Urkunde Nr. 3902 aus Band VI

Seite im UB:

517-518

Heute in:

Kronstadt, Staatsarchiv [Direcţia Judeţeană Braşov a Arhivele Naţionale ale Romȃniei]

Druckvorlage:

nach Original

Abdruck als:

Volltext

Sprache:

Latein

---

3902

1471 Dezember 16 Der Rat von Kronstadt entscheidet einen Hattertstreit der Gemeinden Brenndorf und Petersberg.

Nos iudices iuratique consules civitatis Brassouiensis districtusque Barcensis memoriae commendamus tenore praesentium significantes quorum expedit notitiae cunctorum, quod cum nos more nostro alias observato in praesenti nostra generali congregatione pariter pro tribunali consedissemus, nostrae se praesentiae ibidem exhibuerunt providi ac probi viri Johannes Kyrschin villicus cum suis senioribus videlicet Gehans Hannus, Smits Cloz, Stolcz Jurg et Egidius, et de communitate Closch, Steffes Jacob, Czwkysch et Steffanus bey der Kyrchin de Botfalwa in suis ac totius de communitate de eadem per- [S. 518] sonis tamquam actor parte ab una, siquidem partibus ab altera Schobels Steffan villicus cum senioribus de Zentpeter, similiter in suis ac totius communitatis de eadem personis tamquam reus et in causam attractus, et per eosdem villicum cum suis senioribus de Bodfalwa declaratum expositumque est nobis sub specie gravis querelae in hunc modum. Quod cum ipsi a dudum quandam plagam terrae zabulosae ac arundinosae pacifico quietoque dominio possedissent, habita se adiacenter versus tenutam ac territorium illorum de Zentpeter, tamen idem eos minus debite impedire niterentur impedirentque de praesenti ipsis exponentibus in dampnum et praeiudicium valde magnum, petentes ipsis remedio iuris subvenire. Ex adverso villicus et seniores de Zentpeter vendere curaverunt, quod cum eadem pars terrae ob quam lis dinoscitur praesens fore mota, aequitate dictante ad eas de iure pertineat, tamen praefati villicus cum ceteris de memorata Bodfalwa usque nunc impedissent in ipsius usus fruitionem, postulantes ipsis ob iustitiae meritum circa haec provideri. Nos vero auditis partium propositionibus et responsionibus, nedum in eo contenti, verum etiam ex pollicitatione partium¹⁾ ambarum locum eorundem adivimus propter auscultari meram iustitiae aequitatem. Quo peracto nihil aliud quam deum et eius iustitiam amplexantes et prae oculis statuentes, talem in hac causa diffinitivam sententiam duximus proferendam, ut suavitas amoenitasque amicitiae inter partes conservetur et ne fomentum ulterioris controversiae excrescat, ipsis in id assentientibus, ut universi notabiliores de villis praemissis locum eundem accedere debeant, adiunctis ipsis tam de civitate antedicta quam districtu Barcensi perspicuae sagacitatis hominibus, qui tandem iuxta deum et suarum conscientiarum evidentiam memoratam plagam terrae in funiculo distributam byparciantur, unicuique partium medietatem effective assignantes iuxta capacitatem loci eiusdem relinquentem cum perpetuum quoque silentium universis ipsis pro hac causa ulterius querulando imponentes, harum nostrarum literarum sigillo nostro provinciali consignatarum vigore et testimonio mediante. Datum in praemissa nostra congregationis celebratione secunda feria ante angariam natalis dominis, anno eiusdem millesimo quadringentesimo septuagesimo primo.

Auf der Rückseite von einer Hand des 15. Jahrhunderts: Literae versus Zenthpeter, wulgo auf die Schedbach.


1) Über der Zeile.^{^}