efficaciora iura, quam dicti cives nostri pro eorum praemissa exemptione habent, se habere allegarent, vel aliter quomodolibet, secus quam superius mandavimus fecerint, volumus omnes tales vestrum non ad octavas sed ad certum brevem terminum iuxta antiquam consuetudinem temporibus condam domini Sigismundi imperatoris et regis ac aliorum praedecessorum nostrorum, in discussione causarum factum tributorum concernentium observatam modo infrascirpto contra dictos cives nostros evocari. Mandamus firmiter omnibus et singulis capitulis et conventibus in illis comitatibus, in quibus ut praefertur contrarium mandato factum fuerit et alias ubilibet existentibus, aut eisdem comitatibus propinquioribus praesentes literas nostras visuris, quatenus dum per ipsos cives nostros praesentibus requirerentur, ipsorum mitt ant hominem pro testimonio fidedignum, quo praesente is ex nobilibus eorundem comitatuum, quem similiter ipsi cives nostri praesentibus requisierint et cui nos superinde praesentibus firmiter mandamus, tamquam homo noster ad id specialiter deputatus, evocet omnes tales contrarium facientes ad quintumdecimum diem a die huiusmodi evocationis computandum, ubi scilicet tunc deo duce constituentur dictorum vayvodarum in praesentiam praemissa iura talium vestrum producturos, ac alias super praemissi rationem reddituros litis pendentia, si qua foret inter ipsos non obstante insinuantes ibidem eisdem, ut sive ipsi in dicto termino coram dictis vayvodis nostris vel eorum vicevayvodis compareant et dicta iura sua producant sive non nos ad partis comparentis instantiam, semota confidentia ulterioris prorogationis id faciemus in praemissis, quod iuri videbitur expedire. Et post haec huiusmodi evocationis seriem cum nominibus evocatorum ad terminum praedictum eisdem vayvodis vel vicevayvodis nostris per ipsa capitula aut conventus vel aliquem eorum¹⁾ resscribi volumus et mandamus. Praesentibus perlectis exhibenti restitutis. Datum in Koloswar feria tertia proxima post festum beati Anthonii confessoris, anno domini millesimo quadringentesimo sexagesimo octavo, regni nostri anno decimo, coronationis vero quarto.


1) Auf Rasur. [2x]^{^}