Urkunde Nr. 1949 aus Band IV

Seite im UB:

211-212

Heute in:

Hermannstadt, Staatsarchiv [Direcţia Judeţeană Sibiu a Arhivelor Naţionale ale Romȃniei]

Heutige Signatur:

Kirchenarchive A.B. [Colecţia de documente ale parohiilor ev. CA săseşti] Serie I (Inventar 223), Nr. 194 - Abt. 13: K. A. Mediasch [Parohia Ev. CA Mediaş], Nr. 5 (alt Nr. 13)

Druckvorlage:

nach Original

Abdruck als:

Volltext

Sprache:

Latein

---

1949

Ofen 1424 Juni 1 König Sigmund verbietet seinen Steuersammlern, von den Sachsen der Stühle Mediasch und Schelk bei der Einhebung des Martinszinses Geschenke zu verlangen und sie zu belästigen.

Von der Kanzlei: De propria commissione domini regis.

Nos Sigismundus dei gratia Romanorum rex semper augustus ac Hungariae, Bohemiae, Dalmaciae, Croaciae et cetera rex notum facimus universis praesentibus et futuris, quod fideles nostri providi viri Nicolaus de Meggies et Thewnesnel de Selk civitatum nostrarum partium Transsiluanarum iudices nostram accedentes praesentiam nominibus et in personis fidelium nostrorum universorum et singulorum Saxonum, civium, hospitum populorumque et iobagionum nostrorum ad sedes Meggyes et Selk pertinentium maiestati nostrae modesta significatione studuerunt declarare, quod collectores et receptores taxae seu collectae nostrae maiestatis in festo sancti Martini¹⁾ singulis annis ex parte ipsorum nobis et fisco nostro regali provenientis quadam abusiva novitate ad inventa tempore exactionis talismodi collectae ultra et supra debitum censum seu summam ipsius collectae quaedam munera in pannis vel aliis rebus allegantes sibi debere provenire ab eis exigere vellent et eos ad dandum talismodi munera coartare²⁾ conati fuissent et iam in usum convertere vellent; cum tamen secundum antiquam eorum libertatem et consuetudinem transactis tribus diebus exactionis ipsius collectae quolibet die usque integram persolutionem ipsius taxae pro expensis eorundem collectorum unum fertonem argenti tantum et nihil plus ipsis dare tenerentur, supplicantes his declaratis praefati iudices nostrae maiestati, ut ipsis super hoc dignaremur regale remedium adhibere. Verum quia nos ex officio nostrae dignitatis civitatum nostrarum utilitates procurare et malas consuetudines abolire tenemur, ideo huiusmodi munerum abusivorum postulationem et coactam receptionem per collectores praemissae taxae ut praemittitur adinventam, etiam si hoc ipsum dumtaxat iam in consuetudinem versum fuisset, revocamus, cassamus et in nihilum redigimus ex potestate regali nostrae maiestatis. Quocirca vobis fidelibus nostris universis et singulis collectoribus praemissae taxae nostrae maiestatis constitutis et constituendis firmo nostro regio damus sub edicto, quatenus a modo in posterum praefatos cives, hospites et iobagiones nostros ad dictas duas sedes de Meggyes scilicet et de Selk spectantes ratione praemissorum praetensorum coactorumque munerum per nos ut est praemissum [S. 212] abolitorum impedire et molestare non debeatis, neque ab eis talia munera ultra debitum censum eorum et expensas petere vel exigere et nec ad dandum vobis eiusmodi coacta munera ipsos quoquomodo compellere audeatis. Et aliud sub poena nostrae indignationis in hac parte non faciatis. Praesentes etiam post lecturam reddi iubemus praesentanti. Datum Budae, in festo ascensionis domini, anno eiusdem millesimo quadringentesimo vigesimo quarto, regnorum nostrorum anno Hungariae et cetera tricesimo octavo, Romanorum quartodecimo et Bohemiae quarto.

Unter dem Siegel von der Kanzlei: De propria commissione domini regis.


1) November 11.^{^}
2) Vorlage: coartari.^{^}