Urkunde Nr. 452 aus Band I

Seite im UB:

408-409

Heute in:

Vatikanstadt, Vatikanisches Archiv [Archivum Secretum Apostolicum Vaticanum, Archivio Segreto Vaticano]

Druckvorlage:

nach (zeitgenössischem) Registereintrag

Abdruck als:

Volltext

Sprache:

Latein

---

452

Avignon [1327] Februar 1 Papst Johann XXII. empfiehlt die gegen die Haeretiker ausgesendeten Dominikaner dem Schutze des Comes Salomon von Kronstadt.

Johannes episcopus dilecto filio nobili viro comiti Salomoni de Brasso salutem Indubitatam gerimus de tua nobilitate fiduciam, quod tamquam princeps devotus catholicus deo et apostolicae sedi favorabiliter assistens, te reddis, prout fide dignorum testimonio laetanter percepimus, ad sustentationem orthodoxae fidei velut columnam immobilem, turrim fortitudinis et devotionis propugnaculum studio promptitudinis indefesse. Gaudemus, inquam, dum in mente revolvimus tua laudabilia opera, quae dudum devotio tua ferventer exercuit et exercere non desinit ad exterminationem infidelium nationum. Cum igitur, sicut accepimus, in terris tibi subiectis in regno Ungariae consistentibus hostes crucis de remotis partibus Alamanniae et Poloniae et circumpositis regionibus frequenter et latenter invadant simplices et catholicos dicti regni eosque inficere et a veritatis limine deviare fallacium argumentationum impulsibus moliantur, nos volentes contra talium dolosam astutiam, ne diffusius in regno praedicto huiusniodi serpat morbus, opportunum remedium per sedis apostolicae diligentiam adhiberi, ac cupientes anxie, ut negotium fidei iugi profectu, elisis omnino quibuslibet erroribus, fortius invalescat, dilecto filio priori provinciali fratrum ordinis Praedicatorum in Ungaria aliquos de fratribus sui ordinis suae provinciae idoneos in lege domini eruditos, quorum honesta conversatio exemplum tribuat puritatis et doctrinam fundant erudita labia salutarem, ad huiusmodi opus dominicum exsequendum apostolica auctoritate deputandi per partes ipsius [S. 409] regni sibi per ordiriem suum limitatas ipsosque amovendi, eisque amotis vel de hac luce subtractis alios similiter idoneos instituendi, quoties sibi visum fuerit, plenam et liberam concessimus per nostras literas facultatem. Qui quidem fratres, cum per eundem priorem ad hoc deputati seu instituti fuerint ut praefertur iuxta et secundum instituta canonica super hiis promulgata auctoritate praedicta clero et populo convocatis generalem praedicationem in dicto regno, ubi et quoties expedire viderint, facientes, inquisitionis officium contra labem haereticae pravitatis diligenter et sollicite, prout deus eis dederit, exsequantur contra haereticos, credentes, fautores, defensores et receptatores eorum iuxta et secundum eadem statuta auctoritate praefata, nihilominus in forma ecclesiae ac secundum praefata statuta beneficium absolutionis impendant, et iniungant eis, quod talibus est secundum statuta huiusmodi iniungendum. Ideoque nobilitatem tuam rogamus, monemus et hortamur attente, in remissionem tibi peccaminum iniungentes, quatenus eosdem inquisitores, cum ad terras easdem declinaverint, pro reverentia divina et sedis apostolicae ac nostra benigne recipias et honorifice pertractes, eis in hiis et aliis consilium, auxilium et favorem taliter impendendo, quod ipsi commissum sibi officium exsequi valeant inoffense, et nos sinceritatis tuae zelum possimus in domino merito commendare, tuque exinde perenne bonum, quod suis fidelibus divina clementia pollicetur, ad divini nominis laudem et animae tuae salutem consequi merearis. Datum Avinione, Kalendis Februarii, anno undecimo.