Urkunde Nr. 1875 aus Band IV

Seite im UB:

117-119 ^a)

Heute in:

Klausenburg, Staatsarchiv [Direcţia Judeţeană Cluj a Arhivele Naţionale ale Romȃniei]

Heutige Signatur:

Stadt Bistritz [Primăria Oraşului Bistriţa] (Inventar 58ff.).

Druckvorlage:

nach Original

Abdruck als:

Volltext

Sprache:

Latein

---

1875

Ofen 1419 Dezember 27 König Sigmund verbietet dem siebenbürgischen Adel, Untertanen, die ihren Grundzins entrichtet haben, an der Ansiedlung im Bistritzer Distrikt zu hindern.

Von der Kanzlei: Commissio propria domini regis.

Sigismundus dei gratia Romanorum rex semper augustus ac Hungariae, Bohemiae, Dalmaciae, Croaciae et cetera rex fidelibus nostris universis et singulis nobilibus ceterisque cuiusvis status, gradus et conditionis possessionatis partium nostrarum Transsiluanarum hominibus salutem et gratiam. Venientes in nostrae maiestatis conspectum Andreas iudex et Mathias dictus de Lewche ac Nicolaus Newnmester iurati civitatis nostrae Biztriciensis partium nostrarum Transsiluanarum, item Anthonius comes et Laurencius Selk de magno Demetrio, nuncii civitatis praedictae et provinciae ac pertinentiarum eiusdem, suis et omnium civium, hospitum, habitatorum et incolarum [S. 118] civitatis praedictae et omnium suarum pertinentiarum nominibus et in personis nobis gravi sub querela declararunt, quod licet cives, populi, hospites et habitatores dictae civitatis et villarum ad eam pertinentium iuxta eorum placitum voluntatis, iuxta nostrae maiestatis decretum ex deliberatione praelatorum, baronum regnique nostri procerum dudum editum et stabilitum, obtenta licentia terragioque deposito et iustis eorum debitis persolutis ad possessiones vestras se hactenus libere transtulissent et saepius transferrent moraturi, tamen vos eidem decreto nostro repugnando et consuetudini regni nostri contra faciendo speciales etiam literas nostras ex postea vobis superinde directas non curando et nec advertendo iobagiones vestros de vestris possessionibus, tenutis ac villis obtenta licentia terragioque deposito et iustis debitis persolutis ad dictam civitatem nostram Biztriciensem et villas ad eandem pertinentes commorandi causa venire volentes diversis eis impositis calumniis rebusque eorum ac bonis usurpatis et retentis recedere non permitteretis, eosdem contra ipsorum voluntatem et [in] dictae civitatis praeiudicium ac huiusmodi nostri regii decreti literarumque nostrarum vobis in eo specialiter directarum vilipendium et contemptum temere retinendo, per quod civitas nostra Biztriciensis praedicta et villae ad eam pertinentes non modicum paterentur praeiudicium immo desolationis detrimentum. Supplicarunt itaque nostrae humiliter maiestali, ut civitati nostrae praedictae et villis ad eam pertinentibus in praemissis remedium reformationis adhibere dignaremur de regali dispositione opportunum. Nos itaque qui semel legitime edita et stabilita pro statu omnium nobis subiectorum roborare et per eosdem subditos observari facere tenemur et adimpleri, volentes huiusmodi decretum nostrum in sui permanere firmitate et ab omnibus nostris et sacrae coronae nostrae Hungariae fidelibus inviolabiliter observari et efficaciter adimpleri vestrae et cuiuslibet vestrum fidelitati firmissimo nostro regio sub edicto praecipimus et omnino volentes mandamus, quatenus omnes et quoslibet vestros iobagiones et alterius status vestrae iurisdictionis liberos homines, qui obtenta licentia iustoque terragio deposito ac aliis eorum legitimis debitis persolutis de vestris tenutis, possessionibus et villis ad praedictam civitatem nostram Biztriciensem ipsiusque provinciam et villas ad eam pertinentes venire voluerint moraturi, libere, secure et tute ac absque damno et impedimento aliquali simul cum omnibus eorum liberis, rebus ac bonis universis abire et recedere permittatis et per vestros ac ad vos pertinentes permitti faciatis difficultate, occasione et renitentia absque omni. Alioquin sicut alias vigore eiusdem decreti nostri commisimus, ita nunc et de praesenti praesentium serie firmiter committimus magnifico viro vaivodae nostro Transsiluano nec non comitibus, vicecomitibus et iudicibus nobilium illorum comitatuum, in quibus ipsi nostro decreto contra factum fuerit et repugnatum, praesentibus videlicet et futuris, ut ipsi habita superinde plena, sufficienti et vera quoties opportuerit informatione huiusmodi iobagiones et homines vestros ad dictam civitatem [S. 119] nostram Biztriciensem ipsiusque villas et provinciam de vestris tenutis, villis et possessionibus causa commorandi sponte venire volentes per vos remitti facere et libere salvis eorum rebus et personis omnibus abire permittant toties quoties necesse fuerit et opportunum iuxta vim,¹⁾ formam et continentiam nostri praesentis decreti, per poenasque et gravamina in eodem expressa si necesse fuerit vos et quemlibet vestrum artius ad id astringendo et strictius compellendo. Praesentes autem sigillo nostro maiori, quo ut rex Hungariae utimur, fecimus consignari. Quas perlectas reddite praesentanti. Datum Budae, in festo beati Johannis apostoli et evangelistae, anno domini millesimo quadringentesimo decimo nono, regnorum nostrorum anno Hungariae et cetera tricesimo tertio, Romanorum vero decimo.

Unter dem Siegel: Commissio propria domini regis.


a) Die Fußnoten wurden in diesem Band des UB jeweils seitenweise gezählt. Auf die vorliegende Urkunde entfallen: 1 auf S. 119 (dortige 2-3 zu nachfolgender Urkunde).^{^}

1) Hierauf: et unterpunktiert.^{^}