Urkunde Nr. 1998 aus Band IV

Seite im UB:

275-277 ^a)

Heute in:

Klausenburg, Staatsarchiv [Direcţia Judeţeană Cluj a Arhivele Naţionale ale Romȃniei]

Druckvorlage:

nach Original

Abdruck als:

Volltext

Sprache:

Latein

---

1998

Kronstadt 1427 März 17 König Sigmund und Königin Barbara treffen Bestimmungen über das Münzwesen.

Sigismundus dei gratia Romanorum rex semper augustus ac Hungariae. Bohemiae, Dalmaciae, Croaciae, Ramae, Seruiae, Galiciae, Lodomeriae, Comaniae Bulgariaeque rex, marchio Brandemburgensis et Lucemburgensis heres necnon Barbara dei gratia regnorum praedictorum regina omnibus Christi fidelibus praesentibus pariter et futuris praesens scriptum inspecturis salutem in omnium salvatore. Cum inter ceteras animi nostri curas, quibus ad profectum regnorum nostrorum utilitatemque nobis subiectorum meditatione continua distrahimur, mente volveremus quemadmodum et ipsorum regnorum nostrorum expeditionibus et diversis statibus eorundem sub dictorum nostrorum in cusione, cursu et consuetudine monetae tam aureae quam argenteae utiliorem et fructuosiorem dispositionem ederemus, habito cum praelatis et baronibus nostris, quorum sigilla una cum nostris pro maiori evidentia consensus eorundem praesentibus sunt appensa, maturo superinde consilio, provida deliberatione praecedente, ordinationes statuta edictalia scripta infra contenta decrevimus, sanximus et decernimus tam effectui mancipanda quam futuris temporibus continue firmitate servanda. Ordinavimus itaque, statuimus, sanximus et conclusimus, monetam auream nostrae maiestatis in eisdem qualitate, quantitate et gradibus auri, quibus huiusque cusa est et nunc cuditur, de cetero cudi et remanere, monetam vero argenteam maiorem a modo in antea cudi et fabricari de argento finissimo in tanta quantitate, quod de una marca puri argenti exeant denarii sexcenti, quorum centum currant pro floreno auri. Minores vero denarii vulgariter filler vocati camarae nostrae regiae hactenus cusi quousque durabunt remaneant et currant nec cudantur de cetero plures de istis vel alii fillerii nisi tandem tum per nos ac praelatos et barones nostros praedictos pro nostra et regni nostri utilitate de cusione minoris nostrae monetae aliud cogitatum exstiterit et provisum. Quo circa ex vigore praesentis decreti et sanctionis nostrae maiestatis et praelatorum et baronum nostrorum praedictorum unanimi voluntate, consensu et ordinatione firmissimo sub praecepto per universos comitatus et provincias ac loca dicti regni nostri insinuari, publicari et proclamari mandamus, ut omnes regnicolae et alii quivis homines in regno nostro commorantes falsos denarios minores seu fillerios, quorum admixtione vera moneta camarae nostrae regiae hactenus et nunc est depravata, usque ad festum sancti Jacobi [S. 276] apostoli proxime venturum¹⁾ prorsus abiicere, annihilare et abolire teneantur, nullatenus de cetero eosdem apud se detinere praesumendo, volentes et eodem edicto committentes, ut infra ipsum terminum iudices praesidentes et rectores civitatum, nundinarum et fororum omnes falsos obulos seu fillerios necnon officiales nostri regales ad id deputandi in locis et foris suarum iurisdictionum diligenter requiri ac inventos incidi et destrui facere teneantur sicque incisos et destructos eis apud quos inventi fuerint ne hoc cupiditati imputetur restitui faciant et resignari. Lapso autem huiusmodi termino festi sancti Jacobi apostoli si quis cum moneta omnino falsa segregala videlicet a moneta vera camarae nostrae regalis ad numerum ad minus duodecim denariorum se extendentem fuerit deprehensus, talis poena delatoris falsae monetae puniatur. Quicumque vero falsam monetam intermixtam bonae monetae camarae regiae usque ad decimum, puta inter centum fillerios decem falsos aut in centum florenis verorum denariorum decem florenos falsorum, deferre comperti fuerint, tales in personis detineri ac poena falsificantium monetam puniri debeant praenotata. Denarii vero falsi sic inventi modo praemisso aboleantur. Moneta autem falsa infra praetaxatum numerum, ratione cuius scilicet delator personae aut rerum subire non merebatur poenam, similiter ab eisdem iudicibus et praesidentibus nundinarum, fororum et civitatum ac officialibus nostris requiratur, incidatur et aboleatur. Statuimus insuper et sanximus, quod quicumque homines regnicolae vel forenses cuiuscumque status et conditionis exsistunt in tantam malitiam suam temeritatem extenderint, quod praedictam monetam nostram novam argenteam vel aliam quamlibet contra veteres et varias nostrae maiestatis ac dictorum praelatorum et baronum nostrorum ordinationes et inhibitiones radere vel quomodolibet incidendo minorare aut rasam vel minutam deferre seu cum tali quovismodo mercari vel negotiari praesumpserint, poena falsorum denariorum plectantur praenotata eandemque poenam subire volentes et decernentes omnes segregatores, exponderatores et electores graviorum denariorum a levioribus huiusmodique in genio cursum et valorem dictae monetae nostrae vilificare satagentes. Item statuimus, ordinavimus pro statutoque et sanctione irrevocabili habere volumus et reliquimus, ut marca puri argenti Budensis ponderis valeat quingentos et quinquaginta denarios monetae maioris supradictae, quorum scilicet centum currant pro floreno auri. Praeterea statuimus, sanximus et ordinavimus, quod nemo in mercaturis, emptionibus, venditionibus et commutationibus praesumat procedere et negotiari cum auro vel argento non monetato, sed totum aurum et argentum comportetur ad camaram monetae nostrae regalis vendaturque ibi pretio suo modo praemisso limitato. Mercantiae vero quaelibet exerceantur et fiant cum moneta regali vel commutationibus aliarum rerum [S. 277] praeter aurum et argentum. Si quis autem contrarium fecerit, emptor tam aurum et argentum non monetatum modo praemisso in huiusmodi negotiationibus expositum quam alia cuncta bona sua tunc secum habita et reperta, venditor vero rem venalem pro huiusmodi auro et argento non monetato expositam amittat ipso facto. Ad haec unanimi consensu et voluntate praelatorum et baronum praedictorum sanximus et statuentes commisimus perpetue firmiter observanda, ut nullus omnino¹⁾ hominum regnicola vel forensis cuiuscumque status et conditionis existat aurum et argentum necnon pecuniam auream et argenteam de regnis nostris coronae nostrae Hungariae suppositis sub poena capitis ac perditionis omnium bonorum suorum mobilium et immobilium ubilibet habitorum audeat exportare ultra rationabiles et condecentes expensas considerata dignitate et conditione personarum, praelatis tamen et baronibus ac nobilibus et ceteris regnicolis nostris secundum cuiuslibet conditionis facultatem pro clenodiis et laboribus propriis aurum et argentum emenda ac ubi maluerint purgari, fabricari et laborari faciendi libera facultate remanente vigore et testimonio praesentium literarum nostrarum privilegialium mediante. Datum Brassouiae, feria secunda proxima post dominicam Reminiscere, anno domini MCCCCXXVII^mo , regnorum nostrorum anno Hungariae et cetera XL, Romanorum XVII^mo et Bohemiae septimo.

Auf der Rückseite von gleichzeitiger Hand: Thomae de Mera.


a) Die Fußnoten wurden in diesem Band des UB jeweils seitenweise gezählt. Auf die vorliegende Urkunde entfallen: 1 auf S. 276 und 1 auf S. 177.^{^}
[S. 276]
1) Juli 25.^{^}
[S. 277]
1) Hierauf durchgestrichen: hominum.^{^}