Urkunde Nr. 3650 aus Band VI

Seite im UB:

358

Druckvorlage:

nach Original

Abdruck als:

Volltext

Sprache:

Latein

---

3650

Pressburg 1468 September 30 König Matthias bestätigt die Sachsen der Sieben und Zwei Stühle im Besitz von Burg und Herrschaft Talmesch und setzt alle Erlässe, durch die ihnen Dörfer und Gebietsteile entfremdet worden sind, ausser Kraft.

Mathias dei gratia rex Hungariae, Dalmaciae, Croaciae et cetera fidelibus nostris universis et singulis Saxonibus septem sedium Saxonicalium item aliarum duarum sedium Megyes et Selk in partibus regni nostri Transsiluanis, salutem gratiamque nostram regiam et continui favoris incrementum. Exempla favorum et libertatis antiquorum regum quibus praeventi urbibus et villis egregiis regnum nostrum non solum ampliciatis, sed etiam decorastis magnifice nos inducunt, ut ad favores specialiter vobis exhibendos nostra deinceps ferventior reddatur benevolentia, vosque libertates, quae vestras maneteneamus, et non solum ab his tueamus, qui nunc vobis nocerent, sed etiam provideamus ne quis in vestrum nocumentum illic possit quomodolibet imposterum exaltari. Quatenus eo magis ac melius et in numero augeri possitis et urbes villasque vestras decoretis ad utilitatem et commodum regni decusque regni nostri. Ex nunc igitur vobis promittimus, prout etiam alii reges praedecessores nostri superinde et literis mediantibus et aliter polliciti fuisse dicuntur, quod vos ac sedes praenotatas civitatesque oppida ac villas et terras in eisdem habitas a nobis et sacra corona regni nostri nunquam alienabimus sed tenebimus insimul vos tamquam antiquum et verum ius coronae transmittemusque ad posteros reges similiter per eos servandas. Et insuper in omnibus vestris iuribus, iuridictionibus, libertatibus, consuetudinibus et gratiarum praerogativis ac castro Tholmach eiusque pertinentiis a divis regibus Hungariae nostris scilicet praedecessoribus, sive per maiores vestros, sive per vos acceptis et acquisitis conservabimus, omnia etiam privilegia ipsorum regum super illis libertatibus confirmabimus, decrevimus postremo, quod literae nostrae in contrarium libertatis, consuetudinis et iuridictionis vestrae, praecipue vero in facto alienationis villarum sive terrarum in sedibus illis habitarum ad vos portarentur, nullius sint vigoris et firmitatis, vobis etiam super non observatione earum maxime interim quosque nos superinde doceretis, non imputabimus modo aliquali. Salvis tamen iuribus alienis et dispositionibus nostris anno praeterito inter Transsiluanenses factis. In cuius rei memoriam sub secreto sigillo nostro praesentes literas nostras inpendenti duximus vobis concedendas. Datum Hystropolii sive Posonii feria sexta proxima post festum beati Michaelis archangeli, anno domini millesimo quadringentesimo sexagesimo octavo, regni nostri anno undecimo, coronationis vero quinto.