Urkunde Nr. 3932 aus Band VI

Seite im UB:

536

Heute in:

Kronstadt, Staatsarchiv [Direcţia Judeţeană Braşov a Arhivele Naţionale ale Romȃniei]

Heutige Signatur:

Fond 1: Stadt Kronstadt [Primaria Municipiului Braşov], Privilegiensammlung (Colecţia privilegii) Nr. 207.

Druckvorlage:

nach Original

Abdruck als:

Volltext

Sprache:

Latein

---

3932

Ofen 1472 November 13 König Matthias verbietet dem Grosswardeiner Kapitel, von den Sachsen der Sieben und Zwei Stühle ungerechte Zölle einzuheben.

Von der Kanzlei: Commissio propria domini regis.

Mathias dei gratia rex Hungariae, Bohemiae et cetera fidelibus nostris capitulo ecclesiae Waradiensis salutem et gratiam. Expositum est maiestati nostrae in personis fidelium nostrorum prudentum et circumspectorum universorum et singulorum Saxonum nostrorum septem et duarum sedium Saxonicalium ad modum gravis querelae, quomodo vos de rebus et bonis ipsorum mercimonialibus non secundum consuetudinem aliorum tributorum, sed iuxta aestimationem huiusmodi rerum et bonorum suorum more proventuum nostrorum vectigalium ad unum florenum auri computandum ab eis tributum exigeretis et exigi faceretis contra iura et consuetudinem regni in praeiudicium eorundem et damnum valde magnum. Unde supplicatum extitit nobis humiliter, ut ipsis superinde opportune providere dignaremur. Et quia nos nullibi in hoc regno nostro Hungarico iniustas et inconsuetas exactiones tributi alicuius fieri volumus, prout de iure ad id admittimus, mandamus ergo fidelitati vestrae firmissime, quatenus receptis praesentibus a modo in antea super praefatos Saxones nostros vel eorum alterum ac de rebus ipsorum mercimonialibus absque aestimatione rerum iustum tributum exigere et exigi facere debeatis, alioquin sciatis, quod nos taliter providebimus huic rei, ut de cetero praefati Saxones nostri per vos oppressiones et damna non patientur. Secus ergo non facturi. Praesentibus perlectis exhibenti restitutis. Datum Budae in festo beati Briccii episcopi et confessoris, anno domini millesimo quadringentesimo septuagesimo secundo, regnorum nostrorum anno Hungariae et cetera quintodecimo, coronationis nono, Bohemiae vero quarto.

Auf der Rückseite in Schrift des 15. Jhs.: Litera de teolonio in Varadino.