Urkunde Nr. 3901 aus Band VI

Seite im UB:

516-517

Druckvorlage:

nach anderem Urkundenbuch mit Quellennachweis

Abdruck als:

Volltext

Sprache:

Deutsch

---

3901

Regensburg 1471 Dezember 5 Ein Unbekannter berichtet Matthias Schlick auf Elbogen u.a. über ein Erdbeben in Kronstadt, ganz Siebenbürgen, der Moldau und der Walachei.

... Die ander zedell von der ertbibunge. [S. 517] Item ich fuge uch wissen, das den nehisten tag noch dato disz briffes, das ist in dem tage decollationis sent Johannis des Tewffers¹⁾ zwusschen zehen und eylffen ist ein grosse ertbebung in der Kronen kommen, also das alle gebuwde, bergk unnd tall bewegt sind wurden. Und in der pfarrkirchen von dem gewelbe Ober dem hoen altar ym chore ist der schilt des richs zu Ungern gefallen und die anderen schilde sint unvorsert bliben. Der turm der selbigen kirchen hat sich geneigt, gleich alss er zur erden fallen Wolde und yen teil der muwer unsers gartens ist gefallen, item das dach. Uff der statmawer ist das grosse teil abgefallen, etzliche weren der muwer sint nider gewurffen, vil turme sint zuryssen und die obirsten teil dovon gefallen, die decher der thurme und huser sint nidergefallen und die lewte sint von den tischen geflogen uff die gassen, glich als sie unsinnig weren, und glich gestalt als die toden. Es sind vil fuwermuwer der huszer zuryssen und uff den dorffern sint die gebell nidergefallen. Item von dem berge des slosses von der hoe des berges geygen der stat uss zubrechnug des berges sint zween grosse steyne komen. Und die ertbibunge ist in derselbigen stunde gescheen in der Mulden biss an das weisse sloss Necter genannt, bie Capham, und das sloss waybode in der Walacheye ist villich gar zubrochen. Doselbist ist die erde geoffent und gross stanck mit boszem stinkkendem wasser und andern vfflaten hat sich erougent. Item man sagit, das in der Muldaw eyn dorff ganz mit lewten, gebuwden, tyren und anderem ertruncken sey. Und in derselben stunden haben sich alle berge zu Cibss, zu Turd a und zu Bistricienn und in dem ganzen ertrich zu Cicilien und durch die ganze Walachia und Muldaw beweget und das ertrich Cicilien und Silvanien biss an die gemelten ende. Item in demselben tage decollationis sent Johannes umb seygers zwe ist abir eyn ertbibung gewest. Item an der dritten nacht alssbalde dornach umb drey hore fruw ist aber ertbibung gewest. Item die virde nacht umb drey hore ist abir ertbibung wurden. Item am sontage noch mittage umb des seigers zwe wart auch ertbibung. Item am selbigen tage nach der complet vor siben horen ist abir ertbibung wurden, also das byenen funff tagen siben mall ertbibung gescheen ist. Das moget meyn guten vetern und frunden ouch anderen, wem ir wolt, verkundigen, wenn die ding sint alle warhafftig.
... Geben zu Regenssburg am mitwochen vor Lucie.


1) August 29.^{^}